Та бүхэн сүүлийн жилүүдэд “Тогтвортой хөгжил”, “Байгальд ээлтэй” зэрэг үгсийг олон сонсож байгаа гэдэгт эргэлзэхгүй байна. Маш олон байгууллага, хүмүүс сүүлдээ бүр намууд эдгээр агуулгуудыг сайн, муу аль аль зорилгоор ашиглаж байгаа нь харамсалтай. Хамгийн гол нь эдгээр ойлголт нь бидний амьдралаас хол, бэлгэ тэмдгийн биш энгийн бөгөөд чухал агуулга гэдгийг ойлгоосой гэж хүсэж байна.

Миний амьдарч байгаа Шотландын St Andrews хот нь 2035 онд нүүрсхүчлийн хий ялгаруулдаггүй болох зорилготой ажиллаж байгаа. Товчхон мэдээлэл хүргэхэд Шотланд улс 2045 онд, Англи улс 2050 он гэхэд нүүрсхүчлийн хий ялгаруулдаггүй болох зорилготой байгаа. Хамгийн амбицтай зорилго тавьсан, түүндээ төлөвлөсөн хугацаанаасаа өмнө хүрэх нь тодорхой болоод байгаа хотод суралцаж байгаагийн хувьд би өөрийн ажигласан, энд аль хэдийн хүмүүс хэрэгжүүлээд эхэлсэн байгальд ээлтэй амьдралын хэв маягаас та бүхэнд хуваалцахыг энэ нийтлэлээрээ зорьсон юм. Танд таалагдсан хэрэгжүүлэхэд амархан санагдсан зүйл байвал дараа гэж хойш тавилгүйгээр шууд туршаад үзээрэй!

Усны сав

Кофе шоп орсон ч, ус уухдаа ч өөрийн усны савыг ашиглах. Энд ихэвчлэн пластик савны хэрэглээнээс татгалзаж төмөр усны савыг ашигладаг. Хамгийн түгээмэл загварын зургийг орууллаа. Халуун хүйтэн аль аль төрөлд хэрэглэхэд тохиромжтой бөгөөд доорх загварын таглаа нь надад илүү таалагдсан. Асгарах эсвэл эвдэрнэ гэж санаа зовохгүй.

Дахин боловсруулж, дахин хэрэглэдэг

Дахин боловсруулж болох бүх зүйлийг л дахин боловсруулахыг хичээдэг. Үүнээс гадна дахин боловсруулсан зүйлсийг худалдаж авах хандлагатай байдаг нь маш зөв чиглэл юм. Хүнсний дэлгүүрт байгаа дийлэнх барааны сав, баглаа дээр 50%, 100% дахин боловсруулсан гээд мэдээлэл нь байдаг. Мөн энд маш олон төрлийн хуучин хувцас, хэрэгслийн дэлгүүр байдаг. Хүмүүст ямар нэгэн зүйл хэрэг болоход шинийг авахаасаа илүү хуучин хэрэгслийн дэлгүүрт байгаа эсэхийг нь шалгадаг. Манай сургуульд оюутнууд хэрэглэж байсан зүйлээ бэлэглэдэг, солилцдог, борлуулдаг арга хэмжээ семестрт 2 удаа зохион байгуулагддаг. Оюутны хотхоноосоо гараад хэрэглэхгүй зүйлсээ өөр хэрэгтэй хүмүүст өгөх нь юу нь буруу гэж?

Хог ангилал амьдралын нэг хэсэг

Айл бүр, хүн болгон хогоо ангилан хаядаг. Зөвхөн Англи ч гэлтгүй Солонгосчууд бас маш сайн хогоо ангилж чаддаг. Айл бүрийн гадаа ангилан хаяхад зориулсан хогийн савнууд байдаг. Мөн оюутнуудын хотхонуудад, гудамжинд байгааг доорх зургуудаас харж болно.

Усны хэрэглээ, хяналт

Шүршүүрт орох цагаа хүртэл анхаардаг гээд боддоо? Манай хотхонд хамгийн хэмнэлттэй усаа хэрэглэсэн хүнийг тодруулах тэмцээн зохион байгуулагддаг. Мөн усны цэвэр, цэнгэг байдлыг сар бүр шалгаж оюутнуудынхаа эрүүл мэндийг хамгаалж, анхаардаг нь бас л сайн жишиг.

Дотоодын үйлдвэрлэл

Ялангуяа өөрсдийн тариачдын эрүүл ногоо бүтээгдэхүүнийг дэмжин худалдан авалт хийдэг. Органик, чанартай бүтээгдэхүүнийг дэмжсэнээр нийлүүлэгч болон хэрэглэгч аль аль нь хожно. Янз бүрийн жимсний улирлаар жижиг арга хэмжээ, үзэсгэлэн хийж ямар ч зардалгүйгээр бие биендээ борлуулалт хийн өөрсдийн бүтээгдэхүүнээ танилцуулдаг.

Цэцэг таригчид

Эргэн тойрон ногоон. Шотланд улс ялангуяа өндөр байшингаас илүү ногоон байгууламж, алхах талбай, цэцэрлэгт хүрээлэн, байгалийн тогтоц, цэвэр агаар, амьтад, шувуун жиргээгээр дүүрэн. Эрүүл агаар, хүүхэд тоглох, ахмадууд агаарлах ногоон байгууламж ихтэйд нь цаанаа цагаахан атаархал төрнө. Үнэхээр л байгаль, хүрээлэн буй орчин гэдэг зүйлийн үнэ цэнийг мэддэг хүмүүс шиг санагддаг. Оюутнууд хүртэл өрөөндөө олон төрлийн цэцэг тарьж, арчилдаг. Төгсөөд явахдаа арчилж чадах, цэцэгт дуртай нэгэнд нь үлдээгээд буцна даа.

Эдгээр мэт маш олон бидний санаа авч болох, даган хэрэгжүүлж болох зүйлс бий. Гэрлийн лампаа LED-ээр солих, цаасаа 2 талаар нь хэрэглэх гээд энгийн зүйлсийг бүгд мэднэ шүү дээ! Бид маш олон төрлийн сувгаар янз бүрийн санаа, туршлага, мэдээлэл авдаг. Гэхдээ хэрэгжүүлэх гэхээр нэг л итгэл төрөхгүй, танаас арай хол юм шиг хааяа санагддаг уу?

Гэхдээ, энэ дэлхий дээр байгаа бүх зүйлс хоорондоо хамааралтай гэдгийг хэзээ ч битгий мартаарай гэж танаас хүсэх байна. Өнөөдөр та нэг ч гэсэн хогоо ангилж хаяснаар, та өнөөдөр пластикаас татгалзсанаар таны нүдэнд харагдахгүй ч олон өөрчлөлтийг байгалийн экосистемд бий болгож, сайжруулж байгаа гэдгийг битгий мартаарай. Маш жижигхэн ч гэсэн өөрчлөлтөөс хол сууж, төвөгшөөлгүйгээр эхний алхмыг л тавихад хангалттай. Таны хийдэг жижиг үйлдлээс ажлын тань хүмүүс, гэр бүлийн хүмүүс, найзууд гээд эргэн тойрныхон чинь суралцаж, санаа авч, дагаж байхад л энэ бол таны оруулж буй хамгийн том хувь нэмэр юм шүү!

Бусдыг хариултаас нь илүү асуултаар нь дүгнэх зарчмыг дэлхийн тэргүүлэгч орны хүмүүс баримталдаг. Би яг одоо энэ асуудалтай нүүр тулж байгаа учраас залуучуудыгаа одооноос асуулт асуух урлагт суралцаасай гэсэндээ уг нийтлэлээ бичлээ.

Хөгжсөн орнуудын сургалтын систем яг үнэндээ манайхаас өөр. Энэ талаар Англи найзтайгаа ярилцаж байхад тэдний 10 жилийн сургуулиас нь л эргэцүүлэн бодох /Critical thinking/ чадварыг нь хөгжүүлж багшаасаа асуулт асуусан хүүхдийг сайшааж үнэлдэг гэв. Гэтэл бид нар сурагч байхдаа багшийн хэлснийг эсвэл ном дээр байгааг л зөв гэж шууд хүлээн авдаг байв. Оюутан болоод багш нартайгаа ярилцах, мэтгэлцэх нь харьцангуй нэмэгддэгч шууд багшийнхаа эсрэг байр сууриа илэрхийлэх, багшийг сорих тохиолдлууд ховор. Та бүхний туршлага дээр өөр жишээ байж магадгүй ч би энэ үеийн хүн юм аа 😅

Та бодоод үзээрэй! Багш лекцийн төгсгөлд Асуух асуулт байна уу? гэхэд хэр их оюутан гараа өргөж асуулт асуудаг вэ? Эсвэл ажил дээрээ мэдэхгүй зүйл тулгарахад хамт ажилладаг хүмүүс, захирлаасаа санаа зовохгүйгээр шууд асуултаа асууж чаддаг уу?

Асуулт асуудаггүй хүмүүсийг нөхцөл байдлаас нь шалтгаалж янз бүрээр ангилж болно. Өөрийн туршлага дээр тулгуурлан ангилбал:

Асуулт асуухаас айдаг бүлэг

Буруу асуулт асуугаад хүмүүсийн дунд эвгүй байдалд орохоос дуугүй сууж байхыг илүүд үздэг.

Зөвхөн мэддэг хүн л асуудаг гэж боддог бүлэг

Би энэ сэдвийг бүрэн гүйцэд мэдэхгүй. Энд байгаа хүмүүс надаас илүү мэдлэгтэй учраас намайг асуувал энийг мэддэггүй юм уу гэж шоолж, үл хүндлэх байх гэсэн айдастай.

Асуулт асуух тухай боддог ч үгүй бүлэг

Юм мэддэггүй хүмүүс л асуудаг гэж боддог. Харин хүмүүсийн асуултад хамааралтай хамааралгүйг үл харгалзан хариулах дуртай хүмүүс.

Идэвхгүй бүлэг

Асуулт асуух эсвэл тухайн харилцан ярианд ямар ч оролцох сонирхолгүй хэсэг. Хэрэг болж магадгүй гэсэн шалтгаанаар л сууж байгаа юм уу даа.

Та аль ч ангилалд багтсан бай хамгийн том асуудал бол асуулт асуухын үр ашгийг хараахан мэдээгүй байгаа юм байна. Гэхдээ энэ нийтлэлээр та бага ч гэсэн ойлголт авна гэж найдаж байна.

Асуулт асуух нь сурах үйл явцад асар их тусалдаг. Энэ бол маргаангүй үнэн. Санаа зоволгүйгээр мэдэхгүй зүйлээ асууж, үзэл бодлоо солилцох нь зөвхөн та хүссэн хариултаа аваад дуусах биш таны танин мэдэхүйг хөгжүүлж байдаг. Юмыг өөр өнцгөөс харж сурах нь маш том давуу тал шүү.

Яг үнэндээ би Англи улсад суралцах гэж ирээд өөрийгөө хамгийн их сорьсон чадвар маань яах аргагүй асуулт асуух байсан юм. Ангидаа ганцаараа Ази, төрөлх хэл нь англи биш оюутны хувьд энэ соёл надад анх хамгийн хэцүү санагдсан. Манай ангийн хүүхдүүд маш зоригтойгоор багштай мэтгэлцэж, үзэл бодлыг нь үгүйсгэн багш нарыгаа сорьж, хоорондоо зөвхөн хичээл биш маш олон зүйлсийн талаар ярилцаж санал солилцдог. Би энэ чадвараа сайжруулахын тулд нэлээдгүй судалгаа хийж, уншиж судалсан бөгөөд хүн болгон хэрэгжүүлэх боломжтой өөрийн хэрэгжүүлж буй аргуудаасаа хуваалцъя.

1.Илүү их асуулт асуу. Хичээгээд үз, тоолоод үз. Миний хувьд багаас нь эхэлж үнэхээр бүрэн ойлгоогүй зүйлээ багшаасаа асууж, өөрөө яагаад ингэж бодож байгаа талаараа хэлж ярилцаж эхэлсэн.

2. Харилцааны шинэ хаалгыг нээ. Шинэ хүмүүстэй танилцаж нетворкинг үүсгэхэд сонсох чадвар чухал ч оновчтой асуулт асууж харилцан яриагаа үргэлжлүүлэх маш чухал. Тиймээс найзуудтайгаа уулзахдаа надаас огт өөр зүйлсийг нь асууж сонирхож эхэлсэн. Тухайн улсын уламжлал, тэмдэглэлт баяр, хоол гэх мэт. Шинэ соёл, үзэл бодолтой танилцах нь ямар сонирхолтой гээч.

3. Цаг хугацаагаа мэдрэх. Харилцан ярианы хамгийн чухал зүйл бол цаг хугацаагаа мэдрэх. Ямар ч энгийн асуулт байсан гэсэн зөв мөчид асуувал үнэхээр гайхалтай яриа, шинэ мэдээллийн эхлэл болж чаддаг.

4. Төлөвлөгөөгөө зурагла. Яг л тоглоом шиг. Би ингэж асуувал надаас ингэж асууж магадгүй гэсэн бэлтгэлтэй байхад илүүдэхгүй. Эсвэл ийм хариулт өгвөл энэ талаар нь илүү ярилцмаар байна гэдэг ч юмуу зүгээр л асуулт хариулт биш харилцан яриа болгох ерөнхий төлөвлөгөөг толгойдоо зураглаарай.

5. Зорилгоо сайн мэдэх. Би яг юу мэдэж авахыг хүсэж байна вэ? Би яагаад энэ асуултыг асууж байгаа билээ? Би яг ямар хариулт хүлээж байна? гэх мэт асууж буй зүйлээ бүрэн ойлгох хэрэгтэй.

Би ч мөн өөртэйгөө тэмцэн дутуу байгаа чадвараа аль болох хөгжүүлэх гэж л хичээж яваа. Та өөрийнхөө ямар нэг чадвараа дутуу байгааг мэдэрвэл өөртэйгөө тэмцэн сайжруулахыг хичээгээрэй. Аливаа зүйл оролдлогоос л эхэлдэг. Тиймээс та хичээлээ дуусахад хэн ч асуулт асуухгүй багшид ч оюутнуудад ч эвгүй чив чимээгүй орчинг эвдээд асуулт асуугаад үзээрэй. Тэнэг асуулт гэж байдаггүй юм шүү! Харин зоригтой, мэдэхийг хүссэн сониуч хүмүүс л бий.

Танд амжилт хүсье!

Би гарчгаа Асуулт биш Агуулга гэж нэрлэснийг та анзаарсан уу? Юуны өмнө энэ нийтлэлээс яг энэ асуулт ирнэ гэсэн бэлэн хариулт хүлээсний хэрэггүй гэж хэлмээр байна. Chevening-д яг ямар асуултууд ирдэг вэ? гээд англиар гүүглээс хайвал маш их асуултуудын жагсаалтыг олж болно. Таныг аль хэдийн тэгж үзсэн байх гэж бодож байна. Энэ нийтлэлийн хувьд интернэт дээрх олон асуултыг орчуулж тавиад контент гэж нэрлэхийг хүссэнгүй харин таниас асуух магадлалтай, бодох ёстой агуулгуудыг хүргэхийг хичээлээ.

Би өмнөх нийтлэлээрээ Chevening-ийн ярилцлагад хэрхэн бэлдэх тухай мэдээллийг хүргэсэн. Ярилцлага бол айх зүйл биш, харин ч та өөрийнхөө хийж бүтээсэн зүйлийг бусад хүмүүст бахархалтайгаар танилцуулж байна л гэсэн үг юм. Тиймээс ярилцлагын үеэр цээжилсэн юм шиг дуржигнуулан ярихаас илүү асуултын агуулгад тохирсон оновчтой хариулт өгөхийг хичээгээрэй.

Өөрийн судалгаа болон туршлагад үндэслэн ярилцлагын шатны хамгийн чухал 5 агуулгыг танилцуулъя.

1. Why UK, Why Chevening

Бусад олон орны тэтгэлгүүд дундаас та яагаад Их Британид суралцахаар шийдсэн бэ? Үнэхээр энэ улсад суралцахыг хүсдэг байсан уу? Эсвэл ямар нэгэн соёл, спорт, урлагийн төрөл нь танд таалагддаг уу? Яг ямар шалтгаанаар Англи явмаар байгаа вэ? Хариулт заавал ухаантай байх албагүй. Миний хувьд Harry Potter үзэж өссөн, үнэхээр дуртай болохоор түүний зохиолыг бичсэн газарт очиж үзэхийг хүсдэг байсан. Түүнийгээ л хуваалцсан 😀

Мөн маш олон төрлийн тэтгэлгүүд байдаг. Тэр дундаас яагаад Chevening-ийг сонгосон бэ? Бусад тэтгэлгүүдээс ялгагдах онцлог нь таны бодлоор юу вэ? Танд энэ хөтөлбөрийн юу нь таалагдсан бэ? гээд өөрөөсөө асуугаад үзээрэй.

2. Сургуулиудын тухай

Анх материалаа явуулахдаа суралцахыг хүсэж буй 3 сургуулийнхаа мэдээллийг оруулдаг. Яг яагаад энэ сургуулиудыг сонгосон бэ? Ранкаар нь эсвэл програмаас нь болсон уу? Үзэх гэж буй хичээл, судалгааны чиглэл нь тохирч байна уу?

1 жилийн хугацаанд амьдрах хотоо судалсан уу? Энэ ч мөн заавал судлах ёстой зүйл шүү.

3. Буцаж ирээд юу хийх вэ?

Ирээдүйн карьерийнхаа талаар эсээ бичсэн ээ та санаж байгаа байх. Тэгэхээр энэ хэсэг бол таны хувьд бэлтгэл нэг их шаардлагагүй, тодорхой байгаа байх гэж найдаж байна. Суралцан буцаж ирээд өөрийн салбартаа юу хийж бүтээх тухайгаа ойлгомжтой товчхон танилцуулахад хангалттай.

4. Таны түүх, туршлага

Бичсэн эсээнүүдээ дахин сайтар анализ хийн уншихаар та өөрийнхөө тухай бичсэн бүх өнцгүүдийг харах болно. Та аль хэдийн өөрийнхөө тухай, хийсэн зүйлс, туршлагаа бичсэн байгаа. Хэрвээ танд бичиж амжаагүй туршлага байгаа бол түүнийгээ ярилцлага дээрээ ярьж болно.

Ийм ийм зүйл хийж, ийм үйл ажиллагаанд оролцсон гэж ярихаасаа илүү түүнийг хийгээд ямар үр дүнд хүрсэн, яагаад хийх болсон, түүнээсээ юу сурсан гэдгээ ярих нь илүү ач холбогдолтой шүү.

5. Why you?

Тантай өрсөлдөж байгаа адилхан мэргэжилтэй, магадгүй танаас илүү хэлний оноотой, ажлын туршлагатай хүмүүс байгаа. Гэхдээ танд бүх хүнээс ялгарах нэг зүйл заавал байж таараа. Мэдээж та өөрийнхөө тэр чадварыг олж хараад материалаа бэлдсэн байгаа байх. Тиймээс өөрийнхөө хэн гэдгийг л батлан харуулахад л хангалттай.

Хүн бүрийн түүх өөр учраас ярилцлагын үед таны бичсэн, ярьсан зүйлтэй холбоотой асуултуудыг л асууна. Тиймээс интернэтэд байгаа хэдэн зуун асуулт хариулт бичиж цээжилснээс илүү өөрийнхөө эсээнүүдийг дахин сайн уншаад дээрх 5 агуулгатай хамааралтай, асуух магадлалтай асуултуудаа бэлдээрэй.

Төгс төгөлдөр нэгэн байх биш өөрийн үзэл бодол, итгэл үнэмшил хамгийн гол нь өөртөө итгэлтэй байгаарай! Та бүхэнд хамгийн том амжилтыг хүсье!

Төгсгөлд нь хэлэхэд та бүхэнд өөр сонирхсон сэдэв, уншихыг хүссэн сэдвийн санал байвал коммент хэсэгт үлдээгээрэй!

Жил бүрийн 2 сард Их Британийн засгийн газрын тэтгэлэг Chevening-ийн шорт лист тодорхой болж дараагийн шатанд тэнцсэн эсэх хариугаа дэлхий даяар материал илгээсэн хүмүүс маань авдаг. Хэрвээ та татгалзсан хариу авсан бол битгий сэтгэлээр унаарай, миний мэдэх маш олон хүмүүс хэд хэдэн удаа оролдсоны эцэст тэнцсэн байдаг шүү.

Энэ удаагийн нийтлэлээ ярилцлагад орох гэж бэлдэж байгаа хүмүүстээ зориуллаа. Ирэх жилийн аппликейшн хүлээж авч эхлэх үед хэрхэн материалаа бэлдэх, эсээ бичих талаар зөвлөгөө нийтлэл оруулах тул та бүхэн “Follow” хийгээрэй.

За ингээд дараагийн шатанд орсон тухай и-мэйл ирсний дараа ярилцлагад орох цаг, өдрөө сонгодог. Хамгийн эхэнд болон сүүл хэсэгт орох нь аль аль нь л давуу болон сул талтай. Өөртөө итгэлтэй байвал эхний хэсэгт орж хүчтэй сэтгэгдэл төрүүлж болно, эсвэл илүү бэлтгэл хэрэгтэй бол сүүл хэсэгт орсон ч болно.

Хэзээ ярилцлагад орохоо тодорхой болгосны дараа таны хувьд бэлдэж эхлэх л үлдлээ. Ярилцлагад бэлдэхдээ анхаарах хамгийн чухал 7 зүйлсийг та бүхэндээ хуваалцъя.

1. Эсээгээ дахин унш

Өнгөрсөн оны 11 сард бичиж илгээсэн эсээгээ одоо дахин нэг уншихыг хамгийн түрүүнд зөвлөе. Зүгээр нэг уншаад өнгөрөх биш, өөрийн бичсэн бүх зүйлдээ анализ хийн бичсэн зүйлээ дэлгэрүүлэн ярихдаа бэлдэж эхлэх хэрэгтэй.

2. Тодорхой байх

Их ярихдаа бус оновчтой ярих нь чухал. Ярилцлагын үргэлжлэх хугацаа 25–30 минут, заримдаа түүнээс ч их байдаг. Ач холбогдолгүй зүйлээ дэлгэрүүлж ярьсаар байгаад хамаг цагаа битгий алдаарай. Гол санаагаа тодорхой илэрхийлэх нь өөрөө маш том чадвар.

3. Худал ярих үргэлжид БУРУУ

Хийгээгүй зүйлээ хийсэн гэж бичих амархан, харин ярих хэцүү. Хүмүүс эсээгээ илүү хүчтэй болгох гэж би бараг л Супер гэж бичих нь элбэг байдаг. Энэ нь тэдний гаргадаг хамгийн том алдаа. Хийсэн ажлынхаа тухай дэлгэрүүлж яриач гэхэд худал ярьж буй хүмүүс шууд л мэдэгддэг. Тиймээс хэт төгс болох гэж хичээсэн 1 худал яриа таны хийж бүтээсэн үнэн 100 ажлыг үнэ цэнэгүй болгодог гэдгийг битгий мартаарай. Ер нь зөвхөн ярилцлагад ч биш өөрийн амьдралдаа худал том ярих хандлагаас аль болох татгалзаарай. Том амтай хүмүүс их болох нь маш аюултай гэж би хувьдаа боддог байгаа 😇.

4. Мэдлэгээ тэл

Та өөрийн сурах гэж байгаа чиглэлээр хангалттай сайн мэдээлэлтэй юу? Яг ямар хичээлүүд үзэхээ судалсан уу? Эсвэл зүгээр ранкийг нь харж байгаад л сонгосон уу? Өөрийн амьдрахыг хүсэж байгаа газрынхаа тухай хир сайн мэдэх вэ? гээд сайн судлах зүйл маш их байгаа биз?

5. Бэлтгэл хэзээд илүүдэхгүй

Интернэтээр дүүрэн байгаа маш олон асуултад хариулт бэлдээд цээжилдэг хүмүүс олон байдаг. Гэхдээ цээжилсэн хариу шууд мэдэгдэх магадлал өндөр. Миний хувьд энэ аргаар бэлдээгүй. Хувь хүний онцлогоосоо хамаарч бэлдэх аргаа сонгох хэрэгтэй. Хэрвээ та сандардаг бол найзтайгаа бэлтгэл хийгээд үзээрэй. Эсвэл өөрөө ярихдаа бичлэг хийсэн ч болно. Бичлэгээ үзвэл таны биеийн хэлэмж, харц ямар байгаа нь тодорхой харагдана. Өөрийнхөө алдааг харсан зүйлийг засахад маш амархан.

6. Mock interview

Миний хувьд анхны удаа Chevening-д материалаа явуулсан болохоор ярилцлагын шатны талаар ямар ч мэдээлэлгүй байсан. Үзээд ярилцлагын тухай ерөнхий ойлголт авсан туршилтын видеог хуваалцаж байна. Нэг үзэхэд илүүдэхгүй шүү!

7. ӨӨРТӨӨ ИТГЭ

Таны хийсэн зүйл, таны бүтээсэн зүйл бол өөр хэнд ч байхгүй таныг илэрхийлсэн үнэт зүйл юм шүү. Өөрийнхөө өдийг хүртэл хийсэн бүтээсэн зүйлдээ, сонгосон замдаа итгэлтэй байх нь хамгийн чухал. Та хүн болгонтой 100% санал нийлэх албагүй. Өөрийн үзэл бодол, итгэл үнэмшлээ өөрчлөхгүй байхыг хүсье!

Хүн бүр мэдэж байгаа байх. Гэхдээ дахин сануулах ложистикийн зүйлс бол:

· Ярилцлагын цагаасаа 15 минутын өмнө очоорой.

· Хэт албан ёсны эсвэл хэт энгийн биш smart casual хувцаслаарай.

· Ярилцлагад шаардлагатай баримт бичгүүдээ маш сайн шалгаж авч яваарай.

Энэ нийтлэлээрээ ярилцлагад бэлдэх ерөнхий агуулгыг товч, ойлгомжтойгоор хүргэхийг хичээлээ. Бага ч болов тус болсон гэж найдаж байна☺️. Тун удахгүй ярилцлагад ирэх асуултын тухай мэдээллийг хүргэх болно.

Тэтгэлэгт тэнцсэн эсэхдээ бус материалаа бүрдүүлээд ямар нэгэн алхам хийж байгаа нь өөрөө том амжилт. Тэнцээгүй ч сэтгэлээр унаж, хэн нэгнийг, эсвэл трэндийг дагаж ийш тийшээ далийх биш зөвхөн өөрийн хүсэл мөрөөдөлдөө үнэнч байгаарай. Тийм байхад л та өөрт зориулсан боломжийг авч чадах болно.

Wellbeing, амьдралын чанар гэх мэт үгийг сүүлийн үед та их сонсож байна уу?

Ерөнхий агуулгаараа wellbeing гэдэг нь бие физиологи, оюун санаа, нийгмийн харилцаа, сэтгэл зүйн эрүүл мэндийг агуулсан тодорхойлолт юм. Эдгээр хүчин зүйлсийг эрүүл байлгаснаар та өөрийнхөө хамгийн сайнаар оршиж байгааг илэрхийлж байгаа юм.

Би энэ талаар сайн мэдлэггүй байсан ч Covid-19-ийн нөхцөл байдлаас болж энэ асуудал хүн бүрд их, бага хэмжээний нөлөө үзүүлж эхэлсэн. Надад ч мөн адил, Англид суралцахаар ирээд олон газраар аялах, туршиж үзэх гээд нэлээдгүй төлөвлөгөө байсан ч хөл хорио гэсэн асуудал тулгарсан.

Яг энэ цаг үед сургуулиуд оюутнуудынхаа wellbeing-т маш их анхаарал тавьж байгаа. Манай сургуулийн хувьд маш олон сургалт явуулж оюутнууддаа ямар нэгэн байдлаар ганцаардсан мэдрэмж төрүүлэхгүйн тулд онлайн болон зайгаа барин оролцох үйл ажиллагаанууд тасралтгүй явуулж байгаа нь үнэхээр бахархууштай. Би энэ бүх сургалт үйл ажиллагаануудаас сурч авсан зүйлээсээ багцлан хүн болгон сэтгэл зүйгээ сайжруулах, эсвэл хэцүү санагдсан үедээ хэрэглэж болох 5 алхмыг танилцуулахаар шийдсэн юм. Та бүхэнд хэрэг болно гэж найдаж байна.

1. CONNECT

Хүмүүстэй уулзахгүй гэртээ ганцаараа нэг тийм тусгаарлагдсан юм шиг мэдрэмж төрж байна уу? Бусад хүмүүс ч мөн тантай адилхан байдалд байгаа гэдгийг санаарай.

Уулзаагүй, яриагүй удсан найзуудруугаа видео дуудлага хийгээд үзээрэй, эсвэл чат бичээрэй. Хэнтэй ч харьцахгүй, хэнтэй ч ярихгүй байх нь өөрөө сэтгэл зүйд маш муу нөлөө үзүүлдэг. Мөн дэлгүүр явах замдаа тааралдсан хүмүүсрүү инээмсэглээд үзээрэй, таньруу эргүүлээд инээнэ гэдэгт итгэлтэй байна. Хэрвээ үгүй бол тэр л биз ☺️

2. BE ACTIVE

Гарахгүй байх тусам гармааргүй санагддаг… Энэ бол маргашгүй үнэн. Тасралтгүй 1 цаг 30 минут төвлөрч ямар нэгэн зүйл хийсэн бол 20 минут заавал тархиа амраах хэрэгтэй. Энэ нь таны бүтээмжид шууд нөлөөлнө. Тиймээс энэ 20 минутдаа ямар нэгэн өөрийнхөө физиологийг сэргээх зүйл хийгээрэй. Хэчнээн залхуу хүрсэн ч гэсэн зориглоод гадаа гарсны дараа агаар амьсгалах ямар сайхан болохыг мэдэрдэг шүү дээ.

Гадаа гармааргүй байгаа бол youtube дээр байгаа иог, фитнессийн дасгалуудыг хийж болно. Аль болох жимс ногоо их идэж, тогтмол цагт унтах нь мөн сэтгэл зүйн эрүүл мэндэд чухал ач холбогдолтой. Энэ зуршил миний хувьд хэрэгжүүлэхэд маш хэцүү байгаа. Өдөрт ядаж 1 удаа гадаа гарч найзуудтайгаа уулзах эсвэл зүгээр далайн эргээр алхах төлөвлөгөө тавиад хичээж байна даа. Та мөн надтай хамт хичээгээд үзээрэй.

3. KEEP LEARNING

Өдөржин л зөвхөн ажил эсвэл хичээл буюу нэг зүйлийг хийх нь өөрөө тархинд их дарамт өгдөг. Тиймээс ажилруугаа явж, ирэх цагаа хэмнэх давуу тал үүсгэж байгаа гэрээсээ ажиллаж буй энэ үед өөрийнхөө хоббигоо хөгжүүлэхийг хичээгээрэй. Энэ нь юу ч байж болно, шинээр хоол хийж сурах, уншиж амжаагүй номоо унших, хэлээ сайжруулах, хөгжим сурах, шинэ кино үзэх гэх мэт.

Өөрөөсөө яг одоо хийх зүйлгүй байсан бол юу хийх вэ? Би юу хийж үзэхийг хүсэж байна? Юу хийхийг хамгийн их хүсдэг байсан бэ? гэсэн асуултуудыг асуугаад үзээрэй. Тэгээд оролдоод үз! WHY NOT!

4. GIVE

Бусдад өгөх нь танд түүнээс хэд дахин давуулсан сэтгэл ханамжийг өгдөг. Жижиг ч байсан хамаагүй ямар нэгэн сайн үйл хийгээрэй.

Энэ нь заавал мөнгөөр хэмжигдэхгүй байж болно. Таны хэн найзын төрсөн өдөр болох гэж байгаа юу? Захиа бичээд явуулаарай, эсвэл дуудлагаар цэцэг илгээвэл ямар их баярлах бол? Мөн онлайнаар сайн дурын үйл ажиллагаанд оролцох олон боломж байдаг. Судлаад үзээрэй!

5. TAKE NOTICE

Өөрийн зан ааш, санаа зовнил, юу бодож байгаагаа нэг дүгнээд үзээрэй. Эерэг сайхан бодол их байна уу? Гутрал, бухимдал, сэтгэл ханамжгүй байдал их байна уу? Хэт их бодох нь өөрөө нэг талын дарамт болох хандлагатай. Тиймээс л яг одоогийн мөчдөө амьдрах нь хамгийн зөв сонголт юм.

Амьсгалаа хянаж, оюун бодлоо цэгцэлж, орчноо мэдрэх нь таны бодсоноос илүү өөрчлөлтийг гаргах болно. Яг энэ аргын тухай миний Бодлоо амраах алхалт нийтлэлээс дэлгэрүүлэн уншаарай.

За ингээд та нартаа өөрийнхөө wellbeing-ийг сайжруулах 5 алхмыг танилцууллаа. Одоо хэрэгжүүлж, туршиж үзэх л үлдлээ. Мэдээж шинэ зүйлийг турших эхлэл хамгийн хэцүү. Түүнийг маш сайн ойлгож байна. Гэхдээ яг одоо л туршихгүй бол Монголын маргааш дуусахгүй шүү дээ…

Миний зүгээс таныг яг одоо энэ аргыг яг хэзээ туршиж үзэх вэ? гэсэн төлөвлөгөөг зүгээр нэг цаас үзэг аваад бичээрэй гэж зөвлөе. Тэгээд яг тэр хугацаандаа туршиж үзсэн бол өөрийгөө урамшуулаарай! Хоол захиалж идэх, кофе авч уух, шинэ хувцас авах, 2 цаг илүү унтах ч юм уу… Ингээд танд амжилт бүхнийг хүсье! Таалагдсан бол энэ нийтлэл хэрэгтэй гэж бодсон хүмүүст мөн түгээгээрэй!

Та хааяа юу хийхээ мэдэхгүй, ямар нэгэн зүйл хийх эрч хүч байхгүй, яг л төөрсөн юм шиг санагдаад, юу ч мэдрэхгүй, гацчихсан юм шигээр өөрийгөө мэдэрдэг үү? Энэ үед та яадаг вэ?

Надад ч мөн стрессдэж, ямар ч энергигүй болох, шийдвэр гаргаж чадахгүй эргэлзээтэй үеүд байдаг. Энэ үед ихэвчлэн хийж байгаа зүйлээсээ жаахан завсарлага аваад кофе уух ч юм уу, хөгжим сонсох, кино үзэх гээд аль болох дуртай зүйлсээ хийдэг. Гэхдээ энэ нь намайг хангалттай амрааж мөн дэмжиж чадахгүй байгаа юм шиг тохиолдол олон.

Яг энэ асуудал дээр манай сургуулийн нэгэн хувь хүний хөгжлийн сургалтаас олж авсан маш үр дүнтэй аргын тухай та бүхэнд хуваалцъя гэж шийдлээ. Энэ арга нь сонсоход маш энгийн мөртлөө хэрэгжүүлээд үзэхэд надад илүү үр нөлөөтэй санагдаж байгаа. Тиймээс нэг ч гэсэн хүнд өөрийгөө сонсох, өөртөө туслахад нэмэр болно гэж найдаж байна.

Заааа, яг одоо та дээр дурдсан шиг гацсан, эсвэл энерги чинь дууссан байгаагаар өөрийгөө мэдэрч байвал гараад алхъя. Та хотын төвд амьдардаг бай, хотхон дунд амьдардаг бай, гэрт амьдардаг бай зүгээр л гараад алх, их хугацаа хэрэггүй ээ, 10хан минут л хангалттай. Танай гэрийн ойрхон цэцэрлэг ч юм уу, саад эсвэл хүний хөлөөс хол жижигхэн булан байгаа гэдэгт итгэлтэй байна. Та гэрээсээ гараад хашааныхаа буланд зогссон ч болно.

Өөрт тухтай газраа олсон уу?

За тийм бол яг одоо зогсож буй газар буюу хөл доорх хэсгээ мэдрээд үзье, яг л 2 минут. Та юу мэдэрч байна? Газар зөөлхөн байна уу? Чийгтэй санагдаж байна уу? Зүгээр л мэдрэх гээд хичээгээрэй.

Одоо нүдээ нээгээд орчин тойрноо хараарай, мөн 2 минут. Танд юу харагдаж байна? Мод, эсвэл байшин, хот бүхэлдээ, ерөнхийдөө таны амьдарч байгаа орчин. Та хэзээ ч анзаарч байгаагүй зүйлсээ ч олж харж болно. Модон дээр байгаа навчны өнгө ямар гоё юм бэ? Энэ хавьд хогийн сав эсвэл сандал байдаггүй юм байна. Энэ зам ямар их хуучирч элэгдсэн байгааг гэх мэт… Магадгүй та яг энд зогсоод орчноо ажиглаж байхдаа сэтгэл зовоосон асуудлын шийдэл, эсвэл шинэ бизнесийн санаа олохыг ч үгүйсгэхгүй.

За одоо та нүдээ аниад сонсоод үз, 2 л минутын турш. Та юу сонсож байна вэ? Шуугилдан тоглож байгаа хүүхдүүд, хоорондоо ярилцах хүмүүсийн хоолой, машины сигналын чимээ, шувууны жиргээ, хүмүүсийн алхаж буй чимээ юу?

Одоо та юу үнэртэж байна вэ? Борооны дараах үнэр үү, мод, ногоо, цэцгийн үнэр эсвэл утаа юу? 2 минут орчноо үнэрлэж мэдрэх гэж хичээгээрэй.

Яг одоо танд ямар мэдрэмж төрж байна? Илүү уртаар амьсгал аваад 2 минут сайн бодоод, мэдрэмжээ чагнаад үзээрэй. Тархи тань илүү амарч чадсан байна уу? Таны дотор тээглэж, бугшсан байсан тэр хар зүйл арай бүдгэрсэн мэдрэгдэж байна уу?

Миний хувьд энэ арга маш эерэгээр нөлөөлж нэгэн төрлийн тархины эмчилгээ болж чадсан. Маш их бодол дунд дүүрсэн тархинд хүчээр янз бүрийн зүйл чихэж, улам овооруулах биш харин эсрэгээрээ амраах нь хамгийн зөв шийдэл юм байна гэж би дүгнэсэн.

Та ч мөн нэг удаа энэ 10 минутын аргыг туршаад үзээрэй. Хүн аливаа зүйлийг турших хүртлээ хэзээ ч мэдэрдэггүй юм шүү!

Та сонирхвол доорх линкээр орж сонирхоорой, хааяа гарах боломжгүй үедээ байгалийн дуу сонсож тархиа багахан амраадаг даа ☺️😇…

Calmsound - Free Nature Sounds

Зул сарын баярыг төсөөлцгөөе,

Яг үнэндээ Монголчууд бид тийм ч өргөн хүрээнд тэмдэглэдэггүй шүү дээ, бид зул сараас илүү шинэ оныг угтах өдөрт ач холбогдол өгдөгтэй хэн ч маргахгүй байх.

Гэхдээ бидний багаасаа үзэж өссөн барууны гэж нэрлэгддэг кинонууд дээр зул сарын баяр догдлол дүүрэн санагддаг. Маш гоёмсог зассан гацуур, түүний дор тавьсан бэлэгнүүд, гадаа явахад бүх гудамж гэрлэн чимэглэлээр дүүрч, хажуугаар өнгөрсөн хүн баяр инээмсэглэл тодруулан Merry Christmas! гэж хэлээд л…

Миний төсөөлөл лав ийм байсан. Тиймээс ч миний хүслүүдийн нэг бол Зул сарын баярыг яг бүрэн утгаар нь тэмдэглэдэг оронд очиж тэр мэдрэмжийг мэдрэх байжээ. Хүнд хүсэл мөрөөдөл байгаа бол тэр нь биелэх боломж заавал олдог гэдэг шиг 2020 оны намар Их Британид мастерын зэрэгтээ суралцах боломж олдон хүрэлцэн ирлээ.

Хамгийн сонирхолтой нь хорь хорь буюу алдарт Корона вирусын цаг үед суралцах болов. Хүнд цаг үеийн оюутан ЭСВЭЛ Хязгааргүй цаг үеийн оюутан??? Хүнд гэж хэлж байгаагийн учрийг бүгд мэдэж байгаа болов уу. Энэ өвчнөөс болон бидний шинэ найзуудтай болж, гадуур зугаалан кино үздэг байсан үеүүд ард хоцорсон. Хаана ч байсан нөгөө хүнээсээ зайтай байхыг сануулан аль болох хүмүүсээс хол байхыг санал болгоно. Хичээл онлайнаар ордог болсны хувьд бол миний хувьд давуу болон сул талтай санагдаж байгаа, яг үнэндээ тийм ч муу зүйл биш харин ч хязгааргүй боломжийг бидэнд өгч байгаа мэт. Хамгийн харамсалтай зүйл бол Зул сарын баяр байлаа. Лондон орох билет, очоод хийх зүйлсээ бүгдийг нь төлөвлөсөн байсан боловч Зул сарын баяраас өмнөх 7 хоногт Лондон хотод хатуу хөл хорио тогтоов.

Эхэндээ үнэхээр харамсалтай санагдаж байсан ч дараа жил үзэж болно шүү дээ гэж бодон бодлоо арай өөр зүйл рүү төвлөрүүлэв. Энэ хотоо ч яг үнэндээ амьдарсан 3 сарын хугацаанд гүйцэт үзэж танилцаагүй байж. Зул сарын амралт болж асар их хичээл, даалгавар дундаас түрхэн толгойгоо амраах боломж гарсан юм. Миний амьдардаг газар бол Гольф анх үүссэн, байгалийн үзэсгэлэнгээрээ алдартай, Шотландын хамгийн анхны сургууль байрладаг 1000 жилийн түүхтэй жижиг хот. Энэ хотын хамгийн гайхалтай нь 1200, 1300 оны барилгуудаар дүүрэн, түүнийгээ хэвээр нь авч үлдсэн гайхалтай түүхтэй. Аа мөн Их Британы ханхүү /William/, гүнжтэйгээ /Kate/ хамт суралцан болзож эхэлсэн газар юм.

Оюутны хотхоноосоо гараад өмнө нь очиж байгаагүй хүсний дэлгүүрлүү алхаж үзлээ. Зам дундаа үнэхээр гайхалтай ойн шугуйн хэсэгтэй таарав. Өвлийн 12 сард гол урсаж байв… Усны урсгалын чимээ, ойн моддын үнэр, амраад суух модон сандал, алхах зориулалттай зам, жижигхэн гүүр… Ямар гэгч амгалан тайванг мэдрэх гайхалтай газар вэ? Энд ирээд л суухад толгойд тээглэсэн бүх бодол алга болох юм шиг санагдав. Манай хот маш үнэтэй хотуудын тоонд ордог. Амьдралын зардал, за тэгээд энд амьдардаг хүмүүсийн хувьд бол байр нь маш үнэтэй. Гэхдээ тэр үнэдээ харамсахгүй хамгийн эрүүл агаар, цэвэр ус, эрүүл хүнс, амьдрах хамгийн таатай орчинтой. Тиймээс ч энэ хавийн хаусууд үнэхээр гоё. Соёлтой боловсролтой хүмүүс амьдардаг болохоор ч тэр үү маш эелдэг, найрсаг хүмүүс байдаг. Манай байрнаас 20 минут алхаад л далайн эрэг байдаг учраас хаяа далай эргээр алхахад сэргээд л ирдэг. Хүмүүс нохойгоо дагуулаад алхаж, тэдний эрх дураараа гүйлдэж, усанд сэлж тоглож байгааг нь харахаад үнэхээр өхөөрдөм.

Зул сарын баярын өдөр хотынхоо гацуур, гэрэлтэй гудамжаар зугаалсаар оройг гэртээ торт, Netflix, халуун шоколадтай өнгөрөөв. Найзуудтайгаа, гэрийхэнтэйгээ видео дуудлага хийж нэг л мэдэхэд орой болов. Ямар гоё газар амьдарч байгаагаа олж харах, заавал эрсдэлтэй үед гадуур явах шаардлагагүйгээр өөрийнхөө байгаа газрыг, өөрийнхөө хажууд байгаа хүмүүсийг илүү сайн мэдэж таних нь өөрөө ямар гайхалтай өөр мэдрэмж байдгийг мэдэж авлаа.

Энэ жил бидэнд гэр бүлтэйгээ илүү удаан хамт байх, интернэтийг ашиглан ажил, хичээлийг саадгүйгээр амжуулах боломж, хэн нэгний инстаграм, фейсбүүк дээрх пост, зурганд хэт анхаарал хандуулж хайран цагаа үрэх, эсвэл өөрөө тэдний нэг болох гэж өдөрт заавал сайхан амьдарч байгаагаа батлах пост, стори хийхүйгээр зүгээр л өөртөө байгаа цагийг яаж өөрийн хувьд үр бүтээлтэй, сэтгэл ханамжтай өнгөрөөх боломжийг олгосон жил боллоо.

Мэдээж 2021 онд бид энэ өвчнийг даван дийлж илүү эрүүл оюун ухаанаар, хэн нэгэнд харагдах гэж биш өөртөө таалагдах гэж амьдрах болов уу?

Бүгд эрүүл энх, инээмсэглэл, мөрөөдөл дүүрэн 2021 оноо угтаж авахыг хүсье!

Өмнөх нийтлэлээрээ та бүхэнд Duolingo English Test (DET)-ийн тухай товч мэдээллийг хүргэсэн бол энэ нийтлэлээрээ уг тестэд ирдэг асуултын төрлүүдийг танилцуулахаар шийдлээ.

DET нь нийт 11 төрлийн асуултаар таны унших, бичих, ярих, сонсох ур чадваруудыг сорих ба оновчтой цаг ашиглалт бас хурд ихээр шаарддаг. Ингээд нуршилгүйгээр шалгалтын асуултын төрлүүдийг тайлбарлая.

УНШИХ ХЭСЭГ

1. Өгүүлбэр гүйцээж бичих

Энэ таскаар таны унших чадварыг сорих болно. Өгөгдсөн параграфын дутуу байгаа үсэг, үгийг нөхөж бичих хэрэгтэй ба тухайн өгүүлбэрийн уртаас нь хамааран хугацаа нь харилцан адилгүй байна. Энэ нь таны тухайн параграфыг ойлгох чадвараас гадна үгийн санг шалгадаг. Надад бол энэ таск нь маш сонирхолтой санагддаг. Хамгийн гол нь та хурдан тухайн сэдвээ ойлгоод тэр сэдэвтэй хамааралтай үгүүдийг бодон нөхөх хэрэгтэй.

2. Үг сонгох YES/NO (бичгээр)

Энэ нь мөн маш сонирхолтой хэсэг. Таны дэлгэц дээр эгнэсэн үгүүд харагдана. Тэдгээрийг уншаад яг зөв бичигдсэн үгийг сонгох ёстой юм. Ер нь бол анхан шатны үгүүдээс эхлээд ахисан түвшний үгүүд холилдож орж ирдэг. Гэхдээ уг тест adaptive буюу тестээ сайн хийх тусам улам хэцүү болдог. Тиймээс хэцүү болох тусам шантралгүй харин ч сайн хийж байна гэж бодох хэрэгтэй. Энэ хэсэгт жижиг жижиг залиуд орсон байдаг тул (1 үсгийн байр сольсон ч юм уу) анхааралтай байх хэрэгтэй шүү!

3. Гарч ирсэн зургийг нэрлэх

Гуравхан секундийн дотор дэлгэц дээр гарч ирсэн зургийг хараад хэлэх даалгавар. Сандарсан үед үнэхээр хэцүү. Яг тулгамдахаар мэдээд байгаа мөртлөө санахгүй байх тохиолдол байдаг. Тиймээс л тайван байх нь хамгийн чухал.

СОНСОХ ХЭСЭГ

1. Сонсоод үг сонгох YES/NO

Сонсгол шалгах энэ дасгалаар танд өгөгдсөн үг тус бүрийг сонсоод жинхэнэ үгийг сонгох ёстой юм. Энэ хэсэг бас tricky шүү… Бодит биш үгүүд яг л жинхэнэ үг шиг л сонсогдоно гээч. Гэхдээ миний хувьд харьцангуй амархан таск байсан.

2. Сонсоод бичих

Энэ хэсэгт богино өгүүлбэрийг сонсоод түүнийг бичиж буулгах ёстой. Сайн сонсоод хурдан шивэх ёстой шүү. Хамгийн анхны шалгалт дээр сандарсандаа өгүүлбэрийг 3 удаа сонсох боломжтойг мэдэлгүй эхний сонсолтоороо бичсэн дээ хэхэ

ЯРИХ ХЭСЭГ

1. Текстийг унших

Дэлгэцэн дээр гарч ирсэн текстийг маш тод, чанга бөгөөд цэвэрхэн дуудах хэрэгтэй. Тэр хэмжээгээр таны оноо дээшилнэ. Эхлээд 1 гүйлгэж хараад дараа нь бичлэгээ эхлүүлээд чанга яриарай. Энэ таск нь таны унших болон ярих хэсгийг давхар шалгах бөгөөд, өгүүлбэрээ хэр ойлгож, гацаж түгдрэлгүй хэлж байна уу гэдгийг шалгах зорилготой.

2. Зураг тайлбарлах

Өгөгдсөн зургийг тайлбарлан ярих. Ихэвчлэн 2 минут өгөгддөг. Тухайн зурагт яг юу өгүүлж байна гэдгийг хугацаа дуустал тасралтгүй ярих хэрэгтэй. Уг зургийг харахгүй байгаа хүний нүдэнд харагдтал тодорхой ойлгомжтой тайлбарлах тусам өндөр оноо авах магадлалтай.

3. Асуултад хариулах

Энэ хэсэг нь IELTS-ийн speaking part 2-той адилхан гэж хэлэхэд болно. Танд багахан хэмжээний бэлдэх хугацаа болон ярих хугацаа өгөгдөнө. Асуултууд дэлгэцэн дээр харагдах ба уг асуултуудад илүү ахисан түвшний үг хэллэг, дүрэм болон өгүүлбэрийн бүтцийг оруулан хариулах хэрэгтэй.

4. Сонссон асуултдаа хариулах

Танаас ямар ч төрлийн асуулт асууж магадгүй. Яг л IELTS Speaking part 1,3 шиг сандралгүй тухайн асуултад дэлгэрэнгүй хариулт өгөх хэрэгтэй. Мөн түрүүн дурдсанчлан тухайн асуултыг нь дэлгэрүүлэн, өөрт байгаа хугацаандаа тааруулан жишээ, нотолгоог оруулсан хариулт өгөөрэй. Холбоос үгүүдийг оновчтой ашиглахаа мартваа.

БИЧИХ ХЭСЭГ

1. Зураг тайлбарлах /бичгээр/

Ярих хэсгийн зураг тайлбарлахтай адилхан даалгавар ба энэ удаа ярих биш өгөгдсөн зургийг тайлбарлан бичих ёстой юм. Энэ таскын нэг давуу тал нь та өөрийн үзэл бодлыг оруулж болно. Жишээ нь доорх зургийн хувьд, Энэ гэрэл зургийн чанар маш өндөр түвшинд байгааг харахад мэргэжлийн зурагчин авсан байх; Уг зурагт Африкийн нэгэн ширэнгэн ойд тайван унтаж буй арсланг харуулжээ. гэх мэт төсөөлөн бичиж болно.

2. Жижиг эсээ

Өгөгдсөн асуултад хариулан бичих даалгавар. Таны бичих чадварыг илтгэх чухал даалгавар учраас илүү ахисан түвшний дүрэм, мэргэжлийн үг хэллэг, холбоосыг ашиглах хэрэгтэй. Миний хувьд IELTS-ийн Writing task 2 бичдэг зарчмыг ашиглан эсээгээ бичдэг.

За ингээд үндсэн шалгалтын асуултуудыг танилцуулж дууслаа. Харин хамгийн сүүлд танаас ярилцлага авах болон эсээ бичих/тус бүр 5 минут/ хэсэг гарч ирэх болно. Эсээний хувьд IELTS-аас давуу талтай нь танд 2 төрлийн сонголт гарч ирдэг. Та түүнээс өөрийн хүссэн сэдвээ сонгоод бичнэ. Энэ 2 хэсэг нь таны Duolingo Test-ийн оноонд нөлөөлөхгүй ч таны оноогоо явуулах сургууль руу хамт илгээгддэг учир хайнга хандаж болохгүй юм.

DET шалгалтад дээрх асуултууд ирдэг юм байна. Тэгвэл таны оноо хэрхэн тооцогддог вэ?

Та ч мөн анзаарсан байх, унших хэсгийг нь шалгана гээд зөвхөн текст уншуулалгүй бусад чадваруудтай хослуулж өөр өнцгөөр сорьж, шалгаж байгааг… Энэ бол орчин үетэйгээ хөл нийлүүлсэн маш сайн шалгалт гэж миний хувьд боддог. Товчхондоо таны Англи хэлийг үндсэн 4 хүчин зүйлээр шалгаж байгаа юм.

1. Literacy — Унших болон бичих чадвар.

2. Comprehension — Унших болон сонсох чадвар.

3. Conversation — Сонсох болон ярих чадвар.

4. Production — Ярих болон бичих чадвар.

Оноонуудын тухай дэлгэрэнгүй мэдээллийг доорх линкээс аваарай.

Энэ удаагийн нийтлэлээрээ та бүхэнд DET-д ирдэг асуултуудыг танилцууллаа. Та бүхэнд хэрэгтэй байсан гэж найдаж байна. Нийтлэл маань таалагдсан бол Clap дарж Follow хийхээ мартав аа! Мөн хэрэгтэй хүнд нь хуваалцаарай гэж хүсэж байна.

Өмнөх нийтлэлийг маань 2 өдрийн дотор 1000 гаруй хүн уншиж, 400 гаруй хүмүүс шэйрлэсэн байсан. Энэ нь уг шалгалтын тухай мэдээлэл авах хүсэл, сонирхолтой хүмүүс чамлахааргүй олон байна гэдгийг илэрхийлсэн учраас та бүхэнд бага ч гэсэн туслах үүднээс мэдлэг, мэдээллээсээ хуваалцаж байгаа юм шүү!

49$-оор 2 жилийн баталгаатай IELTS/TOEFL-той дүйцэх оноог авах боломж танд байна. Та үнэхээр гадаадад сурах хүсэлтэй, хэлний оноо шаардлагатай байгаа бол ядаж 1 удаа уг шалгалтыг өгөөд үзэхийг зөвлөж байна.

Асууж тодруулах зүйлс, мөн дараагийн удаа шалгалттай холбоотой ямар төрлийн мэдээлэл, ТИП-үүд авахыг хүсэж байгаагаа коммент хэсэгт бичээрэй! Та бүхэнд өөрийн туршлага, мэдлэгээсээ хуваалцахдаа таатай байх болно оо :)

Амжилт хүсье!

Covid-19 гэх аюулт цар тахал гараад таны өгөхөөр төлөвлөж байсан IELTS/TOEFL-ийн шалгалт хойшилж сургууль, тэтгэлэгтээ материалаа явуулж амжсангүй юу?

Эсвэл шалгалтаа өгсөн хэдий ч хүссэн оноогоо авч чадалгүй дахиад нэг жил бэлдэх шаардлагатай болсон уу?

Мэдээж хэрэг тэтгэлэгт материалаа явуулах болон хүссэн сургуульдаа ороход тань хамгийн эхэнд шаардлагатай зүйл бол англи хэлний оноо. Энэ жил хүссэн оноогоо авч чадаагүй бол дахин бэлдээд өгнө, цаг хугацаа, мөнгө санхүүгийн асуудал тулгарна.

Та ирэх жилийг хүлээх шаардлагагүйгээр хэлний оноогоо хурдан хугацаанд авч 2021 оны хаврын семестрт материалаа өгөхөөс гадна, одоо зарлагдаж эхэлж байгаа маш олон тэтгэлэгт бүртгүүлэх боломж байна. Заавал IELTS/TOEFL-ийн шалгалтын хуваарийг хүлээж, 600 гаруй мянган төгрөгөөс зарцуулахаас хамаагүй бага зардлаар хурдан хугацаанд хэлний оноогоо авах боломжийг та бүхэнд танилцуулъя.

Надад ч мөн яг энэ асуудал тулгарсан юм. Миний өмнөх IELTS-ийн оноо 2020 оны 3 сард хугацаа нь дуусаж энэ намрын элсэлтэд материалаа явуулах байсан учраас дахин шалгалт өгөх ёстой болсон. Ингээд 2020.02.01-нд IELTS өгөхөөр бүртгүүлсэн байсан ч алдарт өвчин гарснаар хойшлогдсон юм. Бүр 6 сар хүртэл шүү…

Энэ хугацаанд тэтгэлгээсээ ярилцлагад орох хариу авчихсан, харин сургуулиудаасаа conditional offer-оо авчхаад зөвхөн шалгалт болох хугацааг л хүлээсэн. Харин сургуулиас маань дэлхий дахинаа тулгамдаад байгаа уг асуудлыг ойлгож байгаа учраас зөвхөн IELTS, TOEFL /paper based/ гэхгүйгээр бусад боломжуудыг энэ хичээлийн жилд хүлээн зөвшөөрөхөөр байгаагаа хэлсэн юм. Үүнд:

· Duolingo English Test (DET)

· LanguageCert

· TOEFL iBT Special Home Edition

Ингээд мэдээж өөрийн боломжийг нэмэгдүүлэхийн тулд тус бүрийг нь судалж үзлээ. Үнийн хувьд хамгийн боломжийн бөгөөд IELTS-д бэлдэж байсан болохоор тактик, ерөнхий бүтэц нь хамгийн ойролцоо нь Duolingo тест санагдаж жишээ шалгалтуудыг нь өгөөд, эхний ээлжид нэг удаа бүтэн шалгалтыг өгч үзэхээр шийдсэн юм. Цоо шинэ зүйлтэй нүүр тулсан би ямар ч бэлтгэлгүй анхны шалгалтдаа 110 буюу IELTS-аар 6.5 оноо авсан. Энэ нь надад маш бодитой санагдаж, жоохон бэлдээд дахиад өгвөл боломжтой гэж үзээд бэлдэхээр шийдсэн юм.

Энэхүү нийтлэлээрээ ч би мөн яг над шиг асуудалтай тулгараад байгаа залуучуудад зөвлөж мэдээлэл өгөхийг хүссэн. Дэлхийг хамарсан цар тахал бидэнд маш их өөрчлөлтийг авчирч байна. Зөвхөн бидний амьдралд биш боловсролын салбарт шинэчлэлтийг бий болгоод байгаа нь мөн сонирхолтой. Жишээ нь дэлхийн ТОП сургуулиуд энэ төрлийн онлайн шалгалтуудыг хүлээн зөвшөөрдөггүй байсан бол хүлээн зөвшөөрч эхэлсэн ба зарим сургуулиуд GMAT, GRE-г энэ жилийн элсэлтдээ шаардахгүй байгааг бид харж байна. Энэ өөрчлөлт, зарим төрлийн боломжуудыг бид ашиглаж, оролдоод үзэх хэрэгтэй.

Тиймээс Duolingo тестийн тухай товчхон мэдээллийг та бүхэнд хүргэхээр бэлдлээ. (Миний хувьд IELTS-ийн талаар туршлагатай тул харьцуулан бичлээ)

Duolingo English test гэж юу вэ?

Та өөрийн хүссэн газраасаа, хэдэн цагт ч хамаагүй, өөрийн компьютерыг ашиглан өгөх англи хэлний онлайн шалгалт юм. Яг л бидний сайн мэдэх IELTS, TOEFL шиг сонсох, унших, бичих, ярих гэсэн 4 төрлийн чадварыг нь шалгана. Гэхдээ арай өөр аргаар. Уг шалгалт нь таны сайн эсвэл муу хийж байгаагаас хамааран дараагийн асуултыг илүү хүнд эсвэл хөнгөн байлгах зарчмаар явагддаг.

Үнийн хувьд?

IELTS computer based — 599,000₮

IELTS paper based — 581,000₮

Duolingo English Test — 49$

Та 49$-оор өөрийн сертификатыг онлайн байдлаар авах боломжтой. Мөн таны хүссэн сургуулиуд руу оноог тань явуулж өгнө.

Хамгийн том давуу тал нь та жишиг шалгалтыг хэдэн ч удаа өгч өөрийн түвшингээ мэдэж болно. Мэдээж ҮНЭ ТӨЛБӨРГҮЙ ☺️

Шалгалтын үргэлжлэх хугацаа?

IELTS-ийн бичих хэсэг 2 цаг 30 минут орчим, яриа 15 орчим минут буюу барагцаалбал 3 цаг болдог бол Duolingo тест танаас 1 цагийг л шаардана.

Хариугаа авах хугацаа?

Duolingo нь 2 хоногийн дотор хариуг илгээдэг байсан бол тест өгөгчдийн тоо дэлхий дахинаа маш ихээр нэмэгдэж буйтай холбоотойгоор 5 хүртэлх хоногийн дотор хариу нь гардаг. Бид IELTS-ийн хариугаа 13 хоног хүлээдэг шүү дээ.

Хүчинтэй хугацаа?

Бусад шалгалтуудтай адил 2 жилийн хугацаанд хүчинтэй.

Оноо хэрхэн тооцогддог вэ?

Та 160 хүртэлх оноог авах ба эдгээр нь харгалзан нь IELTS/TOEFL аль алинд нь хөрвөн тооцогддог. Жишээ нь та 110 оноо авсан бол iBT TOEFL-ийн 86–91; IELTS-ийн 6.5 оноо авч байна гэсэн үг юм. Дэлгэрэнгүйг: https://englishtest.duolingo.com/scores

Манай сургууль хүлээн зөвшөөрөх болов уу?

Дэлхийн 1000 гаруй сургууль уг тестийн оноог хүлээн зөвшөөрч байгаа. Би өмнө хэлсэнчлэн Covid-19-тэй холбоотойгоор уг тоо маш хурдацтай өссөн. Таны орох гэж буй сургууль энэ дунд байгаа эсэхийг та өөрөө судлах хэрэгтэй. Гэхдээ маш амархан… Доорх линк рүү ороод л сургуулиа хайхад болно.

Duolingo English Test

Шалгалтаа хаана өгөх вэ?

Өмнө дурдсанчлан онлайн шалгалт учраас та хүссэн газраа, өөртөө эвтэйхэн хувцастайгаа өгөх боломжтой. Яг шалгалтын танхимд ороод сандардаг, мэддэг зүйлээ ч мартчихдаг хүмүүс байдаг шүү дээ, энэ шалгалтын хувьд тийм төрлийн айдас байхгүй гэж хэлж болно.

Гэхдээ гэртээ өглөө гээд таныг харахгүй байна гэсэн үг огт биш шүү! Таныг компьютерын камераар хянаж байгаа учраас шалгалт өгөхдөө анхаарах зүйлсийг заавал мэдэх хэрэгтэй шүү!

За ингээд та бүхэнд Duolingo English Test-ийн тухай товч мэдээллийг хүргэлээ. Та Sample test-ийг https://englishtest.duolingo.com/quick линкээр ороод үнэ төлбөргүй өгөөд үзээрэй.

Хэрвээ уг тестийн талаар илүү сонирхож, өгөх сонирхолтой хүмүүс олон байвал би өөрийн өчүүхэн мэдлэг, туршлага дээр тулгуурлан уг шалгалтын тухай дэлгэрэнгүй мэдээлэл, хэрхэн бэлдэх, анхаарах зүйлсийн тухай зөвлөгөө нийтлэлийг бичиж болно шүү! Миний хувьд 7 хоног бэлдээд 125 буюу IELTS-ийн 7.5 оноо авч хүссэн сургуульдаа орсон байгаа.

Санал хүсэлтээ хуваалцаарай

Та бүхэндээ амжилт хүсье!