Nýnasistar hafa framið fjölda hryðjuverkaárása á Norðurlöndum en Ríkislögreglustjóri virðist ekki telja ástæðu til að óttast starfsemi samnorrænnar nýnasistahreyfingar hér á landi. Ekkert er fjallað um starfsemi hreyfingarinnar í skýrslu Ríkislögreglustjóra um mat á hryðjuverkahættu.

Nýnasistahreyfingin Norðurvígi hefur undanfarna daga og vikur staðið fyrir aðgerðum gegn hælisleitendum í Reykjavík. Aðgerðirnar hafa hingað til vakið litla athygli, en hreyfingin hefur m.a. sett upp veggspjöld og dreift áróðursbæklingum í hús í borginni. Í nótt dreifði hreyfingin veggspjöldum og límmiðum með yfirskriftinni „Hýsum Íslendinga ekki hælisleitendur “ í grennd við húsnæði hælisleitenda í Stigahlíð.

Norðurvígi er íslenskur armur samnorrænnar nýnasistahreyfingar sem kallar sig Norrænu mótstöðuhreyfinguna. Nordiska motstandsrörelsen (NMR) á sér langa sögu á Norðurlöndunum en varð til sem samnorræn hreyfing árið 2016. Hugmyndafræði hreyfingarinnar byggir á þjóðernissósíalisma og á samfélagsmiðlum hreyfingarinnar birtist reglulega hatursáróður gegn gyðingum, múslimum og svörtum ásamt tilvísunum í Adolf Hitler.

Meðlimir hreyfingarinnar hafa margoft gerst sekir um ofbeldi og hryðjuverkastarfsemi í nágrannalöndum okkar. Lögregluyfirvöld á Norðurlöndum hafa vaxandi áhyggjur af starfsemi samtakanna og stjórnvöld í Finnlandi hafa t.a.m. gert tilraunir til að banna starfsemi þeirra. Líkur eru taldar á að ofbeldis- og hryðjuverkum nýnasista muni fjölga á Norðurlöndum á næstu árum.

Ofbeldi nýnasistanna hefur m.a. beinst gegn flóttafólki, hinsegin fólki og stjórnmálafólki á vinstri vængnum. Haustið 2016 var t.a.m. eldur lagður að heimili sveitarstjórnarfulltrúa úr jafnaðarflokki Svíþjóðar og einkennismerki NMR krotað á vegg hússins. Í byrjun árs 2017 gerðu meðlimir NMR sprengjuárás á heimili flóttafólks í Gautaborg þar sem einn særðist. Þetta eru bara dæmi um fjölmörg ofbeldisverk nýnasista á Norðurlöndum undanfarið.

Engin ógn á Íslandi

Norðurvígi virðist hafa hafið starfsemi hér á landi árið 2016, en vefurinn www.nordurvigi.is fór fyrst í loftið í júní það ár. Í byrjun ágúst sama ár fjölluðu íslenskir fjölmiðlar um komu hreyfingarinnar til hingað til lands. Hreyfingin lét lítið fyrir sér fara framan af en virkni þeirra virðist hafa færst í aukana síðustu misseri. Aðgerðirnar hafa hingað til aðallega falist í að dreifa áróðursmiðum gegn hælisleitendum í skjóli nætur.

Í skýrslu Ríkislögreglustjóra um mat á hættu á hryðjuverkum á Íslandi, sem kom út í lok janúar 2017, er stuttlega vikið að starfsemi Norrænu mótstöðuhreyfingarinnar. Í skýrslunni segir að hreyfingin sé starfrækt í Noregi, Svíþjóð, Danmörku og Finnlandi og að þar í landi hafi þau staðið fyrir ofbeldi og hryðjuverkum. Í skýrslu Ríkislögreglustjóra er þó ekkert minnst á starfsemi hreyfingarinnar hér á landi. Þrátt fyrir umfjöllun fjölmiðla um hreyfinguna haustið 2016 virðist Ríkislögreglustjóri því ekki hafa vitað af starfsemi Norðurvígis hér á landi þegar skýrslan kom út hálfu ári síðar.

Stærstum hluta skýrslu Ríkislögreglustjóra, sem er 22 blaðsíður að lengd, er varið í mat á mögulegri hryðjuverkaógn vegna aukinna fólksflutninga til Íslands. Orðið „hælisleitandi“ kemur fyrir 20 sinnum í skýrslunni og „flóttafólk“ eða „flóttamaður“ mun oftar. Hins vegar leggur Ríkislögreglustjóri ekkert mat á mögulega hættu sem íslensku samfélagi kann að stafa af öfgafullum þjóðernissinnum.

Hryðjuverk öfgahópa á hægri væng stjórnmálanna eru talin ein stærsta ógn sem steðjar að vestrænum lýðræðisríkjum. Ríkislögreglustjóri virðist ekki telja að sú ógn nái einnig til Íslands þrátt fyrir að hingað til lands séu komnar hreyfingar sem hafa tengsl við hryðjuverk og pólitískt ofbeldi í nágrannalöndum okkar. Þetta vekur óneitanlega upp spurningar um hvort íslensk lögregluyfirvöld séu sofandi gagnvart útbreiðslu öfgafullrar þjóðernishyggju hér á landi og þeim hættum sem henni kann að fylgja.

Hvergi er minnst á tvö helstu kosningamál Bjartrar framtíðar í nýrri stjórnmálaályktun sem samþykkt var á ársfundi flokksins í gær. Hvergi er minnst á þjóðaratkvæðagreiðslu um áframhald aðildarviðræðna við Evrópusambandið eða uppboð aflaheimilda í ályktuninni.

Stefna flokksins víkur fyrir stefnu ríkisstjórnarinnar

Í sjávarútvegskafla kosningastefnu Bjartrar framtíðar kemur skýrt fram að flokkurinn vilji fara uppboðsleið í sjávarútvegi:

Við teljum að rétt sé til að byrja með að nota báðar leiðir, þ.e. veiðigjöld og uppboð, þ.e. úthluta hluta fiskveiðikvóta með þeim aðferðum sem nú ert gert en með endurskoðuðum veiðigjöldum og úthluta hluta kvótans á grundvelli uppboða.

Í stjórnmálaályktuninni sem ársfundur flokksins samþykkti í gær kveður hins vegar við annan tón. Svo virðist sem flokkurinn hafi lagt sína eigin stefnu til hliðar og tekið upp stefnu ríkisstjórnarinnar í sjávarútvegsmálum. Ekki má sjá að nein áhersla sé lögð uppboðsleið í sjávarútvegi:

Björt framtíð telur mikilvægt að sú vinna sem er í gangi á vegum sjávarútvegsráðherra um að kanna kosti þess að í auknum mæli verði byggt á langtímasamningum við úthlutun aflaheimilda og að tryggja betur að gjald fyrir aðgang að sameiginlegri auðlind verði í eðlilegu hlutfalli við afrakstur veiðanna ljúki sem fyrst og hafist verði handa við tillögugerð og framkvæmdir.

Áhersla á þjóðaratkvæðagreiðslu horfin

Í kosningastefnu Bjartrar framtíðar kemur m.a. þetta fram um aðild að Evrópusambandinu:

Björt framtíð leggur áherslu á að landa góðum samningi við ESB sem þjóðin getur eftir upplýsta umræðu, samþykkt í þjóðaratkvæðagreiðslu.

Í stjórnmálaályktuninni sem samþykkt var í gær er ekki einu orði minnst á þjóðaratkvæðagreiðslu:

Björt framtíð er Evrópusinnaður flokkur. Við erum staðföst í þeirri trú okar að Íslandi sé betur borgið innan Evrópusambandins en utan þess. Ísland er hluti af Evrópu landfræðilega, efnahagslega og menningarlega!

Skortir pólitíska sannfæringu

Bæði Björt framtíð og Viðreisn fengu mikla gagnrýni á sig þegar flokkarnir mynduðu ríkisstjórn með Sjálfstæðisflokknum. Í stjórnarsáttmála hinnar nýju ríkisstjórnar var hvergi minnst á uppboðsleið í sjávarútvegi og þjóðaratkvæðagreiðsla um ESB var sett á ís þar til í lok kjörtímabilsins.

Maður hefði því haldið að Björt framtíð myndi nýta tækifærið á fyrsta ársfundi sínum frá kosningum til að skerpa á þessum stefnumálum sínum. Í staðinn virðist flokkurinn hafa valið að leggja þessi mál algjörlega til hliðar. Þetta staðfestir endanlega það sem marga hefur grunað, að Björt framtíð hefur enga pólitíska sannfæringu eða hugsjón.

Bandaríski rasistinn Robert Spencer er á leiðinni til landsins. Hann heldur fyrirlestur á Grand Hótel Reykjavík 11. maí næstkomandi í boði Vakurs — samtaka um evrópska menningu. Spencer hefur um árabil stundað hræðsluáróður gegn múslimum og var norska hryðjuverkamanninum Anders Behring Breivik innblástur. Nafn Spencers kemur margoft fyrir í riti Breiviks, 2083 — A European Declaration of Independence.

Gegn “íslamvæðingu Bandaríkjanna”

Robert Spencer er einn stofnanda haturssamtakanna Stop Islamization of America, eða Stöðvum íslamvæðingu Bandaríkjanna. Meðal þess sem samtökin hafa lagt áherslu á er að berjast gegn byggingu Park51, fyrirhugaðrar félagsmiðstöðvar múslima á Manhattan. Þá hafa samtökin staðið fyrir reglulegum auglýsingaherferðum gegn múslimum í almenningssamgöngukerfum New York-borgar.

Innblástur að hryðjuverkum

Skrif Spencers voru norska hryðjuverkamanninum Anders Behring Breivik innblástur er hann framdi mannskæðustu hryðjuverkaárás í sögu Noregs þann 22. júlí 2011. Breivik myrti 77 manns, þar af 50 börn, er hann sprengdi sprengju við stjórnarráð Noregs og hóf skothríð í sumarbúðum AUF, ungliðahreyfingar norska verkamannaflokksins, í Útey. Alls vitnaði Breivik 64 sinnum í skrif Spencers í riti sínu, 2083 — a European declaration of independence. “Varðandi Islam mæli ég með öllu eftir Robert Spencer,” skrifaði Breivik.

Meinað að koma til Bretlands

Árið 2013 var Spencer bannað að koma til Bretlands. Þar átti hann að halda fyrirlestur á útifundi á vegum bresku öfga-hægrisamtakanna English defence league. Ákvörðunin um að meina Spencer inngöngu í landið var byggð á orðum hans um að Islam væri “trúarbragð sem heimilar stríð gegn vantrúuðum í þeim tilgangi að koma á samfélagskerfi sem er algjörlega ósamrýmanlegt vestrænu samfélagi”. Koma Spencers til Bretlands var talin líkleg til að valda uppþotum og ofbeldi á götum úti.

Vakur — samtök gegn Islam

Á heimasíðu Vakurs — samtaka um evrópska menningu segir að markmið þeirra sé að vernda og efla þrjár uppsprettulindir vestrænnar siðmenningar: fornmenningu Grikkja og Rómverja, hebreska og kristna lífsskoðun og trúarbrögð, og siði og hugsunarhætti hinna germönsku þjóða. Markmið samtakanna er einnig að “fjalla um stefnur og strauma sem brjóta í bága við grunngildi evrópskrar menningararfleifðar.”

Þröstur Jónsson, ábyrgðarmaður heimasíðunnar www.vakur.is, virðist mjög áhugasamur um Íslam. Á Facebook-síðu sinni skrifar hann m.a.:

“Orsök uppgangs Islam í hinum vestræna heimi undanfarið hefur verið mér mikið áhyggjuefni, einkum fyrir hönd komandi kynslóða. Smám saman fór mér þó að verða ljóst að það er í sjálfu sér ekki við Islam að berjast, heldur stjórnmálaöfl, “háskóla-elítu” og stærstu fjölmiðlana, sem sýna hinu ekki-umburðalynda afli Isalm umburðarlyndi og hvetja jafnvel til Islamiseringar okkar þjóðfélaga.”

Þessi orðræða er keimlík þeirri sem finna má í textum norska hryðjuverkamannsins Anders Behring Breiviks, en hann var yfirlýstur óvinur hinnar svokölluðu stjórnmála-, háskóla- og fjölmiðlaelítu.

Bjarni Benediktsson, forsætisráðherra og fyrrverandi fjármálaráðherra, leyndi tveimur mikilvægum skýrslum fyrir almenningi í aðdraganda síðustu Alþingiskosninga. Skýrslurnar fjalla um tvö stærstu deilumál síðasta kjörtímabils. Önnur er áfellisdómur yfir einni stærstu aðgerð fyrrverandi ríkisstjórnar og hin fjallar um mál sem tengist Bjarna með beinum hætti og varð fyrrverandi ríkisstjórn að falli.

Skýrslan um skattaskjól fjallar um það hvernig efnaðir Íslendingar (m.a. Bjarni Benediktsson) fluttu hundruði milljarða króna út úr hagkerfinu og geymdu í erlendum skattaskjólum. Þá skýrslu fékk Bjarni í hendur a.m.k. þremur vikum fyrir kosningar. Í stað þess að birta hana ákvað hann að leyna henni og sagði svo ósatt um það hvenær hann fékk hana í hendur. Skýrslan átti brýnt erindi við almenning í aðdraganda kosninga og hefði verið mikilvægt innlegg í umræðuna um skattaskjól, sérstaklega í ljósi þess að eignir stjórnmálamanna (m.a. Bjarna Benediktssonar) í skattaskjólum var ástæða þess að kjörtímabilið var stytt og gengið var til kosninga.

Hin skýrslan sem forsætisráðherra leyndi kjósendum í aðdraganda kosninga fjallar um leiðréttinguna svokölluðu og hvernig hún skiptist á milli eigna- og tekjuhópa samfélagsins. Þar kemur fram hvernig ríkisstjórn Framsóknar og Sjálfstæðisflokks mokaði skattfé til ríkasta fólks landsins. Alls kostaði leiðréttingin 72,2 milljarða króna og ríkustu 10% landsmanna fengu um þriðjung þeirrar fjárhæðar. Að forsætisráðherra haldi því fram að sú skýrsla hefði ekki haft áhrif á kosningarnar er hlægilegt, sérstaklega í ljósi þess að aðgerðin naut aðeins stuðnings 25% þjóðarinnar.

Ljóst er að Bjarni Benediktsson misnotaði vald sitt gróflega og setti flokkshagsmuni fram yfir almannahagsmuni í aðdraganda kosninga. Hann taldi réttilega að skýrslurnar myndu skaða Sjálfstæðisflokkinn í kosningabaráttunni og ákvað því að halda þeim leyndum frá kjósendum. Með því braut hann bæði siðareglur ráðherra og það traust sem nauðsynlegt er að ríki milli kjósenda og ríkisstjórnar. Bjarna er ekki stætt sem forsætisráðherra og á hann að segja af sér.

Guðlaugur Þór Þórðarson, nýr utanríkisráðherra Íslands, er varaformaður Evrópusamtaka íhaldsmanna og umbótasinna (ACRE). Á meðal systurflokka Sjálfstæðisflokksins í samtökunum eru ýmsir flokkar sem þekktir eru fyrir útlendingaandúð, mannréttindabrot og andstöðu við fóstureyðingar.

Sjálfstæðisflokkurinn gekk í ACRE árið 2011 og Guðlaugur var kjörinn varaformaður samtakanna árið 2015. Í samtökunum má finna marga vafasama flokka á borð við Likud í Ísrael, Lög og réttlæti í Póllandi, Réttlætis- og þróunarflokkinn í Tyrklandi og Sanna Finna í Finnlandi.

Pólski íhaldsflokkurinn Lög og réttlæti stóð fyrir umdeildri lagasetningu gegn fóstureyðingum á síðasta ári. Af því tilefni sendu íslenskir þingmenn mótmælabréf til pólska þingsins en hvorki Guðlaugur Þór né Bjarni Benediktsson, formaður Sjálfstæðisflokksins, skrifuðu undir bréfið.

Likud er flokkur Benjamin Netanyahu, forsætisráðherra Ísraels. Likud viðurkennir ekki Palestínuríki og hefur staðið að ólöglegum landnemabyggðum Ísraela á hernumdum svæðum Palestínu. Í þessari viku undirritaði Netanyahu samkomulag um byggingu 2.500 nýrra íbúða á hinum hernumda Vesturbakka. Guðlaugur Þór sat í utanríkismálanefnd Alþingis þegar Ísrael gerði síðast sprengjuárásir á Gaza sumarið 2014. Þá studdi hann ekki bókun minnihluta nefndarinnar, þar sem árásirnar voru fordæmdar.

Réttlætis- og Þróunarflokkurinn, eða AKP, er flokkur Recep Erdogans Tyrklandsforseta. Erdogan hefur um árabil sótt harðri gagnrýni fyrir alræðistilburði og mannréttindabrot. Eftir misheppnaða valdaránstilraun í landinu hefur Erdogan fyrirskipað handtökur á yfir 70.000 manns. Þar á meðal eru dómarar, háskólaprófessorar og blaðamenn.

Þá hafa Sannir Finnar sótt harðri gagnrýni fyrir útlendingaandúð og rasisma. Flokkurinn er andsnúinn komu flóttafólks til Finnlands og þingmenn hans hafa reglulega orðið uppvísir að fordómum og hatursorðræðu gegn minnihlutahópum.

Oddný Harðardóttir, þingflokksformaður Samfylkingarinnar, hvatti í vikunni íslenska stjórnmálaflokka til að “tengjast ekki með nokkrum hætti popúlískum öfgaflokkum eða þjóðernissinnum” í Evrópu. Þar beindi hún orðum sínum óbeint að Sjálfstæðisflokknum og tengslum hans við þá öfgaflokka sem nefndir voru hér að ofan.