Ohcejohka lea dat gielda, gos leat unnimusat nissonáirasat ođđa váldostivrras. Boahttevaš váldostivrras čohkká dušše okta nissonáirras, Vuokko Tieva-Niittyvuopio Guovddášbellodagas.
Son lea movtta go beasai váldostivrii vaikko leage doppe áidna nissonolmmoš.
– Livččen dieđusge sávvan, ahte eanetge nissonolbmot livčče leamaš evttohassan ja válljejuvvon váldostivrii.
Ohcejoga váldostivrras leat oktiibuot 15 áirasa. Ovddit váldostivrras ledje vihtta nissonáirasa: Anni Ahlakorpi, Pirjo Konttinen, Marjatta Kordelin, Laura Niittyvuopio-Valle ja Eeva Nuorgam.
Ahlakorpi, Kordelin, Niittyvuopio-Valle ja Nuorgam eai lean dáid gieldaválggain evttohassan. Konttinen fas válljejuvvui várreáirrasin ođđa badjái.
Dásseárvolága deavdin váikkuha gielddalaččaid ovddastussii lávdegottiin
Tieva-Niittyvuopio sáhttá dušše árvaladdat mii lea sivvan dasa, ahte dáid válggain ledje Ohcejogas unnán nissonevttohasat. Olles riikkas váldostivraáirasiin sullii 55 proseantta leat almmáiolbmot ja 45 proseantta nissonolbmot.
Dáid válggaid ledje Ohcejogas oktiibuot vihtta nissonolbmo evttohassan. Tieva-Niittyvuopio mielas siva nissoniid uhccánaš mearrái fertešii guorahallat maiddái ráhkadusaid bokte.
– Galhan dát lea demokratiijaváili. Mis lea dásseárvoláhka, ja dál eat moge bastte deavdit dan lávdegottiid ovddastusas. Dalle mii šaddat váldit áirasiid olggobealde, ja dalle gieldalaččaid ovddastusmandáhta báhcá váilut, son čilge.
Son barggai guhká Ohcejoga gielddahoavdan, muhto hálida ain joatkit gieldapolitihkas dán háve politihkkárin iige virgeolmmožin.
– Mus lea várra dakkár luondu, ahte hálidan leat váikkuheamen oktasaš áššiide. Dál dovden, ahte hálidan bargat báikkálaš dásis gieldda áššiiguin inge danin vuolgán šat guovloválggaide evttohassan.
Nuoramus evttohas beasai ođđa váldostivrii
Ohcejoga gieldaválggain nuoramus evttohas lei dán háve 18-jahkásaš Lávra Länsman Gurutlihtus. Son lea okta olles riikka 29 váldostivraáirasis, geat leat aiddo deavdán 18 jagi.
– Ledjen hirpmahuvvan go bessen čađa, muhto lean duođai giitevaš ja lihkolaš ahte maiddái nuorain lea dákkár vejolašvuohta Ohcejogas, Länsman lohká.
Ohcejoga ođđa váldostivrra áirasiid gaskamearalaš ahki lea dál 54. Ovddit bajis dat lei 55 jagi.
Olles riikkas váldostivraáirasiid gaskamearalaš ahki lea 51, mii lea seamma go ovddit gielddaválggain.
Länsman lohká leat buriin mielain mannamin váldostivrii. Doppe son hálida bargat nuoraid áššiid ovdii.
– Hálidan, ahte mis bissot dáppe skuvlenvejolašvuođat ain boahttevuođas, ja ahte nuorain livčče maiddái astoáiggefálaldagat dáppe.
Nuoramus váldostivraáirrasin Länsman lea ráhkkanan dasa, ahte šaddá rahčat dan ovdii vai jienas gullot váldostivrras.
– Sihkkarit olbmuin leat ovdagáttut mu agi dihte, muhto iskkan leat beroškeahttá.
Gielddapolitihkkii son hálidii álgit danin go eai lean eará nuorra evttohasat.
– Dáthan lea mu ruoktogielda. Hálidan, ahte nuorat birgejit ja loktet dáppe Ohcejogas.