Нисгэгчийн алдааны улмаас сумны болон түлшний савыг онгоцноос хаяснаа Өмнөд Солонгосын арми хүлээн зөвшөөрөв

Өнгөрсөн долоо хоногт сургуулилалтын нислэгийн үеэр Өмнөд Солонгосын армийн KA-1 хөнгөн байлдааны онгоцноос сумны сав болон түлшний хоосон сав газарт хаясан осол гарсан юм.

Уг осол нь нисгэгчийн санамсаргүй алдаанаас болсныг тус улсын агаарын зэвсэгт хүчний удирдлага өчигдөр мэдээлжээ.

Тухайлбал нисгэгч бүхээгийн агааржуулалтыг тохируулах гэж байгаад санамсаргүй ослын үеэр хэрэглэдэг тусгай товчийг дарсан юм байна.

Үүний улмаас түлшний хоосон сав болон их хэмжээний сумтай сав онгоцноос салж, газарт унажээ.

Тухайн үед уг онгоц нийслэл Сөүлээс зүүн зүгт 125 км зайд оршдог Пёнчаны ойролцоо ууланд шөнийн нислэг үйлдэж байсан гэнэ.

Осол Баасан гарагийн оройн 8:00 цагийн үед гарчээ. Азаар унасан зүйлс ямар нэг хохирол учруулаагүй байна.

Газарт унагасан зүйлсийг олж цуглуулах ажиллагаанд нэг HH-60 нисдэг тэрэг, 270 орчим цэргийн алба хаагчийг дайчилсан байна.

Өнгөрсөн долоо хоногийн амралтын өдрүүдэд сумны сав болон түүнээс асгарсан ихэнх сумыг олжээ.

Даваа гарагт цэргүүд түлшний хоосон сав болон үлдсэн 12.7 мм-ийн 500 ширхэг сумыг хайх ажиллагааг үргэлжлүүлсэн байна.

Уг ослын улмаас завсарласан сургуулилалтын нислэгийг Мягмар гарагийн үдээс хойш сэргээхээр болжээ.

Өмнөд Солонгос, АНУ-ын агаарын хүчний хамтарсан сургуулилалт өнгөрсөн долоо хоногийн Пүрэв гарагт эхэлж, хоёр долоо хоног үргэлжлэх төлөвлөгөөтэй байгаа юм байна.

Агаарын зэвсэгт хүчний удирдлагууд болсон явдалд олон нийтээс уучлал гуйж, дахин ийм алдаа гаргуулахгүй байхад анхаарал тавьж ажиллахаа амлажээ.

Гуравдугаар сарын 6-ны өдөр Өмнөд Солонгосын армийн KF-16 сөнөөгч онгоцнууд Сөүлээс зүүн хойд зүгт 40 км зайтай оршдог Почон орчимд бэлтгэл хийж байхдаа сургуулилалтын талбайн гадна Mk82 загварын найман ширхэг бөмбөг санамсаргүй хаясны улмаас 52 хүн шархдаж, олон тооны орон сууцны барилга эвдэрч байлаа. Шархадсан хүмүүсийн 38 нь энгийн иргэд байсан юм.

Уг осол нь нисгэгчид цохилтын байн координатыг гараар буруу оруулснаас болсон гэгдэж байв.

Өмнөд Солонгосын зэвсэгт хүчинд ийм алдаанууд давтагдан гарч байгаа нь ерөнхийлөгч асан Юн Сүк Ёлын цэргийн дэглэм тогтоох оролдлоготой холбогдсон батлан хамгаалахын сайд, өндөр албан тушаалтнууд баривчлагдаж, удирдлагын дээд түвшинд хоосон орон зай үүссэнээс үүдэлтэй гэж зарим ажиглагчид дүгнэж байна.

Эх сурвалж: Yonhap News