"Бишрэлт Металл" баг гурав дараалсан хожигдлоос эргэн ирж, цувралын тооны харьцааг тэнцүүллээ
Монголын Сагсан Бөмбөгийн Холбооны Үндэсний Дээд лигийн хагас шигшээ цуврал үргэлжилж байна. Энэ шатанд учраа таарсан "Эс Жи Эйпс", "Бишрэлт Металл" багийн зургаа дахь тоглолт өнөөдөр "М банк арена"-д боллоо.
Тус тоглолтод "Бишрэлт Металл" баг 110:97 онооны харьцаатай "Эс Жи Эйпс" багийг хожсоноор цувралын долоо дахь тоглолт гарахаар болж байна. "Бишрэлт Металл" багийн хувьд гурав дараалсан хожигдлоос ийнхүү эргэн ирж, цувралын тооны харьцааг 3:3 болгож чадлаа. Хоёр багийн шийдвэрлэх долоо дахь тоглолт энэ Баасан гарагийн үдэш зохион байгуулагдах хуваарь гарчээ.
Хожигдох эрхгүй байсан "Бишрэлт Металл" баг эхний хагасыг есөн онооны зөрүүтэй буюу 43:52-оор хожигдож өндөрлүүлсэн. Үргэлжлүүлэн тоглолтын хоёрдугаар хагаст багаараа нягт тоглосноор өрсөлдөгч "Эс Жи Эйпс" багийг 13 оноогоор илүүрхэж хожлоо.
Өнөөдрийн тоглолтын шилдгээр "Бишрэлт Металл" багийн импорт тоглогч Б.Уэсли тодорч байна. Тэрбээр тоглолт дууссаны дараа "Бидэнд дахин нэг тоглолт үлдсэн. Дараагийн тоглолтдоо бэлдэх болно. Хөгжөөн дэмжигчдэдээ хандаж хэлэхэд бид та нарт дахин нэг тоглолт бэлэглэлээ" хэмээн ярилаа.
Энэ хоёр багийн аль хожсоныг нь аваргаа хамгаалагч "Хасын Хүлэгүүд" баг хүлээж байгаа.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
