Трампын худалдааны дайны улмаас Хятадын тал худалдаж авахаас татгалзсан Боингийн эхний онгоц АНУ-д буцаж иржээ

Ерөнхийлөгч Трампын өдөөсөн худалдааны дайны улмаас Хятадын авиа компанийн худалдаж авахаас татгалзсан эхний нисэх онгоц Бямба гарагт АНУ дахь Боинг компанийн үйлдвэрт буцаж иржээ.

Хятадын иргэний агаарын тээврийн Xiamen Airlines компанийн захиалгаар үйлдвэрлэгдсэн 737 MAX загварын нисэх онгоц орон нутгийн цагаар 18:11 цагт Сиэтл хот дахь Боинг компанийн талбайд газардсаныг гэрчүүд мэдээлсэн байна.

Уг онгоцыг Xiamen Airlines компанийн бэлгэдлийн өнгөөр будсан байжээ.

Онгоцыг Хятад дахь Боингийн төв Зоушаньд хүргэж, эцсийн үйлчилгээг хийсний дараа захиалагчид хүргэх ёстой байсан гэнэ.

Гэвч захиалагч тал татгалзсан тул Гуам, Хавайн арлуудад хоёр удаа түлшээр цэнэглэн нийт 8,000 км орчим зам туулан үйлдвэртээ буцжээ.

Трамп энэ сард Хятадын импортын бараа бүтээгдэхүүний татварыг 145 хувьд хүргээд байгаа.

Хариуд нь Хятадын эрх баригчид АНУ-ын бараанд 125 хувийн импортын татвар ногдуулсан юм.

Дараа нь бас авиа компаниуддаа АНУ-ын үйлдвэрт захиалсан нисэх онгоцнуудаасаа татгалзах чиглэл өгсөн гэсэн мэдээлэл тараад байгаа.

Шинэ Boeing 737 MAX загварын нисэх онгоцны зах зээлийн үнэ $55 сая орчим байдаг.

Хятадын захиалагч компани Трампын авсан арга хэмжээний үр дүнд үүнээс хамаагүй их мөнгө төлөх болсон байж болзошгүйг мэргэжилтнүүд тайлбарлаж байна.

Boeing болон Xiamen Airlines компаниудын аль аль нь энэ талаар мэдээлэл өгөөгүй байна.

Дээрх онгоц нь дэлхийн хамгийн том агаарын тээврийн зах зээл болох Хятадаас буцаагдах олон мянган онгоцны эхнийх байж магадгүй юм.

Америк, Хятадын өмнөх худалдааны маргаан зөрчлийн улмаас 737 MAX загвар бараг таван жилийн турш импортын хоригт ороод байв. Энэхүү хоригийн дараа Боинг компани борлуулалтаа сэргээхээр төлөвлөж байсан нь ийнхүү дахин саадтай тулгарч байна.

Эх сурвалж: CNN