<?xml version="1.0" encoding="UTF-8"?><rss xmlns:dc="http://purl.org/dc/elements/1.1/" xmlns:content="http://purl.org/rss/1.0/modules/content/" xmlns:atom="http://www.w3.org/2005/Atom" version="2.0" xmlns:cc="http://cyber.law.harvard.edu/rss/creativeCommonsRssModule.html">
    <channel>
        <title><![CDATA[Stories by Jade in the 852 on Medium]]></title>
        <description><![CDATA[Stories by Jade in the 852 on Medium]]></description>
        <link>https://medium.com/@jadeinthe852?source=rss-361acbe4b84a------2</link>
        <image>
            <url>https://cdn-images-1.medium.com/fit/c/150/150/1*0f-XK1ciusNku_u2TrsXjg.jpeg</url>
            <title>Stories by Jade in the 852 on Medium</title>
            <link>https://medium.com/@jadeinthe852?source=rss-361acbe4b84a------2</link>
        </image>
        <generator>Medium</generator>
        <lastBuildDate>Sun, 22 Nov 2026 19:21:26 GMT</lastBuildDate>
        <atom:link href="https://medium.com/@jadeinthe852/feed" rel="self" type="application/rss+xml"/>
        <webMaster><![CDATA[yourfriends@medium.com]]></webMaster>
        <atom:link href="http://medium.superfeedr.com/" rel="hub"/>
        <item>
            <title><![CDATA[夢餘錄：太空卡]]></title>
            <link>https://jadeinthe852.medium.com/%E5%A4%A2%E9%A4%98%E9%8C%84-%E5%A4%AA%E7%A9%BA%E5%8D%A1-5f395124668d?source=rss-361acbe4b84a------2</link>
            <guid isPermaLink="false">https://medium.com/p/5f395124668d</guid>
            <category><![CDATA[172]]></category>
            <category><![CDATA[香港]]></category>
            <category><![CDATA[反送中]]></category>
            <category><![CDATA[香港反送中]]></category>
            <dc:creator><![CDATA[Jade in the 852]]></dc:creator>
            <pubDate>Tue, 02 Feb 2021 01:06:05 GMT</pubDate>
            <atom:updated>2021-02-02T01:06:05.484Z</atom:updated>
            <content:encoded><![CDATA[<figure><img alt="" src="https://cdn-images-1.medium.com/max/851/1*U-6J7l4VIRUHpzDg60cafQ@2x.jpeg" /></figure><p>黃花雨成日覺得麥展風似月亮，好疏離，好冷靜。比如今次，黃花雨一向鍾意坐巴士上層的最前，鍾意風景一覽無遺，上完樓梯都未行兩步，一直戴住風褸帽嘅麥展風就扯佢坐去中後，冷冷數落：係呀，你對司機都一覽無遺。</p><p>「如果揀咗坐左邊或右邊 — — 咪有一邊風景會睇唔到囉。」黃花雨唸唸有詞。佢對手仍然微震，只好捉住胸前相機帶。「次次搭飛機或地鐵呢，我都會好唔開心，點解我淨係可以睇到一半風景⋯⋯」</p><p>麥展風將電話擺背囊下面check Telegram，嘖一聲：「俾妳睇晒都好，以妳記憶力都記唔到啦。」</p><p>「我⋯⋯唔鍾意⋯⋯有嘢我錯過。」黃花雨漫不經心望向麥展風忙碌嘅手：佢嘅角度睇過去，乜都睇唔到，黑似月缺。「即係⋯⋯我想我嘅感知係完整嘅。如果有嘢我唔清楚，我會覺得好辛苦⋯⋯」</p><p>佢諗起剛才，行過每條橫街、每個轉角，每一秒嘅身後，每一秒嘅眼前，甚至記憶中嘅平靜，都忽然湧動未知。佢嘅香港，從未如此兇險。甚至日常至極嘅光潔地鐵站，轉瞬居然可以湧入咁多人，喊打喊殺，仿似天經地義。諗唔通。</p><p>麥展風諗都無諗就應：「好多嘢都唔到妳知㗎喎。人邊有得全知。」</p><p>黃花雨沉默，指甲插入手心。</p><p>佢點會唔明白。佢連麥展風都知唔晒。612當晚重遇，麥展風手同背脊都有瘀傷，佢至今未知由來。麥展風剛才同幾個人一齊行動。佢知道，麥展風本來唔會離場。如果唔係要照顧佢。</p><p>車廂上層無人。港島帶濃厚殖民色彩嘅風情喺窗外流過。佢哋離滴墨嘅中國國徽同一觸即發嘅夜晚，越嚟越遠。黃花雨將頭埋喺背囊上偷望麥展風，背對夜色。</p><p>麥展風手臂彈到幾星噴漆，星星點點，紅色、黑色。黃花雨望住諗起中聯辦牆上，大字半乾。</p><p>黃花雨收到電話：「Home」，無接，但就見到麥展風望住佢唔放，太過反常。黃花雨下意識縮起：「係？」</p><p>麥展風無講嘢，又低頭碌Telegram。剛才香港另一邊嘅直播已經迅速剪成片製成gif整成圖，連同所有陳述就夠震撼嘅字炸開所有channel、所有group。麥展風叫自己一直、一直睇，填充自己內心嘅虛浮不安。低清又震得驚惶嘅暴戾畫面即使靜音都令佢頭痛欲震。過東隧時，佢終於開口。</p><p>「而家香港發生嘅事⋯⋯唔係俾機會妳影啲一世都無諗過可以影到嘅相，然後心滿意足返屋企。我哋做嘅嘢，想做嘅嘢，唔係俾妳隔住玻璃睇嘅⋯⋯風景。」</p><p>「我無啊。」黃花雨聲音細如蚊納。</p><p>「但妳唔明。要track妳行蹤有幾難，一問妳電話公司查卡就知。」</p><p>黃花雨本來想駁，出現又唔代表咩 — — 但撤退時，麥展風沿街指，先驚覺一街天眼森森。膠紙、噴漆、亂棍打碎，都難保萬全。</p><p>麥展風搲一搲手臂上嘅漆：「查返去我到，我咪含撚。」</p><p>「對唔住。」細不可聞。雖然佢唔知麥展風做咗咩。</p><p>麥展風後悔帶黃花雨走。但呢個喺hotzone仲掛住影相嘅𡃁妹竟然話要去元朗，明明喺佢眼角餘光中震到無停。衰心軟，「唔好過去，妳今晚嚟我到，唔好返天水圍。我哋而家走。」佢聽到自己咁講。咁但，之後呢，佢仲可以照顧多黃花雨幾多次？</p><p>「妳之後諗住點？」佢補充：「之後。」今晚之後。</p><p>「你頭先咪⋯⋯同人一齊行嘅。佢哋咩人嚟㗎。」黃花雨發現自己聲音無得更細，於是貼住麥展風問。</p><p>「唔識㗎喎。」他日煲底除罩相認就係咁解。蒙昧平生，先無從相累。</p><p>黃花雨望住佢，望住佢裝住頭盔豬咀眼罩噴漆六角匙嘅背囊，望住佢手臂嘅漆污，又望住佢。「咁⋯⋯」</p><p>佢睇得明黃花雨嘅眼神，一貫不知所謂地熱情到魯莽，天真嘅信任同認定滿瀉，但佢聽唔到問題，就決定唔覆。佢諗起片入面嗰位下跪嘅師兄。如果佢一個人，一定實牙實齒，老閪都還手先。但，突然又諗，佢打緊時，就會淨低黃花雨一個人，六神無主 — — 佢居然遲疑。麥展風好煩燥：人一有牽扯一有情感，果然就會變弱。</p><p>隧道入面燈光晦暗，灰白而一成不變嘅牆面同格線喺麥展風身側滾滾掠過，沿途無數逃生出口。沉默之中，麥展風捉得佢部電話好實。</p><p>黃花雨輕輕問：「你換咗電話。」</p><p>麥展風知道黃花雨又會追問，直接答：「之前嗰部賣咗。」</p><p>電話可以換，太空卡可以掉，但骨肉難削，身份難換。七月一日晚起，麥展風喺六月一路積起嘅惶然不安去到最高峰，昂奮過後，就發現自己已然飄入等待命運發落嘅夾縫之中。諷刺地，佢仍然逢星期一至五搭𨋢落樓，行路去車站搭車，坐喺案前，畫圖。腳明明仲好似踩住實地。</p><p>「賣咗。」黃花雨眼神撲向佢：「你 — — 」</p><p>麥展風望住隧道牆：「唔講啦。」</p><p>喺一息間，巴士去到隧道口，光暗依次喺麥展風臉上轉過。然後歸於沉寂。</p><p>黃花雨覺得麥展風好孤單。</p><p>下定決心：「咁我之後同你出去好唔好⋯⋯。」講到最後又心虛。係咪太大言不慚？</p><p>麥展風另轉臉望黃花雨，四目交投。</p><p>「我唔帶相機、唔影相啦，好唔好，我唔想你自己一個 — — 」</p><p>「咪傻。」麥展風反射答。</p><p>「咁你俾個方法我聯絡你。」</p><p>「唔好啦。」其實係唔記得太空卡號碼。都無謂扯人落水。佢連出去發夢要用太空卡嘅自知之明都無。唔好啦。</p><p>又陷沉默。麥展風慢慢覺得手背發痛，原來係捉得太實，而痛好實在。明明覺得新機太大部用唔慣，但捉得緊時，好似可以喺茫茫前路中撈返少少實在嘅觸感。佢可能其實都想有嘢可以捉住。但，怕。佢只剩低眼前，腳下，無未來，又點可以貪。</p><p>麥展風覺得好攰。六月起，佢一直瞓得好差。</p><p>巴士搖動，佢最後挨住清醒嘅黃花雨，陷入淺眠。夢入面有依稀月光，照入起火嘅隧道。火舌微微捲動。極是安靜。</p><img src="https://medium.com/_/stat?event=post.clientViewed&referrerSource=full_rss&postId=5f395124668d" width="1" height="1" alt="">]]></content:encoded>
        </item>
        <item>
            <title><![CDATA[【折磨浩慢，道阻且長：眾新聞製作《紅磚危城》】⁣⁣]]></title>
            <link>https://jadeinthe852.medium.com/%E6%8A%98%E7%A3%A8%E6%B5%A9%E6%85%A2-%E9%81%93%E9%98%BB%E4%B8%94%E9%95%B7-%E7%9C%BE%E6%96%B0%E8%81%9E%E8%A3%BD%E4%BD%9C-%E7%B4%85%E7%A3%9A%E5%8D%B1%E5%9F%8E-e7f63f432bf9?source=rss-361acbe4b84a------2</link>
            <guid isPermaLink="false">https://medium.com/p/e7f63f432bf9</guid>
            <category><![CDATA[理大圍城]]></category>
            <category><![CDATA[反送中]]></category>
            <category><![CDATA[紀錄片]]></category>
            <category><![CDATA[紅磚危城]]></category>
            <category><![CDATA[理大之戰]]></category>
            <dc:creator><![CDATA[Jade in the 852]]></dc:creator>
            <pubDate>Thu, 21 Jan 2021 02:12:31 GMT</pubDate>
            <atom:updated>2021-01-21T02:12:31.122Z</atom:updated>
            <content:encoded><![CDATA[<figure><img alt="" src="https://cdn-images-1.medium.com/max/1024/1*i_O2m044ETCbPUN7oNnKSg.png" /></figure><p>眾新聞製作，張凱傑導演紀錄片《紅磚危城》11月作公眾放映，熄燈與正片播映的夾縫中，忽現一室血紅（好似是電檢聲明）。正呼應海報滿版正紅。海報用近年流行的笨拙ipad畫風格畫理大游繩一幕，中間重重一畫是繩，白色，在刺眼的紅色上幾近發光。比起繩，不如說似蜘絲；大家命懸一線。漸變明體標題上面，用可愛字體寫：「點解大學變咗戰場」。</p><p>是，開場未成圍城，其實。只是戰場，無人想到以後。15號起開始打，16號晚，催淚煙與火魔相搏，然後，17日中午，水炮車與銳武強攻。鏡頭在紅磚校園外，水炮車離遠噴射藍水，有黑衣青年挽路牌作盾，半匿於壁報板後擋架，一個人，佇立滿地碎磚之間。前線在一夫當關的後方。記者訪問只出場一次的17歲手足 — — 答：「啱啱中咗橡膠子彈。」背後，催淚煙灰白是底色，路邊有樹，隱約有綠意。藍水當著校徽灑落，將路面染得艷麗。本是怡然秋日。</p><p>鏡頭一轉就到夜晚。一令既下，走出理工大學範圍者皆以暴動罪拘捕。尖東橋下，許智峯將眼罩戴在頭頂，舉咪踱步，不屈地對警察防線念念有詞簡直唸經：好多都係普通市民⋯⋯可唔可以從呢個方向離開？指條路俾普通市民走⋯⋯未果。又繼續。警察的強光電筒在鏡頭邊化出似油污映日的破碎炫光。許智峯仍在討要出路。鏡頭外，行車橋上手足的罵聲細碎地傳來：走呀，你哋淨係掛住走！稍遠，尖東，警察的廣播冗贅，生人勿近。喋喋不休的警察反不露相，在暗處，一直講一直講。</p><p>校內大家就地沖身。水炮車從來未停。切到手足訪問，陰暗校園中聲沉沉：「而家搞革命，你條命要用你雙手搏返嚟。」</p><p>這般開場，牆內的情緒未見盡，牆外這一日一夜已然長得教人難忍。18號早晨，3次突圍。日出，A core長樓梯火光閃動，路障橫陳，警方攻入校園拘捕數人。早晨7點50分，記者隨欲突圍手足狂奔，鏡頭內盡是湧動人頭與頸背；鏡外又橫出一聲：「自私鬼！」另一手足訪問：「佢哋想打，但無意義㗎。」路好闊，大家前衝身影零落。荷槍警察早相候。</p><p>然後再一次，第三次。旁觀被捕是另一場漫長折磨。僅僅在校外路邊，兩個重裝警察粗暴制住一個手足，後面再跟兩個持槍警察，手足不住掙扎，大叫，命運未知；校內有手足擲物欲救，換來一輪胡椒球彈掃射。槍彈之出如此輕易，扳機隨手一扣，又射出催淚彈破空。其時，四方八面，任何出口，都連向一洞槍口。</p><p>手足訪問。一位講：「點解呢。點解唔可以放過我哋呢。」</p><p>另一位講：「香港人，如果唔能夠作出更大犧牲，就會一直輸落去。」</p><p>律師與母親越過空闊的行車路與長夜的壓逼尋女。女兒未成年。「只係唔想佢被侵犯，被欺負⋯⋯」離開戰線靜下，市民行不改名坐不改姓各司其職的懇切中，忽然照見政府的缺席與惡的隱身。警察代替政府意志，傲慢又冷漠地施暴。自首嗰條路。呢度上面條橋。指定自首地點。</p><p>有人不甘願，於是就有海報一幕。鏡頭又隨一群留守手足腳步顛簸，跑到連接Z core天橋；彼時，警方已逐步包圍公主道，強光亂舞，少年大叫：「女性走先，中間已經截緊！」此刻竟仍是，他人先於自己。橋欄好高，或扶或抱，大家踩住雜物過了欄就危立橋邊，一個、一個，無暇細顧不顧一切，沿繩滑下兩、三層樓高度，落地之前，身在空中，飄飄搖搖。地上，終於放工，油尖旺區烽火四起。旺角人鏈傳物資，好多人只戴外科口罩。油麻地，人踩人。港島，大家焦急：「點去尖沙咀呀，搭船呀？」再回到Z core天橋。警察發射催淚彈。生路斷。殿後手足走在橋緣，一步步，撒退。</p><p>退回無欄囚籠之內。「無啦。」</p><p>損傷慘重。日子過去，夜深，警察輕佻對空蕩校園廣播挑釁，全段收錄。「我真係覺得你哋好垃圾，又要比人擋住，做又做唔掂、做又做唔好，又無恆心⋯⋯又後悔，又不知所措，又彷徨⋯⋯」</p><p>手足訪問。「大學本應係自由嘅。」（點解大學變咗戰場？）</p><p>後來就寂靜下去。從明刀明槍換成更隔斷的絕境，更隱秘的威逼、藏匿，與角力。而鏡頭眼光忽然收回圍城以內，探遺落的空寂可怖 — — 一組組空鏡，框起逼到你眼前，蛆蟲湧動，更衣室晦暗，運動場凌亂，敷料染血。</p><p>再往回捲，時間向上流，是否戰火燃點以前？手足紅火橋頂交更，podium上坐電腦椅鬥快，笑語飛揚，藍天溫柔，陽光明麗 — — 而最後，由和暖日光照耀墮回暗中，渠內有水湧動。</p><p>「要有人記得有戰爭喺理大發生。」連同零落確鑿的愛與痛。</p><p>黑底白字，幾個字囊括受訪眾手足命運。被捕、獨自逃離、四日後爬渠。都有甚麼，從此遺落扼殺在那數日的黑暗之中。</p><p>欲離，欲迎，在交戰暴烈之外，《紅磚危城》以內外交界的一次次徒勞失落，烘托極權鐵腕下圍城的閉鎖與恐怖：60分鐘，由17日以前橫跨到24日以後，再織入訪問，設計對照落差，似有意作全場圍困回顧，野心更大；幾乎每鏡都好長 — — 凝滯 — — 又漫長 — — 情緒在漲滿與不忍間相消磨。回望尚且折磨，當時，當刻，當血在流，太多太多發生，連鏡頭難以全攬的都在眼前，會是何其難忍。</p><p>但仍有餘力能重訪傷口，有記憶與拾遺的自由，未嘗不是絕望中的福音。</p><p>要散失的，願我們都以肉身，以自己限制內所能，記住。</p><img src="https://medium.com/_/stat?event=post.clientViewed&referrerSource=full_rss&postId=e7f63f432bf9" width="1" height="1" alt="">]]></content:encoded>
        </item>
        <item>
            <title><![CDATA[寒天雪水：DZ Dozy《水》]]></title>
            <link>https://jadeinthe852.medium.com/%E5%AF%92%E5%A4%A9%E9%9B%AA%E6%B0%B4-dz-dozy-%E6%B0%B4-23e827511049?source=rss-361acbe4b84a------2</link>
            <guid isPermaLink="false">https://medium.com/p/23e827511049</guid>
            <category><![CDATA[dz-dozy]]></category>
            <category><![CDATA[反送中]]></category>
            <category><![CDATA[香港反送中]]></category>
            <category><![CDATA[852rap]]></category>
            <category><![CDATA[死因存疑]]></category>
            <dc:creator><![CDATA[Jade in the 852]]></dc:creator>
            <pubDate>Wed, 13 Jan 2021 12:45:48 GMT</pubDate>
            <atom:updated>2021-01-25T02:49:37.651Z</atom:updated>
            <content:encoded><![CDATA[<h3>浪裡溶鹽，霧中埋冰：DZ Dozy《水》</h3><iframe src="https://cdn.embedly.com/widgets/media.html?src=https%3A%2F%2Fwww.youtube.com%2Fembed%2FwHiij_puVNk%3Ffeature%3Doembed&amp;display_name=YouTube&amp;url=https%3A%2F%2Fwww.youtube.com%2Fwatch%3Fv%3DwHiij_puVNk&amp;image=https%3A%2F%2Fi.ytimg.com%2Fvi%2FwHiij_puVNk%2Fhqdefault.jpg&amp;key=a19fcc184b9711e1b4764040d3dc5c07&amp;type=text%2Fhtml&amp;schema=youtube" width="854" height="480" frameborder="0" scrolling="no"><a href="https://medium.com/media/77b205f34a3a85fbb7b0915a33111d65/href">https://medium.com/media/77b205f34a3a85fbb7b0915a33111d65/href</a></iframe><p>2021年1月9號，寒意深。</p><p>西九法院行返去長沙灣，要過馬路，過地盤，再上天橋。要行一陣，無咩人。如果係日頭，天橋會有枝葉同欄杆嘅斜影融為一體，但夜晚9點，好黑，只有單薄嘅光同薄脆嘅靜。</p><p>29日嘅研訊結束，好似反而令告別哽喺喉頭。</p><p>陪審團主席講「死因存疑」嘅口吻不愠不火。佢克禮自持咁擺低呢四個字，好似鬆一手啞黑鉛珠，鈍重落地，然後碌走，我只可以狼狽咁追過去、試圖撿拾。「死因存疑」。未知會碌往「非法被殺」與「死於意外」兩端之間咩位置。唔會反光嘅冷硬，灌滿疑團嘅重，溶成夜晚 — — 最少當下我，無法把握。事發經過差8秒關鍵未能還原嘅空虛好深、好沉，記者最後問，會否民事索償物業管理公司，告警示不足，關於後續嘅問句就好似碎石投入黑海，迅速沉沒。</p><p>關於苦痛、哀傷、不甘、不捨，望住挺立嘅周生，我不敢妄言。</p><p>口罩邊仲留有些微濕氣，靜謐中我諗起Dozy嘅《水》：「死因嘅謎底／遺留喺你嘅遺體」，諗起陳同學，諗起沙嶺嘅山坡，諗起 — — 其實無從諗起只可以模糊咁感應，甚至無法記認嘅傷逝。</p><p>《水》喺2020年3月30日發佈，係Dozy由稻糠改名DZ Dozy後嘅第一首歌，都記得係第一次聽Dozy唱歌，melodic嘅新嘗試為呢首歌打落抒情嘅底蘊。比起前作《666》同《ɹǝʞoᒋ》對極權傲然宣戰，《武可夷》代入警察暴虐無恥大放厥詞，《水》返到抗爭者內在，憂愁低迴咁吟頌手足嘅犧牲。</p><p>Beat由副歌sample嘅女聲漸大做引入，verse中再交織住女聲反覆哼唱嘅apart，雖係韓國所出原beat嘅設計，但喺《水》一曲中，正正扣緊分離嘅創痛。背景混入但難以聽清嘅歌詞仲有A monster me/Then I fade just like violence，sample原曲出自愛爾蘭獨立音樂人Tolas嘅Your Love Is An Island，空靈憂鬱咁開始，臨尾層層遞加成令人頭暈迷失嘅龍捲風又平息，講難圓之愛中位於崩潰邊緣嘅一方嘅獻祭式示忠，如穿鑿成對革命理想中得唔到回應嘅群眾嘅吶喊，或者亦算無心插柳嘅相連。</p><p>Dozy呢首flow相對平，感情內斂，正好留意佢拿手嘅詞：3段verse，水嘅含意同形態喺字裡行間變幻，一層層意韻打開，為手足悼亡，亦同大家一齊感受同梳通傷痛。</p><blockquote>「空中飄浮 二百萬滴小水點</blockquote><blockquote>各有要求 各有目標 冷漠嘅嘴臉</blockquote><blockquote>去年夏天 行雷閃電 伸手五指不見</blockquote><blockquote>我哋團結一致 凝聚成白雲一片</blockquote><blockquote>上天大發雷霆 判晒我哋有罪名</blockquote><blockquote>令到半睡半醒嘅同類都被喚醒</blockquote><blockquote>醍醐灌頂 我哋由天堂逃離到地面</blockquote><blockquote>狂風暴雨 我哋嘅理念依然未變</blockquote><blockquote>一片潮水 喺街上共同進退」</blockquote><p>Verse 1，神話開場，用一系列天氣同帶神話色彩嘅意象寫香港人意志交融，投身革命。雲聚前本係各自為政嘅二百萬滴伶佇水點，但喺極權狂暴嘅暗夜中，我哋覺醒匯聚成「白雲」，濁中自清。天堂不察愁苦，本茫茫然相安，偏要逃離到充滿劫數嘅地面，正如2019夏天，大家由偷安到決意挺身抗爭，思想嗰一躍而下。水猛落而成暴雨，再衝破一切壩堰匯成「潮水」席捲街頭，一體而不分你我，抗衡港共始料未及受忤逆怒吼而成嘅電閃雷鳴，是以風雲變色，「狂風暴雨」，社會一夜劇變。呢節，天上地下，滂薄壯闊，正記低當初志氣。</p><blockquote>「失眠憔悴 血汗淚水 抗爭嘅證據</blockquote><blockquote>應該點應對 當你不斷比人踐踏</blockquote><blockquote>用鐵鞋將你輾壓 盡情欺壓</blockquote><blockquote>你嘅身體 已經蒸發成霧氣</blockquote><blockquote>你嘅怒氣 雪藏喺冰格埋喺墓地</blockquote><blockquote>一聲不發 你選擇離開傷心地</blockquote><blockquote>將心比己 我明白你點解想死」</blockquote><p>但捨身成人，就要歷人間苦難，從此透入血汗淚水。「踐踏」、「輾壓」、「欺壓」，入聲步步進逼，針對既係「你」，亦係「我」；政權加諸太多侮辱，太多憤怒，太多悲哀，太多失望，如何消化 — — Verse 1最後獻俾以死相諫嘅諸位手足：「將心比己 我明白你點解想死」，正因曾同悲同怒，曾注視同一深淵，最終異途，更痛。因為死，肉體消散無形散成霧氣，返化為淨水，融入大氣。但怒氣留低有形，雪成冰，有棱亦有角，凍到燙手，承傳不滅。</p><blockquote>「Maybe we are water and this is all salt</blockquote><blockquote>Though it never happened</blockquote><blockquote>It tears us apart, apart</blockquote><blockquote>Maybe we are water and this is all salt</blockquote><blockquote>Though it never happened</blockquote><blockquote>It tears us apart, apart」</blockquote><p>副歌迷離，重申「我哋」與「水」嘅相通，水成雲，化雨又化成潮湧，沖刷香港安穩假象之時，手足辭世嘅事實令淚乾成鹽，溶入水、溶入香港人嘅意識，再難分離，都將呢片水、呢個身份，染得苦澀：「真正連結香港人嘅，係痛苦」。手足從未真正遠離如霧縈懷，意志長存似冰堅，但死亡，畢竟將我哋分開，令我哋身心痛極欲裂。溫柔反覆嘅對唱，似有手足軟語相慰，而Dozy時而夾一句喃喃覆讀，又仿似生者梳理創傷時嘅傾吐。</p><blockquote>「點解咁好心地 要咁早經歷生死</blockquote><blockquote>每日喺街上力歇筋疲 換嚟同摯親骨肉分離</blockquote><blockquote>如今你 人潮中 無再露面</blockquote><blockquote>我哋喺一個路面 獻上白花 為你悼念」</blockquote><p>Verse 1末拋出突然嘅別離，而verse 2將我哋帶到一場路祭現場，喃喃拒抗，難以接受箇中人世無理不公。死亡嘅殘忍，就係「如今你 人潮中 無再露面」。人山人海，點可以斷言你一定唔在場？明明，你本應同大家一齊，一如我。我搜索你嘅身影，但心知，你唔會再可以到來。</p><blockquote>「死因嘅謎底 遺留喺你嘅遺體</blockquote><blockquote>你嘅眼罩頭盔 依舊喺你衣櫃底</blockquote><blockquote>屋企人喊到跪低 再見要等第二世</blockquote><blockquote>但呢一世 佢哋會為你感到自豪光輝</blockquote><blockquote>放低一切 撥開雲霧 夢回天國</blockquote><blockquote>經過波折嘅一世 放鬆你沉重嘅肩膀</blockquote><blockquote>為呢片土地改革 我會繼承你嘅想法</blockquote><blockquote>街上識嘅鄉客 講聲再見 陰陽相隔</blockquote><blockquote>你與世長辭 喚醒無數人嘅良知</blockquote><blockquote>我一直嘗試 但抆唔走心中呢條刺</blockquote><blockquote>去到幾時 先可以 沉冤得雪</blockquote><blockquote>為你做到嘅唔多 只好寫驪歌一闕」</blockquote><p>猶記第一次聽時，猝不及防被「你嘅眼罩頭盔 依舊喺你衣櫃底」拮喊。細節太過真實，嗰種無法聲張嘅蓄勢待發，至此，唔會再有機會實現，一切理想，一切憧憬，都化為煙霧。「感到自豪光輝」，亦難平家人苦楚，只好幻想你回到天國，再無波折痛苦。</p><p>寒天飲雪水，冷暖自知，縱然心中湧動自我安慰與未能釋懷嘅角力，即使痛苦與疑竇始終係心中刺，都可能可以慢慢與哀傷共存，亦要面對自己嘅無力：「為你做到嘅唔多」，然後轉化為動能：「只好寫驪歌一闕」 — — 因為想抒解，想悼念，更為銘記。</p><blockquote>「窗邊一點點雨水 你一串串語句</blockquote><blockquote>潮汐漲退 終有一日會再相聚</blockquote><blockquote>想你安睡 我哋打開心內嘅繩結</blockquote><blockquote>等你天上再凝結 春回天地將你迎接</blockquote><blockquote>窗邊一點點雨水 你一串串語句</blockquote><blockquote>潮汐漲退 終有一日會再相聚</blockquote><blockquote>想你安睡 我哋打開心內嘅繩結</blockquote><blockquote>等你天上再凝結</blockquote><blockquote>我哋將你迎接」</blockquote><p>此刻，一貫簡單嘅歌曲visual當中巧思就顯現，music gif嘅灰階細雨敲窗，連同明明滅滅燭光，除咗mood setting，亦呼應歌詞，配合字幕effect雨痕一樣嘅斑駁cross fade，將大家帶入最後綿綿不斷帶哀思嘅細雨。窗外嘅雨係咪凝有你嘅霧？雨敲窗，又記起你音容。雖知生命與水循環如自然生生不息，但又知呢刻雨，未有你；因你正於天上看顧。潮汐漲退，自然定理；街上黑潮，會退，亦當然會再起不懈，要驅走暴風閃電，等春回大地，生機勃勃，一切翻新，雪融而真相水落石出，你好安眠。</p><p>到某日，雨綿綿中，你會再落到人間，因為我哋榮光當中，必有你。</p><blockquote>空中飄浮 二百萬滴小水點</blockquote><blockquote>各有要求 各有目標 冷漠嘅嘴臉</blockquote><blockquote>去年夏天 行雷閃電 伸手五指不見</blockquote><blockquote>我哋團結一致 凝聚成白雲一片</blockquote><blockquote>上天大發雷霆 判晒我哋有罪名</blockquote><blockquote>令到半睡半醒嘅同類都被喚醒</blockquote><blockquote>醍醐灌頂 我哋由天堂逃離到地面</blockquote><blockquote>狂風暴雨 我哋嘅理念依然未變</blockquote><blockquote>一片潮水 喺街上共同進退</blockquote><blockquote>失眠憔悴 血汗淚水 抗爭嘅證據</blockquote><blockquote>應該點應對 當你不斷比人踐踏</blockquote><blockquote>用鐵鞋將你輾壓 盡情欺壓</blockquote><blockquote>你嘅身體 已經蒸發成霧氣</blockquote><blockquote>你嘅怒氣 雪藏喺冰格埋喺墓地</blockquote><blockquote>一聲不發 你選擇離開傷心地</blockquote><blockquote>將心比己 我明白你點解想死</blockquote><blockquote>Maybe we are water and this is all salt</blockquote><blockquote>Though it never happened</blockquote><blockquote>It tears us apart, apart</blockquote><blockquote>Maybe we are water and this is all salt</blockquote><blockquote>Though it never happened</blockquote><blockquote>It tears us apart, apart</blockquote><blockquote>點解咁好心地 要咁早經歷生死</blockquote><blockquote>每日喺街上力歇筋疲 換嚟同摯親骨肉分離</blockquote><blockquote>如今你 人潮中 無再露面</blockquote><blockquote>我哋喺一個路面 獻上白花 為你悼念</blockquote><blockquote>死因嘅謎底 遺留喺你嘅遺體</blockquote><blockquote>你嘅眼罩頭盔 依舊喺你衣櫃底</blockquote><blockquote>屋企人喊到跪低 再見要等第二世</blockquote><blockquote>但呢一世 佢哋會為你感到自豪光輝</blockquote><blockquote>放低一切 撥開雲霧 夢回天國</blockquote><blockquote>經過波折嘅一世 放鬆你沉重嘅肩膀</blockquote><blockquote>為呢片土地改革 我會繼承你嘅想法</blockquote><blockquote>街上識嘅鄉客 講聲再見 陰陽相隔</blockquote><blockquote>你與世長辭 喚醒無數人嘅良知</blockquote><blockquote>我一直嘗試 但抆唔走心中呢條刺</blockquote><blockquote>去到幾時 先可以 沉冤得雪</blockquote><blockquote>為你做到嘅唔多 只好寫驪歌一闕</blockquote><blockquote>Maybe we are water and this is all salt</blockquote><blockquote>Though it never happened</blockquote><blockquote>It tears us apart, apart</blockquote><blockquote>Maybe we are water and this is all salt</blockquote><blockquote>Though it never happened</blockquote><blockquote>It tears us apart, apart</blockquote><blockquote>窗邊一點點雨水 你一串串語句</blockquote><blockquote>潮汐漲退 終有一日會再相聚</blockquote><blockquote>想你安睡 我哋打開心內嘅繩結</blockquote><blockquote>等你天上再凝結 春回天地將你迎接</blockquote><blockquote>窗邊一點點雨水 你一串串語句</blockquote><blockquote>潮汐漲退 終有一日會再相聚</blockquote><blockquote>想你安睡 我哋打開心內嘅繩結</blockquote><blockquote>等你天上再凝結</blockquote><blockquote>我哋將你迎接</blockquote><img src="https://medium.com/_/stat?event=post.clientViewed&referrerSource=full_rss&postId=23e827511049" width="1" height="1" alt="">]]></content:encoded>
        </item>
        <item>
            <title><![CDATA[20210109 寒天雪水]]></title>
            <link>https://jadeinthe852.medium.com/20210109-%E5%AF%92%E5%A4%A9%E9%9B%AA%E6%B0%B4-441b03afe24d?source=rss-361acbe4b84a------2</link>
            <guid isPermaLink="false">https://medium.com/p/441b03afe24d</guid>
            <category><![CDATA[周梓樂]]></category>
            <category><![CDATA[反送中]]></category>
            <category><![CDATA[死因存疑]]></category>
            <category><![CDATA[香港]]></category>
            <category><![CDATA[香港反送中]]></category>
            <dc:creator><![CDATA[Jade in the 852]]></dc:creator>
            <pubDate>Mon, 11 Jan 2021 09:43:17 GMT</pubDate>
            <atom:updated>2021-01-25T03:36:26.173Z</atom:updated>
            <content:encoded><![CDATA[<p>2021年1月9號，寒意烈，夜晚好黑。唔覺有風一波波刮，香港濕凍縈繞，好似天地就係冷硬如是。</p><p>西九龍法院8樓走廊空氣沉而穆然。人好多。櫈封咗一半，無得坐嘅大家，就企。朝早7點已有人輪候開庭，而我夜晚7點先到，甚覺自己取巧且可恥。旁聽人士一區，有人瞓著，大家默默，記者一區，忙於準備整合稿，或一邊漫談。朋友同我講，佢未食晚飯。隔離嘅記者叫同事慳住用powerbank。大家嘅不離之中有坐立都不適但又不願干休嘅執拗，時間因此更加滯重。</p><p>7點半，再開庭，可坐約半百人嘅公眾旁聽房8成滿，3個應係因聽審而相識嘅叔叔姨姨將我圍住。佢哋討論林鄭任期得返一年（快啲落台），離任一定會被清算（有消息話一早不滿俾個女人做，仲搞到咁），但下個一定更差 — — 高法官坐低，閒談漸休，房入面慢慢安靜。</p><p>宣讀裁決嘅方式，係高法官與陪審團主席一問一答，問嘅係一份文件嘅分項，好簡短，數字，字母，項目名，而每一答，扼要俐落。</p><p>姓名（周梓樂；「嗰個係我個仔周梓樂」）。</p><p>性別（男性）。</p><p>出生日期（1997年，8月13日；1997年。同我同年。朋友曾話，呀，原來梓樂係夏天出世嘅獅子仔。而家係冬天。上個夏天，我哋猶未知曉）。</p><p>地址（陪審團主席讀出完整地址；我無法想像，今日周生周太返屋企嘅心情。置業想安居嘅所在，係曾經幫梓樂寫喺學生手冊嘅地址，喺佢嘅學生相隔離）。</p><p>職業（大學學生；大學英文老師話，除咗走過頭兩堂，專心唔多言，group proj準時交。我唔知係咩嘅投球隊校隊成員，上咗莊，打後防，團體照入面企後排邊邊，眼窩深深，臉尖鼻高，嘴唇輕輕抿住，又未到笑。諗起病院外，簇擁住朋友同學）。</p><p>死亡日期（2019年11月8日）。</p><p>地點（伊利沙白醫院）。</p><p>致命傷勢（頭部受傷）。</p><p>受傷時間（2019年11月4日約1時；約10分鐘前，佢message父母，提閂窗。凌晨2點，朋友敲響家門，告知出事。4號起身初見新聞時，只講墮樓，我嗰時確信，會好，香港人有旨意看顧，就算心口被轟一槍，仍然命大。直到5號，消息紛陳又各自破解，但總之係講：命危）。</p><p>受傷地點（將軍澳尚德邨停車場A；嗰時我以為尚德同廣明係兩個地方，至今我仍時時喺停車場行錯路，唯一記認係圍幕與突然多cam）。</p><p>受傷情況（高處墮下）。</p><p>我以為係匯報討論前先核對資料，就似醫生問診前嘅確認 — — 但原來，都已經係裁判嘅一部份。關乎記憶、溫度、生活、愛惡嘅生命，被意外剝離壓平成最後簡要嘅事實對答。</p><p>然後，就只差結論。</p><p>結論唔一致，比數係4比1：「死因存疑」。</p><p>姨姨吃吃笑：「我都話咗會係存疑啦。」</p><p>叔叔答：「應該係謀害喇。」</p><p>姨姨仍笑：「我好想知，4比1，個1係邊個？」</p><p>叔叔答：「最老嗰個吧。」</p><p>「都話唔定。老咗思維比較固定，唔會太諗⋯⋯」</p><p>「都唔係嘅，有老有嫩⋯⋯」</p><p>另一位姨姨大聲噓佢哋一聲。</p><p>我睇唔清家屬席嘅動靜。忽然，結論已定，哪怕無人釋懷，哪怕反更懸而未決。</p><p>「死因研訊的主要作用，是通過公開聽證，希望能得知有關死亡的真相，務求在適當的個案中提出切實可行的建議， 以期防止類似死亡事故。研訊另有一個重要的功能，是希望家人能夠在研訊過程中，親眼見到證人作供，親耳聽到證人的證詞，從而希望對於親人的死亡，能夠釋懷。」《死因裁判官報告》如是說。所以建議係更新閉路電視系統，以及3樓加欄加警示。及後安排證物去向。除停車場模型都交還父母。作為遺物。大家心入面想被解開嘅結，關於時局、疑竇，或眾人利害，都略過。並唔係死因庭嘅責任。以後，周同學會成為報告入面，其中一條。</p><p>周生周太出𨋢時，閃光燈炸開。周太難得開聲。周生依然先喺法庭門口企好，俾夠鏡頭，再行近記者群，有問必答。唯一唔同係，今日周生手捉緊背囊帶，之前好似會插袋。都唔係一直咁舉重若輕。諗起周生講，8號朝早討論搶救時，激動嘅係佢，係周太同醫生傾。如今鎮靜，令人不忍到佩服。</p><p>大家講嘢都俾風與距離吞到無聲，我一個外人，喺攝影機間隙中窺望，經直播聽。定睛想睇周生會唔會著Enjoy或Hope；今日內襯係黑色羽絨。經已太凍。</p><p>「我覺得我同嗰仔講嘅就係話，我哋兩個已經盡晒力啦，個真相⋯⋯」</p><p>所聽與所見有時差又有間距，聽到哽咽時急急再望，周先生眼神堅毅如故。「真相仲爭少少囉，好似法官講。」</p><p>周生語調一貫沉穩又謙和。多謝陪審團，多謝記者，多謝朋友，多謝律師，多謝關心事件嘅人。遠超想像嘅痛、攰、凍中，周生講嘅，仍然係多謝。</p><p>記者變換字眼問感想，周生反覆答：「盡晒力」。</p><p>（開庭第一日，周生話：「想為兒子盡少少力，可以安息。」）</p><p>記起周生公開電話呼籲，記起逐個現身嘅證人。證人蒙生講，「比起協助非同路人，我會選擇顧及自己和家人安全為先」。2019到2020，社會籠罩恐懼，失去激烈又或偷安嘅自由，而2021，只有更壞。</p><p>陰霾之中，大家都盡力回憶，拼湊當晚全貌，而政治不時喺眾人思考中闖入，無法拒諸門外。警察脫口講出「暴徒」，發現周同學嘅崔生坦言諗過好無講得對警方不利。各種拉扯中，高法官講，我哋已經差唔多接近真相。</p><p>崔生話：「與其讓生命放在一個假象之下記載，不如賦予它真相。如實記錄，好像才是對他最尊重的方式。」</p><p>周生話：「個真相唔一定要係俾人謀害，係意外都得，可以無乜疑點底下去成立真相嘅事實出嚟，我覺得咁就OK。」</p><p>要知道幾秒「發生咩事」嘅事實，竟係如此難，挖到痛極，都未償；就係幾秒空白，未能填補。如論「真相」，又能否兜過背景：呢場，係2019年抗爭中嘅未解死亡。但要追究，可以追到幾深？嗰一刻未明，填滿再溢出香港人嘅恨與疑，與無法再信。挖到最底，就算剔去漫天想像與指控，都可恨極權可憎，恨警察蒙心，恨如果當日無衝突，點會有呢場墮樓 — — 呢場死成為香港嘅疑雲，大家喺影下，無力回天。</p><p>但雲會透光，周家嘅決心、證人嘅勇敢與思考，制度壓唔住嘅認真與同理關懷，都係呢29日以嚟穿透厚雲嘅暖意 — — 同埋對所信之事嘅信念，要由我哋一齊捍衛。</p><p>尤記上個冬日，有日平日經過十字路口祭壇，身邊人努力打響應已用乾嘅火槍，喺猛風中要點著蠟燭，只因想壇前燭火不滅。如是明知無補於事，微小，但堅持。最後點著兩支，燭光暖融。</p><p>又有月8號，祭壇燭火跳動明滅，一片暖意，而我躊躇不前。我憑咩悼念呢，明明只係陌生人；就似禱告，我已經離神咁遠，又憑咩厚臉皮打搞問周同學喺佢手中過得好唔好。老實講，至今仍覺理虧又突兀，但當第一次由街坊手中接蠟燭，一汪蠟油似水，手一震，流落我另一隻手手背，唔熱唔痛，乾喺我皮上，嗰一刻忽明，我胸口都積有晃蕩嘅惶然同傷感，為我與周同學其實陌生嘅接近，為我身邊人與周同學嘅關聯，為周同學與所有人嘅相通。（有日研訊，公開TG報哨訊息，見到時好似蠟油打瀉，巴士上痛哭出聲。我明明以為，已經最少半乾。）近日大家都講結衣BB，不期然諗，如果周同學都有份睇咁幾好。素不相識，竟不時掛念。況且至親。</p><p>昨日1月8日，第14個月，尚德十字路口駐更重防。祭壇不復再，只有地下半殘燭印，但停車場二樓確曾有無數紙鶴遇風低語，十字路口確曾流過靜默人潮，而周同學確曾喺停車場為大家共同嘅信念疾走過，奔向我哋未能知悉嘅所往。因此未來就算未明，我哋仍要繼續行走，繼續對抗。為從未一秒想折返嘅人，為有一日，沉冤可雪。</p><p>延伸閱讀：<a href="https://www.thestandnews.com/politics/%E8%B5%B0%E9%80%B2%E5%91%A8%E6%A2%93%E6%A8%82%E4%B9%8B%E6%AD%BB-2-%E4%B8%80%E5%80%8B%E9%A6%99%E6%B8%AF%E9%9D%92%E5%B9%B4%E6%AE%9E%E8%90%BD-%E5%92%8C%E5%AE%83%E6%92%95%E9%96%8B%E7%9A%84%E6%99%82%E4%BB%A3%E5%82%B7%E5%8F%A3/?fbclid=IwAR1glKkyDfM-q9lBoWuurkLgWjHzOTNNAe4qZa62G5juJbmq7mPt7v4TK8c">【走進周梓樂之死．2】一個香港青年殞落，和它撕開的時代傷口</a>（立場新聞）</p><img src="https://medium.com/_/stat?event=post.clientViewed&referrerSource=full_rss&postId=441b03afe24d" width="1" height="1" alt="">]]></content:encoded>
        </item>
        <item>
            <title><![CDATA[月球下的人（上）]]></title>
            <link>https://jadeinthe852.medium.com/%E6%9C%88%E7%90%83%E4%B8%8B%E7%9A%84%E4%BA%BA-%E4%B8%8A-e353b20d97a1?source=rss-361acbe4b84a------2</link>
            <guid isPermaLink="false">https://medium.com/p/e353b20d97a1</guid>
            <category><![CDATA[二橋]]></category>
            <category><![CDATA[警暴]]></category>
            <category><![CDATA[中文大學]]></category>
            <category><![CDATA[香港反送中]]></category>
            <category><![CDATA[反送中]]></category>
            <dc:creator><![CDATA[Jade in the 852]]></dc:creator>
            <pubDate>Sat, 21 Nov 2020 04:03:30 GMT</pubDate>
            <atom:updated>2020-11-21T04:30:24.686Z</atom:updated>
            <content:encoded><![CDATA[<p>（二零一九年十一月十二號，夜晚十點前。）</p><p>黄花雨時時諗起嗰一晚。圓月夜。火光干雲落彈雨，濃煙滿天蔽月光。素未謀面嘅手足喺自己手邊，咳，咳到全身抽搐嘔出胃液，一條懸絲，喉嚨吊到唇邊，晃晃蕩蕩，直到俾引力扯斷，掛落腳下枯草。</p><p>半透明嘅黏液痴滿橋口烈火嘅碎光。</p><p>嗰條閃光細絲，好似蜘蛛絲，將黄花雨五花大綁。</p><p>應該要爭分奪秒。但黄花雨失神，好多秒。只想縮起自己喊。</p><p>但戰場上眼淚無用。不應有淚。</p><p>但呢度係中大。佢屋企。</p><p>–</p><p>每次有手足不勝濃煙由二橋回撒，都要穿過濃煙，漸漸現形。踉踉蹌蹌，一步一步，越近越睇得清鏡頭嘅勇武filter濾走咗嘅脆弱。</p><p>首先會見到火光鑲邊嘅輪廓。然後係蒙灰嘅身影。最後，如果唔係戴住鍍膜泳鏡滑雪鏡，就會見到一對睫毛，底下不斷湧淚。睇到一絲眼仁都係奢侈。</p><p>二號橋同大路垂直成T字，交界作為前線，白煙濃到不能視物，只靠火光辨方位，每發子彈都首當其衝，仍人頭湧湧，大家前赴後繼。T字頂連住一方可泊十數架車嘅露天停車場，穿過可到單程橫路，有樓梯通向網球場、gym同運動場，相比尚算平靜。</p><p>黄花雨跟FA喺停車場戒備，身邊有滅煙隊遮陣同討論中彈有無得claim工傷嘅開live記者。聽到聲息，輪廓初見，FA就一組衝前。接人。扶去後排。沖眼洗臉冰敷洗傷口。</p><p>其實都只係止痛，聊勝於無。真正嘅痛已經刻入骨肉沉入靈魂。黄花雨心知。</p><p>有時返嚟嘅人有人扶住㩒住扯去後排休息。而更多時候，一個人返嚟，沖一沖眼，洗一洗臉，又撞向厚重嘅煙牆。義無反顧。</p><p>好多人要撒隆巴斯。屌腳踎到好撚痛。好多人唔願洗傷口。喂唔好嘥時間啦。郁兩郁又甩。黄花雨想像汗混合催淚結晶醃住大家傷口，頭皮發麻，只好又氹又唉，快手將醫療膠紙兜多兩個圈。</p><p>整親係要唞㗎。黄花雨細聲講。手足聽到失笑。佢都笑。兩個人都笑。短短苦苦嘅笑。夜空染橙色，好似不祥末日。</p><p>有人嗌，有記者眼中彈，問佢問題答非所問。人湧去。黄花雨忍住望嘅衝動，快手收好紗布膠紙，跟住彈起嘅手足又跑返去交界。</p><p>又一個手足瘦弱嘅身影跌跌撞撞由濃煙中現形。</p><p>可能係上一輪催淚彈太密太應，其他FA未返得切上前。附近無其他FA。</p><p>黄花雨咬牙一個人跑過去，越近橋頭，越白濁無光，眼越痛。戴軍嘴嘅FA會直接踩入煙接人。但黄花雨眼罩唔防煙。愧對手足，要佢哋一個人忍痛摸黑行。本來可以陪住佢哋。早廿步。</p><p>黄花雨喺霧薄處伸手，穿過手足腋下半揹，高佢一個頭嘅男人就咁冧喺佢身上。如此沉重，一個人。手足臉撞佢雙罐防毒面具，一下壓歪佢頭盔。黄花雨由四條柱狂奔落橋時隨手執，有一邊Y帶扣唔緊。手足嘅低嚎帶哭腔，透空氣又透肉透骨，震響黄花雨大腦。</p><p>黃花雨反手拖住手足，好似一場殘忍嘅蒙眼越野夜路試膽。手足鉗緊佢五指，手心所及，汗流如漿，如入泥濘。</p><p>將手足半托半拖帶到停車場中後，聽得肩上人單罐防毒面具入面壓住咳聲鼻水聲，又見攻勢稍緩，決定除低手足眼罩，沖眼。</p><p>無需多言，手足自覺側頭。扭成九十度，鹽水就唔會流落豬嘴。水柱一落，見到眼皮下眼珠翻白震顫。鹽水一點點掛喺睫毛間。</p><p>對眼咁靚。蒙臉嘅大家都有最清澈明亮嘅眼。黄花雨心中酸楚，又諗起麥展風，放軟聲：好快唔痛。無事㗎。會無事㗎。</p><p>無事。無事。點樣先叫無事？唔會死，但痛，唔知幾時可以完。側左。側右。鹽水滑過太陽穴流入髮鬢。手足正要開眼，黄花雨解開佢防毒面具要沖臉。</p><p>一念之差。</p><p>黄花雨忘記，催淚彈甚至射過入運動場。</p><p>遠方火光後突然似一機爆谷爆開。碰碰碰碰。數唔清幾多響。</p><p>其中一粒催淚彈橫空飛跌兩人腳下。</p><p>手足狂咳。</p><p>滅煙隊湧過嚟，夾彈入水袋。濃稠白煙纏繞唔散。</p><p>黃花雨眼內起火，涕淚奔流。</p><p>眼鼻喉所有黏膜都痛，最痛係羞愧。確保現場環境安全。急救第一堂第一節第一句。低級錯誤。</p><p>濛成一灘嘅視線中見到手足臉垂落，鼻水眼水口水喺空中匯流，拉絲發光。</p><p>黄花雨想幫佢抹嘴，但大家全身衣物早就索滿催淚煙。將防毒面具㩒返上佢塊臉，想帶佢行，手足一手揮開，蜷身又大聲嘔吐，但淨係嘔得出半透胃液。</p><p>一條細線喺火光與煙霧與熱風中晃盪。</p><p>好似斷落嘅蜘蛛絲。</p><p>黃花雨嘅胃隨佢越發空洞嘅乾嘔聲一下一下抽緊。</p><p>黄花雨死命拉。肩上人沉重而拒抗。黄花雨知佢痛。黄花雨都全身發痛，心臟漲裂到想流真正嘅眼淚。但如果喊，就似乎示弱，一切會再無法忍受。</p><p>如果可以，黄花雨想所有痛都由自己承受。所有。但大家都喺地獄，痛苦嘅總和係無限。點分都唔會減輕。</p><p>另一位FA衝前扶走手足。臨別終於微微開眼，望黄花雨。眼神怨憤又決絕。馬上就轉開。黄花雨不能言語，只能搖頭，眼水一直由眼眶流落防毒面罩邊，積水沁濕臉頰。</p><p>有FA嚟拉黄花雨，手穿過佢腋下將佢半揹起，行得好快。到後方其實不過十幾步，光線暈暗，忙亂空氣中隱約有秋天應有嘅涼爽。側頭，鹽水，眨眼，紗布印乾。</p><p>眼水止住。可以重新呼吸。但黄花雨更想喊。</p><p>無膽上前線，做後勤又累人。</p><p>現場環境要安全。但邊到可以搵到無煙霧。</p><p>黃花雨諗，地獄就係咁。佢嘅中大起烽煙變戰地，佢珍惜嘅人一早被逼從軍征。</p><p>而實情係，佢無辦法阻止，無力守護任何嘢。</p><p>手足半開眼，眼神怨憤又決絕。</p><p>甚至連他人信任都辜負。</p><p>佢呆企不過十幾秒，眼前就有十幾廿人來來回回。佢隔離大家傾緊call白車。但交通全面癱瘓。</p><p>眼淚無用。要喊嘅話應該返屋企。</p><p>但中大就係佢屋企。日日夜夜。知識。做人。感情。回憶。港灣。全部全部。</p><p>黄花雨覺得心同腦都被扯開兩邊。對自己無能嘅憎惡好似鐵釘直插入已經支離嘅意識。</p><p>佢企喺後排路邊，等人過嚟就接應，洗眼洗臉洗傷口包扎。洗走眼淚洗走血，永無止盡。唔知呢場惡夢點樣先可以醒。沖眼洗臉冰敷洗傷口。</p><p>豬嘴下係tutor、大O mate、hallmate，仲有好多人面善。但今晚知識同情誼都失效。大家結成一體意志山海不可平，但肉身仍未超脫，如此確鑿而卑微。大家只能夠獨自面對自己嘅命運。所有痛傷甚至死，都只屬自己。月球為證，人從古到今都一樣渺小。</p><p>有FA問黄花雨要冰袋。佢呆呆滯滯遞過，諗諗吓又跟住跑過去。</p><p>俾人扶過嚟嘅手足單住一隻腳，嘶嚎不止。唔緊要啦今朝已經係咁我無事。我兄弟喺出面。我要返出去。今朝roommate俾人拉我點解仲喺度。段崇智同班高層所謂談判 – —</p><p>幾個男人默默無語，將佢㩒低喺路邊。佢腳踝腫到手擺近就感受到熱氣。FA話已經見佢第三次。敷一敷冰又走返出去。唔知佢點忍。</p><p>手足掙扎。把聲屈住喺粉蓋雙罐防毒面具入面，嘶啞不堪聽。我兄弟仲係出面呀仲係出面出面唔得啦我 – —</p><p>黄花雨不忍，跪低，雙手兜過佢頸，將佢抱住。</p><p>手足全身一震，忽然無力，臉撞落黄花雨肩背，痛哭失聲。</p><p>良久手足終於震住吐出一句：</p><p>我好無用。</p><p>佢頭墊住黄花雨肩，佩甲嘅心口上下起伏，戴防割手套嘅手握成拳，不住捶地。</p><p>我好無用。</p><p>辛苦你。</p><p>黄花雨感覺到兩個人緊貼嘅心臟無助狂跳，眼淚終於湧出眼眶。</p><p>我好無用。反反覆覆，似緊箍咒。</p><p>黄花雨將手收得更加緊，呼氣，俾壓實佢心口嘅一句離口。</p><p>對唔住。好對唔住。</p><p>反而輪到手足慌亂。一收頹喪，小心翼翼。</p><p>大家都喺度。</p><p>我知。</p><p>眼淚縱橫，暗中閃光，又似另一品種嘅蜘蛛絲，爬滿每個人嘅臉，網羅所有悔疚、逞強、不甘、不安、怒怨。所有情緒往往混和化學刺激草草流出體內，又轉瞬被戰火蒸發。</p><p>大家趕赴戰場以卵擊石，為他人為信念變得堅強，將思緒同自我暫時全部鎖起，怕思考拖慢腳步，拘束手腳。</p><p>但掙破蛛網，黄花雨嘅動作先更加利落：</p><p>一切痛苦，生死邊緣，不過，想保家衞國。大家嘅理想國。精神鄉。寸土不讓。</p><p>寸土不讓。縱地獄亦同往。</p><img src="https://medium.com/_/stat?event=post.clientViewed&referrerSource=full_rss&postId=e353b20d97a1" width="1" height="1" alt="">]]></content:encoded>
        </item>
        <item>
            <title><![CDATA[DZ Dozy《登月》：浪漫到缺氧，時代太神傷]]></title>
            <link>https://jadeinthe852.medium.com/dz-dozy-%E7%99%BB%E6%9C%88-%E6%B5%AA%E6%BC%AB%E5%88%B0%E7%BC%BA%E6%B0%A7-%E6%99%82%E4%BB%A3%E5%A4%AA%E7%A5%9E%E5%82%B7-85c23ea3f448?source=rss-361acbe4b84a------2</link>
            <guid isPermaLink="false">https://medium.com/p/85c23ea3f448</guid>
            <category><![CDATA[dz-dozy]]></category>
            <category><![CDATA[香港rap]]></category>
            <category><![CDATA[香港音樂]]></category>
            <category><![CDATA[rap]]></category>
            <category><![CDATA[852rap]]></category>
            <dc:creator><![CDATA[Jade in the 852]]></dc:creator>
            <pubDate>Fri, 09 Oct 2020 23:44:44 GMT</pubDate>
            <atom:updated>2020-11-21T04:13:45.866Z</atom:updated>
            <content:encoded><![CDATA[<iframe src="https://cdn.embedly.com/widgets/media.html?src=https%3A%2F%2Fwww.youtube.com%2Fembed%2FWXrdNLhTUQw%3Ffeature%3Doembed&amp;display_name=YouTube&amp;url=https%3A%2F%2Fwww.youtube.com%2Fwatch%3Fv%3DWXrdNLhTUQw&amp;image=https%3A%2F%2Fi.ytimg.com%2Fvi%2FWXrdNLhTUQw%2Fhqdefault.jpg&amp;key=a19fcc184b9711e1b4764040d3dc5c07&amp;type=text%2Fhtml&amp;schema=youtube" width="854" height="480" frameborder="0" scrolling="no"><a href="https://medium.com/media/feec72561ab9927250227745ee49c549/href">https://medium.com/media/feec72561ab9927250227745ee49c549/href</a></iframe><p>「在這片星空裏 (升空去) ／去漫遊 (去漫遊 ) ／上月球 (上月球)」</p><p>含情七夕多，織女牛郎踩住喜鵲銀河相會時，Dozy都出咗佢第二首情歌《登月》，玩盡雙押工巧，幻想天邊，要同佢神女升仙。私奔到月球 — — 奇情到連太空都上埋，不過只為那無憂的真空；但點解人會幻想會追求，原因只得一個：因為得唔到。</p><p>現實嘅地心吸力，對念念不忘社會現況嘅Dozy嚟講，終究太重。</p><p>個Hook開得寫意，reverb大到飄飄渺渺，但到verse 1頭4個bar，即刻將你扯落返地面：</p><p>「你我生活喺地球／勞勞碌碌／都只係星斗</p><p>已經受夠／重重複複嘅／工作應酬</p><p>為買車／為買樓／做到嘔冇停手</p><p>講句嘢冇自由／唯有／搬去其他星球」</p><p>社會嘅陰影始終籠罩住首歌。嚮往宇宙，只因與之相對嘅地球／香港／現實生活太逼人。呢段押韻甚密而且一句比一句密集，用同一個最後音調會吊喺半空感覺空虛嘅au韻押咗11次，再加AABB疊字，急逼嘅韻律正正照見生活營營役役，而第4句「講句嘢冇自由／唯有」嘅長短相對同現實重量將壓逼感推到上高峰，後面長句嘅舒緩，無形就製造咗個逃生出口：「搬去其他星球」。「你」同「我」。</p><p>— — 在太空中兩人住。唔只想到此一遊。</p><p>「長相廝守／唔一定要買私樓</p><p>喺太空漂浮／我哋一樣係糖黐豆」</p><p>要搬就要搵住處，「廝守」對「私樓」中嘅自然生動實屬舉重若輕，輕輕一句就揮走香港地絕大部份有情人頭上嘅陰霾，下句再瓹返出去 — — 仲送你成個宇宙嘅浩瀚無垠，好大手筆。</p><p>「坐太空船／遊車河／一路哼住歌</p><p>夜夜笙歌／自由自在唔洗心多／wooo」</p><p>脫離社會重力自然無拘無束，之後嘅Verse都描寫緊太空生活輕鬆寫意，有時尾音快樂到唱埋，押韻都鬆返開。月球係遊樂場，全宇宙都係花前月下，超越四海為家嘅豪情以銀河為家，喺幻想入面一齊背棄物理又有乜好怕；真空中係相當地球日常嘅快樂逍遙。去到有另一套重力法則嘅太空，明明可以更奔放瀟灑，但當rapper想像嘅幸福都仍附於地球常規，僅僅換個舞台上演，就更顯現實嘅制肘。</p><p>如果無最後4個bar，文題大概就只係生活好苦但你要甜，今次《登月》詞甜之餘更由beat浸勻埋成段演繹，聽到我心跳加速神志不清（唔係誇飾，聽住我連打字都唔識，思緒都分崩離析）。</p><p>「每一刻鐘／跟你抱擁／喺太空中</p><p>好似后羿嫦娥／一齊生活喺月宮中」</p><p>Beat組成簡單，做引入外加貫穿全首嘅木結他聲悠閒而暖，配Dozy帶笑嘅柔情斯文聲，一首rap隱隱有營火邊自彈自唱嘅溫馨。Verse 1「你許願／希望將來個仔／係球星」中「將來」輕輕一失笑，直情有情人間喁喁細語嘅況味（又或係向旁人憶述點滴時嘅容光煥發又帶啲羞赧）。大家浸喺糖水入面，大概都仲享受到Verse 2仍然緊扣住太空意象，但發想較常見嘅示愛連環（好多流行曲都有相類寫法），無咁出彩，都仿佛可以原諒。</p><p>但甜到Verse 2尾段，厚過地幔嘅糖衣突然再裂開，冷不防流出現實嘅痛苦灼人。Dozy最後並無耽溺於較單薄嘅個人抒情，首歌由現實出發，喺虛幻中遨遊，最後揉合虛實真真安排一場冒險出逃，個人幻想作為面對沉重現實唯一而無力嘅對抗方式，於此苦澀地融入劇情：</p><p>「月球上風景好璀璨／太虛幻</p><p>地球我唔去返／後生仔比人當罪犯</p><p>人類不斷瘋傳／我哋偷走太空船</p><p>訊號中斷／登陸月球／開始公轉」</p><p>月球風景何以璀璨，岩士唐同嫦娥溝通會唔會好難，你終知原來不過係一場虛幻。今日殤港，地裂天崩當閒事嘅真空小世界已變傳說，因為大家都係港共眼中背負原罪嘅年輕人，而現實嘅毒氣，如此無孔不入。</p><p>Dozy有幾嚮往奔月，就有幾厭棄現實。情人終於決定成為partner in crime聯手對抗世俗，以犯罪實踐登月FF，擺脫「二百個未接來電」嘅囚籠，逃離人類荒謬 — —</p><p>然而最後，月球都仲圍住地球公轉。何處能忘憂？</p><p>「在這晚升空去／向上流／去漫遊／沒了氧氣以後／停奏」</p><p>第二節幾乎係戛然而止，坐上太空船後就直落唔夠氣的Outro漸弱到無聲。登月係最浪漫瑰麗嘅出逃，成真嘅同時亦係終結，注定窒息，悲劇告終。</p><p>現實痛苦尤自可，最絕望係連幻想都去唔盡，只有死路一條。一切都係反照，就如歌名叫登月，album art揀嘅相反而係月落。</p><p>人攀明月不可得。月宮畢竟廣寒不能居，〈登月〉嘅甜蓋唔過苦，粉紅色嘅糖蜜泡泡爆破後，浮出嘅係更冷硬嘅現實、以及刻入一代人思緒之中嘅，更深沉嘅頹喪。</p><p>2014年，中大人文館曾出現banner，革命是為了更美好的愛情，而《登月》亦何嘗唔係呢句嘅喪極證明。</p><p>革命當然為咗好多唔同嘢，但所謂愛情，不妨理解為與他人連結，兼想像未來嘅能力。我哋會唔會甘心我哋連喺幻想之中都要窒息 — — 面對呢個千方百計孤立我哋嘅極權社會，呢個聯同資本奪去我哋時間、空間、閒情、想像力與一切自由嘅僵化社會，我哋係咪同樣需要挺身反抗？去關注勞工權益、去建立更團結更宜居嘅社區、去關顧身邊人 — —</p><p>可唔可以有一日，我哋唔使再嚮往太空？</p><p>（有興趣嘅，不妨google呢句口號，睇睇相關嘅討論。）</p><img src="https://medium.com/_/stat?event=post.clientViewed&referrerSource=full_rss&postId=85c23ea3f448" width="1" height="1" alt="">]]></content:encoded>
        </item>
        <item>
            <title><![CDATA[落日飛車 ft.吳赫《Candlelight》：深沉成熟之美 ——轉型預告？]]></title>
            <link>https://jadeinthe852.medium.com/%E8%90%BD%E6%97%A5%E9%A3%9B%E8%BB%8A-feat-%E5%90%B3%E8%B5%AB-candlelight-%E6%B7%B1%E6%B2%89%E6%88%90%E7%86%9F%E4%B9%8B%E7%BE%8E-%E8%BD%89%E5%9E%8B%E9%A0%90%E5%91%8A-70fbf2109791?source=rss-361acbe4b84a------2</link>
            <guid isPermaLink="false">https://medium.com/p/70fbf2109791</guid>
            <category><![CDATA[吳赫]]></category>
            <category><![CDATA[落日飛車]]></category>
            <category><![CDATA[音樂]]></category>
            <category><![CDATA[聽首歌]]></category>
            <category><![CDATA[香港人]]></category>
            <dc:creator><![CDATA[Jade in the 852]]></dc:creator>
            <pubDate>Tue, 06 Oct 2020 11:03:14 GMT</pubDate>
            <atom:updated>2020-10-09T23:50:29.329Z</atom:updated>
            <content:encoded><![CDATA[<h3>落日飛車 ft.吳赫《Candlelight》：深沉成熟之美 — —轉型預告？</h3><p>台灣樂隊落日飛車同韓國樂團HYUKOH主唱吳赫合作，午夜時出咗《Candlelight》嘅MV。喂師兄，呢單合作真係拍得上HYUKOH同夕爺（無錯，我講緊林夕）crossover咁breaking。睇返keedan.com嘅訪問，吳赫2017年去台灣參加火球祭音樂節時就已經話有留意落日飛車，今次玉成合作實在可喜可賀，而對樂迷嚟講，今作都可謂夢幻大禮。</p><p>利申返，無聽開落日飛車，我同隊band嘅僅有連結就係兩張宕延到以為連同感情作廢嘅麥花臣concert飛，所以如果以下內容有疏失，敬希指正。</p><p>四月時，我concert前臨急抱佛腳non stop聽咗三日落日飛車惡補，大概印象就係MV唔4：3 low-res疊四層雪花都對唔住個曲風。復古，西式，迷迷哋，浮浮哋，香香哋，甜甜哋，暖暖哋 — — 係咁哋嚟哋去因為啲感覺真係全部都唔會過火，單純拎個氛圍，包你喺個泡泡入面，你喺入面行動自如，只係視野可能多咗層粉紅filter。好似點咗香氛蠟燭，但慳返蠟燭錢。我嗰時暗地同朋友講，落日飛車啲歌舒服，係有啲凝滯咁，啱聽住做嘢睇書，唔會入侵個腦。朋友就分享話（因為ig direct無search function所以不可考），佢幻想死後就係咁，有部好大嘅玻璃𨋢，入面播住落日飛車，永遠喺半空。我認同嘅，部𨋢仲一定望到暖陽醉籠好山水添。</p><p>不過我畏高。即係，大家鍾意落日飛車寫意浪漫，但可能因為我奴性重，其實聽歌聽到咁飄浮懶散，我會驚青。</p><p>但今次唔係咁。聽咗30秒後我仲特登開著個mon check，今次唔係HYUKOH feat.落日飛車，係落日飛車 feat.吳赫（因為直接諗起HYUKOH首《似是故人來》嘅副歌）。完全唔係我印象中嘅落日飛車（雖則我本來印象都未必拎得準）。Cover art已經有兆頭，無暖色，唔係可愛搞鬼插畫，係黑灰藍嘅寫實風眼衛星相。貫徹今次沉重帶啲暗黑嘅感覺，兼有啲莊嚴。</p><p>憑直覺睇製作人員名單搵producer，今次破例（之前唔太見有，可能係成隊一齊做）另闢一行標明：杜澤威。佢亦兼任Mixing、Drum programming,、Synthesizers與Sampling。睇勻落日飛車youtube channel其他歌都見唔到呢個名，但原來係主唱曾國宏同鼓手羅尊龍另一隊獨立搖滾樂隊Forests嘅主音與Synthesiser手，亦係台灣獨立音樂製作人。喺spotify開咗幾首Forests 2018嘅歌嚟聽，都頗前衛實驗，沉重詭異嘅機械噪音混亂交織，加冷不防出現嘅扭曲人聲，有種濕氣，你會覺得自己入咗cyberpunk風格懸疑遊戲嘅廢料場。杜澤威主理台灣獨立音樂label「Lonely God」，旗下樂團破地獄（用Scattered Purgatory會好search啲）、落差草原WWWW、Lu &amp; Du與Eaow等都做實驗音樂，電子而玩唔同sampling，帶啲迷離，有啲帶對生死、自然、習俗嘅敬意與謙卑 — — 而《Candlelight》入面，都似乎有咁樣嘅色彩。</p><p>《Candlelight》開局intro由結他入，注定係和暖嘅抒情，小調輕柔而憂愁，感覺沉靜到聽到擦動弦線嘅聲，串住有一絲高音攀升時，人聲就突然同好重嘅synthesiser（因為睇分工無如以往標明有bass）帶嚟嘅響雷一齊墮入。係重到可以用嚟試喇叭。人聲幾乎要同人工嘅重音爭聲，僅僅平起平坐，主唱唔同以往少男心事嘅開朗／深情，壓住聲吟唱，唱得一板一眼穿插喺鈸規律嘅打擊與又密又實嘅重音中，真係好似燭光喺風中搖，要透穿黑暗嘅重。歌詞唱「你」「我」風雨中燭光下相守嘅一夜。風雨傾城，停電所以點蠟燭，你我溶於光中相共飲。</p><p>成首歌其實得呢段明確敘事，其他都係決意相忘嘅抒情。呢段記憶詩意幾近淒絕，而隨住重音漸漸退減，風雨散去，天色漸而開朗，到返去intro咁清明地淨返結他時，（MV送祭隊再次上路），主唱嘅歌聲終於完全顯現，溫柔平靜咁叫你忘記記憶嘅餘韻：</p><p>Whatever happened that night</p><p>We just won’t recite</p><p>Now those moments we’d had</p><p>All snuffed out like those candlelights</p><p>隨後鋼琴同吳赫較低嘅沙聲同穿透力強嘅高音加入，高昂合唱加埋古典感重嘅鋼琴，直情有宗教嘅莊嚴。</p><p>B段與A段相似，但處理較柔和，編排多幾樣樂器溝淡重音，鼓同旋律出返檯面，最後幾句墊咗一層和音，明明係幾乎同一段歌詞（回憶），但就多咗份滄桑後嘅釋懷。而旋律有一層越爬越高音，配埋最後多達30秒嘅高音和音，帶入一種《浴火少女》婦女唱民謠咁嘅gothic神秘感。去到最後一頓放輕咗手腳一下降落時，相信大家已經俾首歌帶咗去另一種境界。</p><p>落日飛車youtube為呢首歌寫嘅介紹係：「That night the storm came and we heard chaos knock, knock, knocking on the outside. Inside, we cuddled in the dark, quiet, our hearts lit by candlelight. 夜晚風暴來襲，城市陷入一片混沌與黑暗，你我安靜地陪伴彼此，我們點亮了只屬於今夜的燭光，傾訴內心深處的感觸。」係，無錯，呢種美好嘅相伴，就似大家現實痛苦麻木時聽落日飛車陪住自己，令音樂充滿心靈，但呢首歌更多，竟係講釋懷 — — 更重要嘅，係祝福。</p><p>今次合作唔只搵咗吳赫，仲crossover埋吳赫好友兼HYUKOH成日合作嘅videographer DQM，由韓國嗰邊一手操辦，拍一場韓國鄉村嘅出殯運喪。微藍晨曦中，公路上抬出裝點到花花綠綠嘅喪轝，仰帳喻雲，魂升天，魄入地；綴以蓮花，求極樂世界中得佛教蓮花轉生；轝身花團錦繡，綠底粉花，琺瑯蝴蝶，又綁住錢，裝飾都係對死者嘅祝頌與心意，盼早登極樂，再求來生榮華。而Intro過後，大家就會赫然發現神主牌供奉嘅，係「落日飛車」。</p><p>Now those moments we’d had（將共度的時光）</p><p>All snuffed out like those candlelights（連同燭光吹滅）</p><p>家屬䦧牆鬥毆，又或慟極號哭，但死者已矣，落棺土下再無回應，只留眾人日落暮色中各懷心事。曲風劇變，再喻身死，係咪預告落日飛車一貫風格將揮別觀眾，又或曾國宏同羅尊龍會想做更多實驗？MV中嘅家屬，又係咪對樂迷反應嘅想像呢。日落日升，生命又會流向何方？</p><p>就算對一種風格唔堅貞，都一樣可以色彩鮮明，音樂自然會承載住音樂家嘅生命。2019到2020世界陷入一片混沌與黑暗，落日飛車沉澱嘅感觸會結出點樣嘅果 — — 無論如何，即使我唔係樂隊死忠，係今曲之後，亦極盡期待。</p><img src="https://medium.com/_/stat?event=post.clientViewed&referrerSource=full_rss&postId=70fbf2109791" width="1" height="1" alt="">]]></content:encoded>
        </item>
    </channel>
</rss>