全世界都吹創新風，咁又係乜嘢殺死創意嘅呢？最常見嘅答案當然係老細同客戶啦，亦有因為懶惰到一個點嘅agency。不過公平啲，市場上都有敢於創新嘅老細、客戶同agency嘅，只不過比例上香港係少啲遇見唧。

咁仲有乜嘢會殺死創意嘅呢？係三個P呀：Process、Policy⋯同埋PK！

Process係指繁瑣嘅程序同approval，例如要rollout一個project，從使公司上下一心，但要開99個會溝通，再經99個部門或者層數，集齊一套簽名先行得，乃係一件好磨滅意志嘅事。最常見必經中途站有Frontline、Finance、Systems/IT、Legal、PR…等等。咁就要睇吓閣下班好同事係enabler還是show stopper屬性，如果係後者，久而久之，就算幾熱血幾高執行力，都唔會再有人想推新嘢。

Policy可以係公司內部嘅，亦可以上升至政府政策層面。而正正因爲好爆嘅點子通常都會對現有嘅制度或者既得利益者造成衝擊，所以好多時只係一句「Policy唔容許㗎喎」就殺死了個idea。你睇Uber、Airbnb、共享單車、micro-payment、micro-finance、open data…香港喺政策同法例上完全係缺乏前瞻性，甚至係落後嘅！

至於PK⋯話明係PK，根本就冇道理冇原因可言，係公司入面或者出面嘅人都得，甚至係同成件事冇關、你又唔認識嘅路人甲，總之就係要封殺你。

仲有冇咩會殺死創意嘅呢？有⋯亦係本篇最常講⋯就係「幸福」喇！

行業發展太順景，公司生意太好，老闆太好人，生活太幸福、太安穏， 呢D其實係慢性毒藥，都會慢慢培養出懶惰蟲，漸漸唔識得居安思危，扼殺創新動力。需知花無百日紅，經濟有盛衰週期，勢頭一逆轉，就會好struggle，甚至被滅絕。

亦有一種情況是咁的，公司開初係滿有創意的，業績因此而屢創新高，但其後由於生活過得挺美滿，漸漸創造力下降，諗住一橋走天涯，每每只作出小修小補 (俗稱「食老本」)，咁係slow die。有或者咁講，你唔識居安思危，唔求進步，但對手會，客戶會，行業會，社會會。當有朝瞓醒發現個世界已經唔同咗，嗰陣嚟後悔已經太遲！

更壞嘅情況係因為公司搭緊經濟順風車，所以業績好，但老闆一朝得志而開始語無倫次，自以為領導有功，漸漸培養出剛愎自用、堅離地性格，萬一業務遇上挑戰，會更難接受一啲創新而衝撃佢既有一套嘅提議，結果死得更快。

送一首歌俾大家 — 謝安琪《你們的幸福》

希望大家幸福得嚟又唔好太麻木。

俗語有話「世上沒有醜女人(和男人)，只有懶女人(和男人)。」

正如「世上沒有懷才不遇嘅Marketer，只有懶惰嘅Marketer。」

一個有才華嘅 真·Marketer，如果心入面有條天橋，有個想run好耐嘅Campaign Idea，係會排除萬難去令佢發生嘅。呢種就係「執行力」喇！

(乜做Marketer最重要唔係創意咩？嗱⋯如果零執行力，創意爆錶都冇用啦！）

不過首先好重要好重要好重要⋯你要問吓自己：你係心入面有團火嘅marketer，還是日日為咗交功課嗰隻marketer先？

如果係後者，咁恭喜你，可以快快樂樂每個月等出糧了(如果公司唔執唔裁員的話)，你亦唔使睇落去喇！

如果你仲有團火，咁你應該睇埋落去，再諗吓團火可以燒得幾耐？

老細唔buy㗎喇⋯你有冇問過先？

Sell過啦⋯咁即係你sell得唔好囉，執執個business case sell多次啦。

冇budget？同老細爭取囉。

爭取唔成功？搵Partner眾籌啦。

Partner A唔得？搵Partner B囉，搵到為止。

第二個部門唔配合？再傾囉，日日搵佢傾，問爆佢哋有乜concern，再逐一拆解。

(經驗之談一：Sadly speaking，一般嚟講自己公司內部人係麻煩過外面人嘅！)

(經驗之談二：通常90%嘅問題都唔係問題，最主要係其他部門懶唔想做或者唔明點解要做！）

Agency或Vendor慧根低get唔到？可能係你湊得佢哋唔好呀，執過個brief再brief啦。(記住…佢哋係相對公司班大帝已經比較易搞嘅重要夥伴，都係人嚟㗎，俾返D尊重吖唔該。)

⋯下刪仲有N個可能令你半途而廢嘅人或事。

但只要你有執行力，決心去實踐你嘅Dream Campaign，件事（雖然未必係100%如你初衷）一定出到街！

喂⋯係呀，要做一個成功有執行力嘅Marketer真係好辛苦好忙㗎！

#共勉之 #若然你都係度唔掂 #可以搵我㗎

送俾大家 ～ 張敬軒【天才兒童1985】