ЦУОШГ: Бэлчээрийн ургамал нийт нутгийн 30 орчим хувьд цухуйгаагүй байна

Гэрэл зургийг MPA агентлагийн онцгой зөвшөөрөлтэйгөөр ашиглав

Бэлчээрийн ургамлын ургалтын байдал дөрөвдүгээр сарын 20-ны байдлаар нийт нутгийн 30 орчим хувьд цухуйгаагүй байгаа талаар Цаг уур, орчны шинжилгээний газраас мэдээллээ. 

Тухайлбал бэлчээрийн ургамлын ургалт Ховд, Говь-Алтай, Завхан, Архангай, Говьсүмбэр, Дундговь, Өмнөговь, Дорноговь, Сүхбаатарын ихэнх, Баян-Өлгий, Увс, Баянхонгор, Өвөрхангай, Төвийн зарим сумдын нутгаар муу,

Орхоны нийт, Булган, Сэлэнгийн ихэнх, Увс, Ховд, Баянхонгор, Төв, Өмнөговь, Сүхбаатар, Дорнодын цөөн сумдын нутгаар дунд, Дархан-Уул, Дорнодын ихэнх, Хөвсгөл, Хэнтийн зарим, Увс, Говь-Алтай, Булган, Сэлэнгэ, Төв, Өмнөговийн ганц нэг сумдын нутгаар хэвийн байгаа юм байна. 

Салхины хурд тал хээр болон говийн нутгаар түр зуур 16-27 м/с буюу аюултай үзэгдлийн, Говь-Алтайн Цээл, Баянхонгорын Баянговь, Дундговийн Луус, Өмнөговийн Цогт-Овоо, Гурвантэсд 28-29 м/с, Баянхонгорын Баянцагаанд 37 м/с, Говь-Алтайн Эрдэнэд 44 м/с буюу онц аюултай үзэгдлийн хэмжээнд хүрч салхилсан байна.

Өнгөрсөн арав хоногт агаарын температур нийт нутагт дунджаас 1.1-4.9 градусаар дулаан, хур тунадас говь болон зүүн аймгуудын нутгаар дунджаас ахиу, бусад нутагт дунджийн орчим буюу түүнээс бага орсон байна.

Дөрөвдүгээр сарын 20-ны байдлаар Баян-Өлгийн Сагсайд 4 см зузаан цастай байна. МАА-н үйлдвэрлэлд мал төллөх, тарилга хийх, туулга өгөх ажлууд хийгдэж байгаа юм байна. 

Мөн өнөөдөр өдрийн 15:00 цагийн байдлаар Төвийн болон Говийн аймгуудын нутгаар хүчтэй салхи цаг агаарын аюултай үзэгдлийн хэмжээнд хүрч шуурч байгаа тул хүчтэй салхи, шуурганы аюулаас сэрэмжтэй байхыг Цаг уурын байгууллагаас сэрэмжлүүллээ.