"Х.Баттулгын Төгрөг нуурын ордтой холбоотой шинэ баримтыг АТГ-т шалгуулахаар өгнө"

Гэрэл зургийг MPA агентлагийн онцгой зөвшөөрөлтэйгөөр ашиглав

ХҮН намын зөвлөлөөс УИХ-ын гишүүн Х.Баттулгатай холбоотой ноцтой баримт дэлгэж байгаа талаар өнөөдөр мэдээлэл өглөө.

Энэ талаар УИХ-ын гишүүн Б.Найдалаа "Бидэнд иргэдээс мэдээлэл ирсэн юм. Үүнд УИХ-ын гишүүн Х.Баттулгын нэр холбогдоод буй Төгрөг нуурын ордтой холбоотой учир олон нийтэд мэдээлэх нь зөв гэж үзлээ.

Тодруулбал 2006 оны гуравдугаар сарын 3-нд "Женко групп"-ээс Х.Баттулгын гарын үсэгтэй “Дэйвү Интернэшнл” компаниар явуулсан албан бичиг байна. Албан бичиг компаниудын хооронд байдаг зүйл. Гэхдээ ноцтой хэдэн зүйл харагдлаа.

Нэгдүгээрт 20 жилийн өмнө банк санхүүгийн салбарт Номарангийн хэрэг гэж олон хохирогчтой, 10 сая ам.долларын хохиролтой ноцтой хэрэг гарч байсан.

Энэ хэрэгт 2006 онд байгуулсан албан бичигт “Номарангтай холбоотой Монгол шуудан болон Голомт банк дээр нээсэн хохирлыг миний бие хүлээнэ” гэж хүлээн зөвшөөрсөн байна.

Энэ нь тухайн хэргийг нарийвчлан шалгах, гэм бурууг тогтоох шаардлага байгааг харуулж буй юм.

Хоёрдугаарт “Мөн дээрх албан бичигт Монголын байгалийн баялаг нөөц нь тогтоогдсон ордуудыг заръя, зарж байна. Хятад талын худалдан авагч олж өгөөч гэсэн утга бүхий санал, хүсэлт байна. Энэ нь өнөөдөр яригдаж буй Төгрөг нуурын ордыг зарсан гэх асуудалтай холбоотой байж болзошгүй гэж хардаж байгаа. Үүнийг иргэд мэдэх ёстой. Гуравдугаарт УИХ-ын гишүүн хүн Монгол Улсын Үндсэн хуулиар өөр ажил эрхэлж болохгүй. Гэтэл 2006 оны уг албан бичгийг явуулсан хүн нь УИХ-ын гишүүн байсан. Иймэрхүү ноцтой сэжүүр байгаа учир  иргэнээс ирсэн уг мэдээллийг иргэдэд хүргэх ёстой гэж байгаа учир энэхүү мэдээллийг хийлээ. Төгрөг нуурын ордын хэргийг шалгаж байгаа байх. Тэр утгаараа энэ мэдээлэл нэмэлт нотлох баримт болох байх. Тиймээс Авлигатай Тэмцэх Газар (АТГ)-т энэ мэдээллийг хүргэнэ” гэсэн юм.