Хүсэл мөрөөдөлтэй, зорилготой байна гэдэг хүний амьдралыг тэр чигт нь өөрчилдөг юм билээ. Үгүй ээ би өмнө нь зорилгогүй байсан гэж хэлээгүй шүү.

Ямар нэгэн брэндийн төлөө амьдардаг байсан юм билээ, тэрний утсыг барихгүй л бол болохгүй, тэрний гутлыг өмсөхгүй л бол болохгүй юм шиг мөнгө л бодож урагшаа хардаг байж ээ. Хийж байгаа ажилдаа ч дургүй, цалин аваад л нөгөө хэдэн брэндээсээ аваад л дуусгачихдаг байж. Харин энэ ковид-19 болж карентин болсноор, өөрийнхөө юу хүсэж мөрөөддөг байсныг эргэн санах цаг хугацаа ирсэн юм.

10 жилдээ сургуулийнхаа сагсан бөмбөгийн шигшээд тоглодог чамгүй амжилттай тамирчин байлаа. Гэвч гэрийнхэн маань хэн нь ч хүлээн зөвшөөрдөггүй байсан юм. Дуртай болохоор нууцаар бэлтгэл хийж, нууцаар тэмцээнд ордог байсан. Өсвөрийн улсын аваргаас анх удаа манай сургуулийн эмэгтэй баг алтан медаль аваад л захирал хүлээж авч баяр хүргээд л их л сайхан мэдрэмж авч билээ.

Гэрийнхэндээ хамгийн түрүүнд хэлмээр байсан ч загнах байх гэж айгаад хэлээгүй өнгөрөөсөн боловч, тэр жилийнхээ цагаан сараар баригдчихсан л даа. Яаж вэ гэвэл хамаатны ах сагсны бөмбөгийн клубтэй байсан юм тэдний багийг хожоод улсын аварга болсон байхгүй юу, тэгсэн миний нууцыг цагаан сараар задалчихсан. Гэрийнхэнд маань намайг жигтэйхэн их магтсан л даа, гэсэн ч би маш их загнуулсан шир нүдээд амьдарна гэж байхгүй дуугүй хичээлээ сайн хий гээд л… тэнд л миний урам зориг хугарсан юм шиг…

За тамирчин болж болохгүй юм чинь би сэтгүүлч болъё гэж гэрийнхнээсээ гуйлаа.

Бүр жаахан байхаасаа л шүлэг яруу найрагт их дуртай хүүхэд байсан санаж байна. Жил болгон гэрийнхнийхээ төрсөн өдрөөр нь уран яруу, нулимс унагатал нь шүлэг бичиж өгч баярлуулдаг байлаа. Миний бас л нэг дуртай зүйл байсан болохоор мэргэжил болгоод явъя гэж бодож байгаа нь тэр байж л дээ. Бас л зөвшөөрөөгүй. Тэнд дахиад л миний урам хугарсан.

Гэрийнхний зөвлөсөн мэргэжлээр суралцаж төгссөн. Алдсан юм байхгүй ч ажил даа дургүй тэмүүлэлгүй хэдэн жилийг өнгөрөөжээ.

Дэлхийд тархсан Ковид-19 болж карантин болсонд баярлах ёстой ч юм шиг, өөртэйгөө уулзах олон цаг гарсан. Эцэст нь би дуртай юмандаа ханцуй шамлан орсон юм.

Үүнийг би сүүлийн таван жилийн хугацаанд хийж эхлэхийг хүссэн ч, хийх зориг хэзээ гарах мөчийг өөрөөсөө хүлээж суусан байдаг юм. Гэтэл нэг шөнө хамт нэг багт тоглодог байсан найзыгаа зүүдлээд өглөө нь босоод бушуухан юу хиймээр байгаагаа хэлээд санал тавьсан чинь хэлж дуусаагүй байхад ЗА ХИЙЕ гээд л чанга гэгч нь орилж билээ. Маргааш нь шууд хуралдаад санаагаа ярилцаад эхэлсэн юм.

Сагсан бөмбөг болон спортод эмэгтэй хүмүүс ч бас дурлаж, хайрлаж, үзэж сонирхдог гэдгийг олон хүмүүст хүргэхийг хүссэн юм. Алдаа оноо ихтэй эхэлж байгаа ч гэсэн, бид маш их хичээж байгаа. Яагаад гэвэл бидний мөрөөдөл бидний зорилго болсон. Та хэдэд маань жижигхэн санагдаж магадгүй ч бидний ТОМ мөрөөдлийг дэмжээрэй. Хичээнээ…

Миний хувьд сартай үдэш, зөөлөн бороонд алхаж байснаа хэзээ ч мартдаггүй. Тайван, амгалан. Хэнээс, юунаас ч хараат бус, хаашаа ч яаралгүй, зүгээр л алхаж байсан. Борооны дуслыг мэдэрч, зөөлөн салхинд, сарны гэрэлд шөнийн нам гүмийг тамшаалан алхаж явсан.

Өдийг хүртэл сайн, муу олон зүйлийг үзэж, олон мянган хүнтэй яриа өрнүүлж байсан ч орь ганцаар байсан тэр мөчийг л огт марталгүй, байн байн дурсдаг.

Нэгэн цагт миний насан дээр хэн нэгэн хөвүүнд дурлачихаад гэрэлтэж явсан нүд. Магад уйлсан, магад тунирхсан нүд.

Нэгэн цагт эцгийн минь нүд рүү яг одоогийнх шиг ширтэж байсан нүд. Хайрласан, харамнасан. Магад ахиад л уйлсан, магад гэрэвшсэн нүд.

Нэгэн цагт минийх шиг л торомгор, золбоотой явсан нүд. Нимгэхэн зовхи, гүн давхраа. Арьс нь зөөлөн, бас залуухан байсан нүд. Намайг л хайж өдийг хүрсэн нүд. Намайг л харцандаа ойр байлгах гэж хайраараа уясан нүд.

Залуу насаа үүрд бэлэглэх гэж намайг угтсан нүд. Залуу насаар нь гоёж эхэлсэн хойно минь “Боллоо” гэх шиг санаа алдах нүд..

Хараад л суухад, хүрж үзэхэд үргэлж л инээмсэглэж байдаг нүд.

“Хайртай” гэж хэлэхэд минь жаахан охиных шиг инээж байдаг нүд.

Гэнэхэн хэрнээ бүхнийг харсан нүд.

Дөлгөөхөн хэрнээ бүхнийг ойлгодог нүд.

Миний нүдийг ээжийнхтэй их адилхан гэх юм билээ. Хэзээ нэгэн цагт үр минь над руу ингэж ширтвэл, ээжийн минь надад өвлүүлсэн гоо үзэсгэлэн юм шүү гэдгийг охиндоо би заавал хэлэх болно..

Хамаг амьтан эрүүл энх, аз жаргалтай, амар амгалан байх болтугай. ♥️

Хамгийн нандин гэж зуурч үлдсэн нэгнээ хайхархаа болидог. Утгагүй юм… Энэ бол хэзээ ч чамд тэгж хандахгүй гэж итгэсэн хүнээс чинь гаргаж буй бэртэгчин авирт алмайрч гаргадаг бидний тэнэг царай…

Би одоо юу ч бичээд байгаа юм бүү мэд… Гэхдээ хайр бол өмчлөхийн нэр биш юм. Тэгээд л болоо.

Жаахан цөхөрчихлөө.

Өөрийгөө бусдаас тусгаарлачхаад, ингээд ч хамаагүй дотроо онгойлгох гэсэн юм. Хэний ч мэдэхгүй миний ертөнц энд байдаг болохоор хамаагүй бичих гэсэн юм. 8км алхаж орж ирчхээд элдэв бусыг бодон сууна даа. Эрүүл л байвал ер нь бүх юм болдог юм шиг байна. Сэтгэл санаа хүртэл сайхан байдаг. Гэхдээ энэ удаа сэтгэл санаатайгаа жаахан тэмцэж байна. Аль болох өөдрөг байх гээд, өөрийгөө хөгжүүлэх тал дээр анхаарлаа хандуулсан чинь бас арай дээр болж байна. Сэтгэлээр л унавал босч чадахгүй болох болохоор маш их хичээж байна. Тийм ээ бүх зүйл сайхан болнл гэдэгт бат итгэж байна 😇

Тэртээ өдрөөс эхлээд энэ өдөр хүртэл хэдэн жилийн хугацааг хичнээн ч удаа унаж босож өнгөрүүлэв дээ. Гэхдээ яагаад ч юм зөвхөн би л шаналаад байгаа, би л зовоод байгаа, би л өвдөөд байгаа юм шиг сэтгэл санаагаар унаж өөрийгөө улам л хэцүү болгодог байж. Олон олон хүмүүсийн ямар их тэмцэл дундаас энэ орчлон хорвоо дээр амьдрах гэж тэмцэж, давж туулсныг үзээд жаахан ч гэсэн сэтгэл санаа дээрдэх юм даа. Уг нь миний мөрөөдөл хүмүүсийн хувьд их энгийн, даруухан мөрөөдөлтэй, гэхдээ хэзээ ч биелэхгүй байж магадгүй гэж хааяа л айдаг юм. Тэр мөрөөдөл минь өөрийн гэсэн гэр бүлийг бүтээх, түүн шигээ 2 хүүтэй, өөр шигээ 2 охинтой л болохыг хүсдэг юм. Гурав гурваараа сагс тоглоход яг болж байгаа биз. Айлын хүүхдүүд багадаа эмч болно, багш болно гэдэг байсан бол би ээж болно гэдэг байсан. Хэзээ нэг өдөр энэ муу муухай өдрүүдийг давчхаад, бие биенээ үхлээс ч харамлан хайрлах хайртайгаа учраад өөрийнхөө мөрөөдлийн багийг бүтээнэ ээ. Өөдрөг л байвал бүх зүйл сайн сайхан руу тэмүүлэх байх…

Хүнтэй гэрлэх нас чинь болчихлоо, хүүхэд чинь оройтлоо, сайн хүнтэй л сууна шүү гэх мэт үгнүүдийг сүүлийн хэдэн жил гэр бүлийнхнээсээ үнэндээ залхтал сонсож байна. Мэдээж хүн болгон л сайхан гэр бүл бүтээхийг хүсдэг л байлгүй дээ. Би ч гэсэн хүсдэг, найз нөхдийгөө хараад үлгэр дууриалал авахаар сайхан гэр бүл бүтээж дээ гэж боддог байлаа. Гэтэл тэд маань 5,6 жил ханилаад эхнээсээ салах нь салаад, харилцаа нь хөрөх нь хөрөөд, аргаа ядсан хосууд миний эргэн тойронд маш их бий болчихжээ.

Бие биедээ дурлаж, хайрлаж гэрлэчхээд яагаад энэ харилцаа унтарчихдаг юм болоо. Энэ олон жил хамтдаа амьдарч байгаа аав ээж, ах эгч нар минь яаж одоо хүртэл харилцаа нь ийм гоё халуухнаараа байдаг юм болоо. Ялгаа нь юундаа байгаа юм бол гэж их удаан бодож явлаа. Гэтэл нэг найз маань эмнэлэгт байхад минь надад “Хайрын таван хэл” гэдэг ном бэлэглэв. Эмнэлэгт байгаа хүн юу хийхэв дээ нэг дор сууж байгаад дуусгалаа

Энэ номонд хайраа илэрхийлэх. таван илэрхийлэмж байдаг мөн бие биенийхээ хайраа хэрхэн илэрхийлж байгааг ойлгохгүй, хүлээж авч чадахгүй байвал харилцаа мууддаг тухай бичсэн байдаг. Харилцаа нь муудаад энэ номын зөвлөсний дагуу хоёр талаас туршаад үзэхэд харилцаа сэргэж яг анхных шигээ болсон гэж хэд хэдэн жишээ дурдагдсан байна. Үүнээс ойлгоход хосууд маань гэрлээд санаа нь амарчихдаг юм уу, нэгэнт минийх болсон юм чинь гэж боддог юм уу, зарим нь сэтгэлээ илэрхийлэхээ больж, зарим нь ойлгохоо больж, зарим нь бүр ярилцахаа ч больчихдог юм шиг санагдлаа

Хамгийн гол нь таны хайрт ямар байдлаар хайраа илэрхийлж байна. Түүнийг нь (түүнийг нь сав гэж нэрлэе) дүүрэн байлгавал, мөн танд ч гэсэн таны хайрт таны савыг дүүрэн байлгавал ямар ч харилцаа бат бэх байдаг гэнэ. Хайртай хүнийхээ хайрын хэлийг мэддэг байх нь байгаа оносон сум мэт хайртай хосын хайрыг бэхжүүлэн барьдаг юм гэнэ.

Хайрын таван хэл нь:

Үнэн сэтгэлийн ҮГЭЭР магтах

Хань ижилдээ урам дэм өгч, талархлын үг хэлэн, магтан сайшаахад эерэг зүйл хийх урам зориг сэргэдэг бөгөөд энэ нь үнэн сэтгэлийн үгээр тэтгэх явдал юм.

Хоёулахнаа байх зөвхөн таньд ЦАГ гаргах

Гэрлэсэн хос хоёулхнаа цаг өнгөрүүлэх гэдэг бол ямар нэг саад болох зүйлгүйгээр, нөхөр, эхнэр хоёул зөвхөн хоёр биедээ л анхаарлаа хандуулах тусдаа цаг гаргахыг хэлнэ.

Чин сэтгэлийн бэлэг

Аливаа бэлгийг хэн өгч байна вэ, ямар утга агуулга илэрхийлж байна вэ гэдэгт маш их ач холбогдол өгдөг хүмүүс байдаг ба бэлэг өгөх эсвэл авах нь тухайн хүний хайрыг дэвжээдэг.

Халамжлан туслахад бэлэн байдал

Нөхөр, эхнэр хоёр бие биедээ үйлчилж сурснаар хайраа дэвжээн бэхжүүлж чадна. Зарим хүмүүсийн хувьд өөрийнхөө хайрыг илэрхийлэн харуулах, бусдаас хайрын илэрхийлэл хэмээн хүлээн авах хайрын онцгой хэл нь энэ байдаг.

Энхрийлэл

Гэрлэсэн хос бэлгийн харилцаанд орох нь л бие биенээ энхрийлж таалах арга зам гэж зарим хүмүүс үздэггүй. Биенээ налан суух, түүнийхээ гарыг атгах, үнсэх гэх мэт байдлаар хүрэлцэх нь тухайн хүний хайрыг дэврээдэг.

За ингээд бүгдээрээ, хайрын таван хэлээ суралцаад, сайхан хосууд маань бие биенийгээ битгий алдаарай. Би ч мөн адил олон жил үглэж байгаа гэрийнхэндээ краштайгаа хос болж үзүүлээд, энэхүү аргаар он удаан жил сайхан жаргалтай амьдарнаа аая ккк 🤪