Москвагийн ойролцоо оршдог зэвсгийн агуулах дэлбэрсний улмаас орон нутагт онц байдал тогтоожээ

Мягмар гарагт Москва хотоос зүүн зүгт оршдог зэвсгийн томоохон агуулахад дэлбэрэлт болсон тухай ОХУ-ын батлан хамгаалах яам мэдээлжээ.

Владимир мужид оршдог энэ зэвсгийн агуулах нь Оросын армийн онцгой байгууламжид тооцогддог юм байна.

Дэлбэрэлтийн шалтгааныг батлан хамгаалах яам “аюулгүй ажиллагааны дүрэм зөрчигдсөн”-тэй холбон тайлбарлажээ.

Үүссэн нөхцөл байдалтай холбогдуулан Владимир мужийн Киржач дүүрэгт онц байдал зарлаж, ойролцоох тосгодоос иргэдийг нүүлгэн шилжүүлсэн байна.

“Мягмар гарагт Владимир мужийн нутагт оршдог цэргийн ангийн зэвсгийн агуулахад гал гарсны улмаас сум дэлбэрчээ. Галын шалтгаан нь тэсэрч дэлбэрэх бодистой харьцахдаа аюулгүй ажиллагааны дүрэм зөрчсөнөөс болсон байна” гэж ОХУ-ын батлан хамгаалах яамны мэдэгдэлд өгүүлжээ.

Дэлбэрэлтийн улмаас хүний амь нас эрстээгүй, хэргийг мөрдөн шалгах хороо байгуулагдсаныг бас мэдээлсэн байна.

Оросын хэвлэлүүдийн мэдээлснээр дээрх байгууламж нь Москвагаас зүүн зүгт 130 км зайтай оршдог пуужин, их бууны 51 дүгээр ангийн харьяа агуулах гэнэ.

Ойролцоох тосгоны оршин суугч дэлбэрэлтийн үеэр их бууны сум хөршийнх нь дээвэр дээр унасан ч дэлбэрээгүй тухай орон нутгийн хэвлэлд ярьжээ.

Владимир мужийн захирагч Александр Авдеев дэлбэрэлтийн тухай баталгаагүй мэдээлэл тараавал шийтгэхийг сэтгүүлчид болон нутгийн иргэдэд анхааруулсан байна.

Эх сурвалж: BBC