ஜெயித்தவர்கள் சொல்லாத பாடம்!
சாதனையாளர்களின் வாழ்க்கை வரலாறுகள் பெருமளவில் விற்பனையாகின்றன. அதைப் படித்தால் மட்டுமே சாதனையாளர்களாக முடியாது என்று தெரிந்திருந்தும் ஏதோவொரு விதத்தில் நாம் அவற்றை விரும்பிப்படிக்கிறோம் — அவர்கள் செய்த தவறுகள் என்ன, மற்றவர்கள செய்யத்தவறிய எந்த ஒன்றைச் செய்ததனால் அவர்களால் சாதிக்க முடிந்தது, அவர்களுக்கான பிரத்தியேக முன்வாய்ப்புகள் (advantages) என்ன போன்ற கேள்விகளுக்கு விடை காணவாவது சாதித்தவர்களின் கதைகளை விரும்பிப்படிக்கிறோம்.
பெரும்பாலான சாதனையாளர்களின் அடிப்படைப் பண்புகள் பெருமளவு ஒத்தே இருக்கின்றன — நேரத்தின் மகத்துவத்தை உணர்ந்திருப்பது, தயக்கமில்லாமல்லும் தாமதிக்காமலும் முடிவெடுப்பதற்கு பழகுதல் (ஆரம்பகாலத்தில் நிறைய செயல்கள் செய்து பொறுப்புகள் தலையில் விழுவதற்கு முன்னரே புதுசு புதுசாத் தப்பு செய்து கற்றுக்கொள்வதன் வழியே), அனைத்தையும் முடிந்தளவு நேர்மறையாய் அணுகுவது, தாராளகுணம் போன்றவை. எனில் ஒரு துறையில் பிரம்மாண்டமாய், தனித்துவமாய், தனக்கடுத்த இடத்திலிருப்பவரை விடப் பல மடங்கு மேலாகச் சாதித்தவர்களின் விசேஷம்தான் என்ன? படிப்போ, பிறப்போ, அதிர்ஷ்டமோதான் அசாத்திய சாதனையாளராய் ஒருவர் உருவாவதற்கு காரணமா?
இது போன்ற கேள்விகள் உங்களுக்குமிருந்தால் உங்களுக்கும் Outliers புத்தகம் நிச்சயம் சுவாரசியாமாயிருக்கும். இதைப் பற்றி முதலில் பத்ரியின் வலைத்தளத்தில் 2010இல் படித்தபிறகும் அவ்வளவாய் கவனிக்கவில்லை. பின்னர் இந்தப்புத்தகத்தில் குறிப்பிடப்பட்ட ஒரு முக்கியமான விஷயம் மெல்லமெல்லப் பிரபலமாகியது — 10000 மணிநேர உழைப்பு.
அதாவது ‘பீட்டில்ஸ்’ இசைக்குழுவோ, பில்கேட்ஸோ அவர்கள் பீட்டில்ஸாகவோ, பில்கேட்ஸாகவோ (‘பெயர் சொன்னால் போதும்; தரம் எளிதில் விளங்கும்’ படிக்கு) அறியப்படுவதற்கு முன் தங்கள் துறைகளில் 10000 மணிநேர உழைப்பைச் சலியாது கொடுத்திருக்கின்றனர். பில்கேட்ஸ் மிச்சிகன் பல்கலைக்கழகத்தின் கணிப்பொறி மையத்திலிருந்த சர்வரின் ஒரு சின்ன குறைபாட்டால் (bug) தனக்கென ஒதுக்கப்பட்ட கணிப்பொறி நேரத்தைவிட அதிக நேரத்தை கணிப்பொறி நிரலெழுதுவதில் செலவிட்டிருக்கிறார்; பீட்டில்ஸ் குழுவினர் தங்கள் ஆரம்பகாலங்களில் ஒவ்வொரு வார இறுதியிலும் இரவுகளில் ஜெர்மனியின் (ஹாம்பர்க் நகரில்) பார்களில் பல மணிநேரம் வாசித்திருக்கின்றனர். ஒரு துறையில் விசேஷ நிபுணத்துவம் கைவரப்பெறுவதற்கு பத்து வருடங்கள் அதில் விடாது அமிழ்ந்திருப்பது (ஒரு நாளில் மூன்று மணிநேரம், தோராயமாக ஒரு வருடத்திற்கு 1000 மணிநேரம், 10 வருடங்களில் 10000 மணிநேரம்) இன்றியமையாததாகிறது.
Get venkatramanan’s stories in your inbox
Join Medium for free to get updates from this writer.
எனில் அனைவருமே அப்படி ஈடுபட்டு நிபுணராகிவிடலாமே என்று கேட்போமேயானால் நம்மை விட அப்பாவி யாருமில்லை ;-) சிந்தித்துத் பார்ப்போம், ஒரு சாதாரண உடற்பயிற்சிப் பழக்கத்தை ஒரு மாதம் மேற்கொள்ளவே நமக்கு எவ்வளவு வைராக்கியம் வேண்டியிருக்கிறது. அதிலும் உடற்பயிற்சியில் நாம் கைகால்களை அசைக்கிறோம், ஏதோவொரு வகையில் நம் அனைத்து புலன்களும் கண்கூடாய் வேலைசெய்கின்றன, அதன் பலன் அரைமணிநேரத்தில் வியர்வையாய் கண்முன்னே பெருக்கெடுத்து நம்மைச் சந்தோஷப்படுத்துகிறது. அப்படி இருக்கையில் கூட நாம் ஏதாவது ‘நொண்டிக்குதிரைக்குச் சறுக்கினது சாக்கு’ என்று அதற்கு டிமிக்கி விடுவதற்கு காரணம் தேடுகிறோம்! வருடம் பூராவும் வயலின் வாசித்துக்கொண்டேயிருக்கும் ஒருவர்… அந்த ஒரு செயலைத்தான் அனுதினமும் செய்கிறார்; எளிதில் சலிப்படைந்து பயிற்சியைக் கைவிட எல்லாக் காரணங்களும் அவருக்கு பிரத்தியட்சமாய் இருக்கின்றன. இதனால்தான் சேத்காடினும் 99% ஆட்கள் 5000 மணிநேரம் கூட முயற்சி செய்வதில்லை என்று குறிப்பிடுகிறார். எனவேதான் 10000 மணிநேர அசுர சாதகம் என்பது ஒரு அவுட்லயரை வித்தியாசப்படுத்துகிறது
இதில் மால்கம் க்ளாடுவெல் பல முக்கியமான புள்ளிகளை இணைக்கிறார். ஏன் அமெரிக்காவில் மின்னனுவியல்/மென்பொருள் போன்ற துறைகளில் சாதித்தவர்கள் 1950- 60களில் பிறந்தவர்களாயிருக்கின்றனர்? ஏனெனில் அவர்களுக்கு ‘மினி கம்ப்யூட்டர்’ கண்டுபிடிக்கப்படுகையில்(1975இல்) 24- 30 வயது. அவர்களுக்கு திருமணமாகியிருக்கும் சாத்தியம் குறைவு. எனவே பரிசோதனை முயற்சிகள் செய்வதற்கு அவகாசமிருக்கும். குடும்ப பாரம் தலையை அழுத்தாது. இதே ஐந்து வருடம் முன்னர் பிறந்தவர்கள் கூட திருமணமாகி, குட்டிபோட்டு தங்கள் சம்பளவேலையில் செட்டிலாகியிருப்பர். பெரிதாக சாதிக்க நினைத்தாலும் குடும்பச் சூழல் அழுத்துவதற்குத்தான் வாய்ப்புகள் அதிகம். எனவேதான் ஸ்டீவ் ஜாப்ஸ், பில்கேட்ஸ் உள்ளிட்ட மென்பொருள் ஜாம்பவான்களில் வயது சற்றேறக்குறைய ஒரேமாதிரி இருக்கிறது.
இந்தப் புத்தகத்தில் க்ளாட்வெல் தனிப்பட்ட சாதனையாளர்களை மட்டுமல்லாமல் ஒரு இனக்குழுவை அதன் சகக்குழுக்களிலிருந்து (சமகாலத்தில் ஒரே இடத்திலோ அருகருகிலோ வாழ்ந்தவர்கள்) வேறுபடுத்துவது எது போன்றவற்றையும் ஆராய்கிறார் (நம்ம ஊர் சாதிவேறுபாடுகளுக்கு இதைப் போட்டுப் பார்த்தோமானால் சுவாரசியமாக இருக்கும்!). அமெரிக்காவின் பள்ளி/கல்லூரி/பல்கலை கூடைப்பந்தாட்ட வீரர்களில் சாதித்தவர்கள் பெருமளவு ஒரு குறிப்பிட்ட மாதங்களில் பிறந்திருப்பது, அதே சமயம் இந்த ஒற்றுமை டென்மார்க் நாடுகளின் கால்பந்தாட்ட வீரர்களுக்கு ஏன் பொருந்துவதில்லை, விமான விபத்துகள் பெரும்பாலும் ஒரு குறிப்பிட்ட வகை கலாசாரத்திலிருந்து வரும் விமான ஓட்டிகளாலேயே பெருமளவில் நிகழ்வது (ஆபத்துக்காலங்களில் மேலதிகாரிகளுக்கு கண்மூடித்தனமாக கீழ்ப்படியாமல் அவர்களுடன் பயமில்லாமல், தைரியமாக நிலைமையை உள்ளது உள்ளபடி விளக்கிச்சொல்லும் மேலை நாடுகளின் விமானஓட்டிகள் விபத்தைத் தவிர்க்கின்றனர்; சிறுவயதிலேயே கேள்விகேட்பதை ஊக்குவிக்கும் அவர்கள் கலாசாரத்தால் வரும் பிரத்தியேகமான அனுகூலம் இது), தகாத வார்த்தைகளால் தமது ‘ஈகோ’ சீண்டப்படுவதை சிறுவயதிலேயே எதிர்கொள்ளும் இளைஞர்கள் கல்லூரிகளில் எவ்வாறு சவால்களை திறமையாக எதிர்கொள்கின்றனர் என்று பல புள்ளிகளைத் தொட்டுச்செல்கிறது இந்தப்புதகம்.
சேத்காடினின் ஒரு கருத்தோடு இந்தக்கட்டுரையை முடிக்கலாம் என்று நினைக்கிறேன். The easiest way to thrive as an outlier …is to avoid being one- நம் குழுவிற்குள் நாம் ஒரு அவுட்லயராக இருப்பதற்காக விசேஷ கவனம் எடுத்துக்கொள்ளாமல் நமக்குத் தெரிந்த நல்ல விஷயங்களை நம் குழுவினருக்கும் (குடும்பம், நண்பர்கள், உடன் பணிபுரிபவர்கள்) கற்றுக்கொடுத்து அவர்களும் நம்மளவு மேலெழ முயல்வதற்கு உதவி செய்வதே ஒரு அவுட்லயராய் ஆவதற்கு சிறந்த வழி!
அமேசானில் அவுட்லயர்ஸ் புத்தகத்தை வாங்குவதற்கு
அமேசானின் மால்கம் க்ளாட்வெல்லில் புத்தகங்கள்
தமிழில் : சித்தார்த்தன் சுந்தரம்
மால்கம் க்ளாட்வெல்லில் புத்தகங்கள்
Malcolm Gladwell on Twitter
Malcolm Gladwell’s articles on NewYorker
தொடரின் முந்தைய இடுகைகள்:
http://bit.ly/42things1 முதல் நாள் இன்று: ஜெயமோகனின் நகைச்சுவைக் கட்டுரைகள்)
http://bit.ly/42things2 சுகானுபவம் (சுகாவின் எழுத்துத் தொகுப்பு)
http://bit.ly/42things3 This is Seth Godin
http://bit.ly/42things4 வியப்பளிக்கும் ஆளுமை வெங்கட்சாமிநாதன்
http://bit.ly/42things5 பணிவன்புடன்… (அரவிந்தன் நீலகண்டன்)
http://bit.ly/42things6 ஹரியண்ணா
http://bit.ly/42things7 : குவியத்தின் எதிரிகள் (கஸ்தூரி சுதாகர்)
http://bit.ly/42things8 ஒத்திசைவு ராமசாமி
http://bit.ly/42things9 கன்னிவாடி சீரங்கராயன் சிவக்குமார்
http://bit.ly/42things10 என் கடன் பணி செய்து கிடப்பதே (வேளுக்குடி கிருஷ்ணன்)
http://bit.ly/42things11 உம்மாச்சி
http://bit.ly/42things12 சுஜாதாவின் அஃபீஷியல் பயோகிராஃபர்
http://bit.ly/42things13 இன்றைய காந்தி
http://bit.ly/42things14 சித்திரமும் கைப்பழக்கம் (ஜேம்ஸ் க்ளியர்)
http://bit.ly/42things15 ஜெயமோகனின் பயணக்கட்டுரைகள்
http://bit.ly/42things16 ஜெயமோகனின் காணொளி உரைகள்
