"The MongolZ" баг 1 сая ам.долларын шагналын сантай "IEM Melbourne 2025" тэмцээнд эхний хожлоо авлаа
Цахим спортын "Counter Strike 2" тоглоомын өндөр чансаатай "Intel Extreme Masters Melbourne 2025" тэмцээн Австралийн Мельбурн хотод өнөөдөр эхэллээ.
Нийт нэг сая ам.долларын шагналын сантай тус манай улсын "The MongolZ" баг Азийн чансааны оноогоор уригдан оролцож байгаа юм. Энэ тэмцээнд 16 баг хоёр хэсэгт хуваагдсан бөгөөд хоёр хожигдвол тэмцээнээс хасагдана. Хоёр хэсгээс тус бүр гурван баг Playoffs буюу хасагдах шатанд тоглох эрхтэй.
"The MongolZ" багийн хувьд А хэсгийн эхний тоглолтоо АНУ-ын "Complexity" багтай "Во3" (гурван "map"-аар ялагчийг тодруулах) журмаар өнөөдөр тоглож, 2:1-ээр хожлоо.
Манай улсын баг "Complexity"-ийн сонгосон "Anubis map" дээр 13:11-ээр хожигдсон бол өөрсдийнхөө сонгосон "Ancient map" дээр нэмэлт үе гаргаж хожсон. Улмаар тоглолтын ялагчийг шийдэх сүүлийн "Inferno map" дээр 13:10-аар хожиж байна.
Ингэснээр тэд Playoffs-д шалгарахын төлөө Европын "FaZe Clan" багтай маргааш 11:45 цагт тоглохоор болж байна. Хэрэв хожвол А хэсгээс нэгдүгээр байраар гарах эсэхээ шийдэх тоглолтыг хийнэ. Харин ялагдвал хэсгийн шатнаас доод хүснэгт рүү унаж, хожигдох эрхгүй тоглолтыг хийх болно.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
