"Урт цагааны гурван давхар объектод орох үйлчилгээний төвүүдийг нийслэлийн холбогдох байгууллага шийднэ"
Урт цагааны цэцэрлэгт хүрээлэнгийн хажууд баригдаж буй гурван давхар үйлчилгээний барилгыг есдүгээр сард ашиглалтад оруулах бөгөөд нийслэлийн холбогдох байгууллагууд тухайн объектод орох үйлчилгээний төвүүдийн асуудлыг шийдэх юм байна.
Энэ тухай Нийслэлийн Хөрөнгө Оруулалтын Газрын дарга Б.Мөнхбат "Чингэлтэй дүүргийн гуравдугаар хорооны нутаг дэвсгэр, Жуулчны гудамжинд байрлах Урт цагааны барилгыг буулгаж, шинээр авто зогсоол, цэцэрлэгт хүрээлэн, үйлчилгээний барилга барих ажлын гүйцэтгэл нэлээдгүй хувьд хүрсэн.
Уг тохижилт нь 109 автомашины далд зогсоол, иргэдэд зориулсан ногоон байгууламж бүхий цэцэрлэгт хүрээлэн, гурван давхар барилгаас бүрдэж байгаа юм. Долдугаар сарын 1-ний дотор ногоон байгууламж бүхий цэцэрлэг хүрээлэнг нээнэ.
Харин гурван давхар объектод тухайн байгууламжийн дэд бүтцийн узелийн өрөөнүүд, жуулчдад зориулсан мэдээллийн төв болон монгол үндэсний үйлдвэрлэгчдийн бүтээгдэхүүний талбай, хүүхдийн цэцэрлэг байх юм.
Барилгын тодорхой хэсгийг үйлчилгээний зориулалтаар ашиглахаар төлөвлөсөн. Ашиглалтад орсны дараа нийслэлийн холбогдох байгууллагууд тухайн объектод орох үйлчилгээний төвүүдийн асуудлыг шийднэ. Үйлчилгээний төвийн барилгын заслын ажлыг эхлүүлэхээр ажиллаж байна" гэж мэдээллээ.
Энэхүү гурван давхар барилга нь 30х32 хэмжээтэй баригдаж байгаа аж.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
