ФОТО: "Бишрэлт Металл" баг Үндэсний Дээд лигийн аваргын төлөөх цувралыг тэргүүлж эхлэв
Монголын Сагсан Бөмбөгийн Холбооны Үндэсний Дээд лигийн аваргын төлөө "Хасын Хүлэгүүд" болон "Бишрэлт Металл" баг шалгарч, долоон цуврал тоглохоор болсон билээ.
Аваргын төлөөх шигшээ цувралын эхний тоглолт өчигдөр "М банк арена"-д болж, "Бишрэлт Металл" баг өрсөлдөгчөө гурван онооны зөрүүтэй буюу 85:82-оор хожив. Тоглолтын онооны харьцаа 82:82 байх үед "Бишрэлт Металл" багийн тоглогч Байрон Уэсли сүүлийн хоёр секундэд гурван онооны шидэлтийг амжилттай гүйцэтгэснээр багтаа хожлыг авч ирлээ.
Мөн тэрбээр өчигдрийн тоглолтын шилдгээр тодорсон бөгөөд нийт 40 оноо, долоон самбар, гурван ашигтай дамжуулалт өгсөн. Харин "Хасын Хүлэгүүд" багийн тоглогч Иан Миллер 25 оноо, зургаан самбар, таван ашигтай дамжуулалт өгснөөр багийнхаа бусад тамирчдыг тэргүүлсэн байна.
Аваргын төлөөх шигшээ цувралын хоёр дахь тоглолт дөрөвдүгээр сарын 23-ны Лхагва гарагт 19:10 цагт болно.
Тус тоглолтын нэгдүгээр үе дууссаны дараа "Бишрэлт Металл" багийн тоглогч Девон Скот "Хасын Хүлэгүүд" багийн тамирчин А.Азбаярын дагз руу цохиж, спортын бус алдаа гаргасан. Үүний улмаас А.Азбаяр эмчийн тусламж авч үргэлжлүүлэн тоглох боломжгүй болсон. Харин Девон Скотын хувьд талбайгаас хөөгдсөн билээ.
Өчигдрийн тоглолтын зургуудаас:
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
