“10 автобусыг ойролцоогоор нийт гурван тэрбум гаруй төгрөгөөр авч байгаа. Татварууд нэмэгдэж, эцсийн дүн гарна"

Улаанбаатар хот БНХАУ-ын “Yutong Bus” компанийн үйлдвэрээс 10 автобусыг худалдаж авч байгаа тухай мэдээлсэн.

Эдгээр автобусыг хэчнээн төгрөгөөр худалдаж авч байгааг Нийтийн Тээврийн Бодлогын Газрын захиргаа, удирдлагын хэлтсийн дарга З.Цэвээндоржоос тодруулахад "“Yutong Bus компанийн үйлдвэрээс 10 автобусыг Нийтийн Тээврийг Хөгжүүлэх Санд төвлөрсөн орлогоос ойролцоогоор нийт гурван тэрбум гаруй төгрөгөөр авч байгаа. Татварууд нэмэгдэж эцсийн дүн тодорхой гарна" гэв.

Нийтийн Тээврийг Хөгжүүлэх Сангийн/НТХС/ тухайд тэрбээр "2023 онд улс, нийслэлийн төсвийн хөрөнгөөр худалдаж авсан 600 автобусны эргэн төлөлт, элэгдэл хорогдлын шимтгэл, 2009 оны 400 автобусны тодорхой төлбөрүүд, нийтийн тээврийн үйлчилгээнд явж байгаа автобусны зар, сурталчилгааны орлогыг Нийтийн Тээврийг Хөгжүүлэх Санд төвлөрүүлж байна. Тус санд төвлөрсөн орлогоос 2024 онд “Yutong Bus” компанийн үйлдвэрээс 31 ширхэг угсраа автобусыг худалдаж авч, үйлчилгээнд явуулж эхэлсэн.

Энэ онд 10 ширхэг автобусыг худалдаж авч, хот орчмын буюу Багахангай, Багануур дүүрэг болон "Чингис хаан" олон улсын нисэх буудал чиглэлд явуулах бэлтгэл ажлыг хангаж байна.

Нийтийн тээврийн үйлчилгээний парк шинэчлэлтээс гадна чиглэлийн тээврийн хэрэгслийн эгнээ, зогсоолыг тохижуулах, тус салбарын ажилтан, албан хаагчдын сургалт, эрдэм шинжилгээний бага хурлыг зохион байгуулахад НТХС-гийн хөрөнгөөс зарцуулах хуулийн зохицуулалттай" гэж ярилаа.

Нийтийн тээврийг хөгжүүлэх санг 2015 онд байгуулсан ч хөрөнгө захиран зарцуулах хууль эрхзүйн зохицуулалтгүйгээс тус санд төвлөрсөн орлогыг зарцуулж чадахгүй байжээ. 2013 онд "Нийслэл Улаанбаатар хотын замын хөдөлгөөний түгжрэлийг бууруулах, гэр хорооллыг орон сууцжуулах" тухай хууль батлагдсанаар тус сангийн хөрөнгийг зарцуулах боломж нээгдсэн болохыг тайлбарласан юм.