"Багшийн дээдийн ТҮЦ-т ном зардаг байсан зарим иргэн Номын худалдааны төвд орсон. Бусдыг нь нүхэн гарц, оффист байршуулна"

Багшийн дээд орчмын ТҮЦ-т номын худалдаа эрхэлж байсан 14 иргэнд Сүхбаатар дүүргийн наймдугаар хорооны “Номын худалдааны төв"-д талбай гаргаж, худалдаагаа үргэлжлүүлэхийг санал болгосноос ес нь тус төвд үйл ажиллагаа явуулж эхэлжээ.

Энэ тухай УБЗАА-ны Хүнс, худалдаа, үйлчилгээний газрын дарга Ж.Дуламсүрэн "Нийслэлийн Засаг даргын захирамжийн дагуу нийтийн эзэмшлийн зам талбайд зөвшөөрөлгүй үйл ажиллагаа явуулж байгаа ТҮЦ-ийг нүүлгэх болон бусад зөрчлийг арилгуулж байна.

Сүхбаатар дүүрэгт байгаа 208 ТҮЦ-ээс 158-ыг нүүлгэсэн. Багшийн дээд орчмын ТҮЦ-т 14 иргэн шинэ, хуучин ном худалдаалдаг. Эдгээр иргэн ТҮЦ-ийг чөлөөлсөн талбай дээрээ номоо ил задгай худалдаалж байсан тул зах худалдааны төвүүдэд байршуулах, мэргэжил шаардахгүй ажлын байраар хангах зэрэг саналыг тавьсан юм.

Харин тэдний зүгээс Багшийн дээд орчимд оюутан сурагчдын төвлөрсөн цэг болохоор тус байршилд номоо худалдах саналыг хэлж буй ч 14 иргэнээс ес нь “Номын худалдааны төв"-д үйл ажиллагаагаа явуулж эхэллээ. Бусад иргэнийг олны хөл дагасан газарт буюу нүхэн гарц, Багшийн дээд орчмын худалдааны төв болон оффист байршуулахаар судалж байна. 

Номын худалдааны төв нь 2014 онд хотын ерөнхий менежерийн тушаалаар үйл ажиллагаагаа эхлүүлсэн бөгөөд 54 түрээслэгч байдаг" гэж ярилаа.

Сүхбаатар дүүргийн ЗДТГ-аас ТҮЦ-ийг нь нүүлгэсэн иргэдэд 16 байгууллагын 78 ажлын байрыг санал болгожээ.