სოციალური ქსელი Instagram-ი ადგილობრივი ბიზნესების აღმოჩენას გეოგრაფიული მდებარეობითა და განახლებული რუკით ამარტივებს. 

ახალი განახლების მიხედვით, Instagram-ის რუკა საშუალებას გვაძლევს მოვძებნოთ პოპულარული ბიზნესები ჩვენს გარშემო და გავფილტროთ ისინი კატეგორიების მიხედვით.

Meta-ს აღმასრულებელი დირექტორი, მარკ ცუკერბერგი ახალი რუკების ვიზუალს და ინფორმაციას გვიზიარებს:

ადრე Instagram-ის რუკაზე მხოლოდ იმ პოსტების ნახვა შეგვეძლო, რომლებსაც ადგილმდებარობა ჰქონდათ მონიშნული. ახლა კი, რუკაზე შეგვიძლია ვიხილოთ ბიზნესების მდებარეობა და მარტივად გადავიდეთ მათ Instagram გვერდზე. 

Instagram-ის რუკაზე ბიზნესების მოძებნა ძალიან მარტივია – უბრალოდ ჩაწერეთ ქალაქი და დაათვალიერეთ რუკაზე მონიშნული რესტორნები, სასტუმროები თუ სხვა.

როგორც იცით, იმისათვის რომ Google Maps-ზე თქვენი ბიზნესის ლოკაცია მონიშნოთ, უნდა დაარეგისტრიროთ Google Business Profile და პროფესიონალურად შეავსოთ ყველა ინფორმაცია. სწორედ ასე მუშაობს Instagram-ის რუკაც. იმისათვის, რომ Instagram-ის რუკაზე თქვენი ბიზნესი დააფიქსიროთ, უნდა მიუთითოთ სწორი მისამართი, საკონტაქტო ინფორმაცია და ა.შ.

Instagram-ის რუკა VS Google-ს ბიზნეს პროფილი

პრაქტიკულად Instagram-ის რუკა და Google Maps-ი დიდად არ განსხვავდება. თუ ბიზნესზე ავთენტურ ინფორმაციას ეძებს, Instagram-ის რუკის მოხმარება შესაძლოა მეტად მომხიბვლელი იყოს. ამ შემთხვევაში, შეძლებთ დაათვალიეროთ ბიზნესის სოციალური ქსელი, მომხმარებლების ფოტოები გადაღებული მათ ლოკაციაზე და ა.შ. ერთადერთი, რასაც Instagram-ზე დიდად ვერ ნახავთ, არის მომხმარებლების მიმოხილვები (Review). 

როგორც რამდენიმე დღის წინ ავღნიშნე, TikTok-ი კონკურენციას Google-ს საძიებო სისტემას უწევს. სავსებით შესაძლებელია, რომ Instagram-ის ამ განახლებამ Google-ს ახალგაზრდა მომხმარებლების გარკვეული რაოდენობაც დააკარგინოს. 

ამ ცვლილებას Google-ს ვიცე პრეზიდენტიც გამოეხმაურა: “ჩვენი კვლევის თანახამად, ახალგაზრდების დაახლოებით 40% Google Maps ან Search-ს აღარ იყენებს. ისინი მათთვის საინტერესო ინფორმაციას TikTok-სა და Instagram-ზე ეძებენ.”