"Олимп, дэлхийн аваргын алт, мөнгө, хүрэл медальт уран гулгалтын тамирчид Монголд ирж, үзүүлбэрээ үзүүлнэ"
“Дэлхийн уран гулгалтын одод Монголд” тоглолт тавдугаар сарын 24, 25-нд Степпэ Аренад болох талаар зохион байгуулагчдын төлөөлөл өнөөдөр мэдээллээ.
Дээрх тоглолтод
- Evgenia Medvedeva
- Alexei Yagudin
- Nikita Katsalapov
- Victoria Sinitsina тэргүүтэй уран гулгалтын тамирчид хүрэлцэн ирж, үзүүлбэрээ үзүүлэх аж.
"Энэ удаагийн тоглолтод мэргэжлийн 13 уран гулгагч тамирчин хүрэлцэн ирнэ"
Зохион байгуулагчдын зүгээс "Дэлхийн аварга, олимпын наадмаас алт, мөнгө, хүрэл медаль хүртсэн шилдэгт тооцогдох уран гулгалтын тамирчдыг урьж авчирна.
Тоглолт эхлэх өдрөөс хоёр хоногийн өмнө буюу тавдугаар сарын 22-нд тамирчид маань Улаанбаатар хотод ирнэ. Тэр үед төлөөллүүдээ урьж, дэлхийн шилдэг тамирчдаа танилцуулах арга хэмжээг дахин зохион байгуулна.
Энэ удаагийн тоглолтод мэргэжлийн 13 уран гулгагч тамирчин хүрэлцэн ирнэ. Монгол, ОХУ, Гүрж, Беларусь улсын тамирчид тоглолтод оролцохоор бэлтгэл ажил хангагдсан.
Эдгээр тамирчин олимп, дэлхийн аварга, европын аваргаас нийт 29 алтан медальтай. Мөн таван мөнгөн медаль, найман хүрэл медальтай өндөр үзүүлэлттэй тамирчид байгаа юм.
Онцолж нэр дурдвал:
- Evgenia Medvedeva нь Олимпын наадмын хос мөнгөн медаль, дэлхийн хоёр удаагийн аварга, Европийн хоёр удаагийн аварга, Гран-при хоёр удаагийн аварга тамирчин.
- Alexei Yagudin нь Олимпын аварга, дэлхийн дөрвөн удаагийн аварга, Европийн гурван удаагийн аварга.
Энэ төрлийн спортыг эх орондоо хэрхэн яаж түгээн дэлгэрүүлэх вэ гэдэг үүднээс Монголынхоо дуучид, артистуудтай хамтран ажиллаж байна.
Түүнчлэн "Номин талст" хамтлагийн дуучин А.Хаянхярваа тоглолтод урилгаар оролцоно. Алдарт хосын төрөл буюу Nikita Katsalapov, Victoria Sinitsina хоёртой хамтарсан үзүүлбэрт оролцох төлөвлөгөөтэй бэлтгэл ажлыг хангаж байна.
Тасалбарыг Ticket.mn-ээс захиалах боломжтой бөгөөд эгнээ, суудлаасаа хамааран 100,000-150,000 төгрөгийн үнэтэй байгаа" гэлээ.
"Монголын уран гулгагч О.Мишээл маань эх орноо төлөөлөн үзүүлбэр үзүүлнэ"
"Степпэ Арена"-гийн менежер н.Санчир "Манайх гурав дахь удаагаа уран гулгалтын бүтэн тоглолтыг зохион байгуулахаар ажиллаж байна.
- Эхний уран гулгалтын шоу 2023 оны нэгдүгээр сард Япон-Монголын хамтарсан тал нутгийн мөсөн шоу нэртэй болж байсан.
- Хоёр дахь удаагийнх нь 2023 оны тавдугаар сард “Уран гулгалтын одод Монголд” нэртэйгээр ОХУ-ын уран гулгалтын шилдэг шигшээ багт ордог 17 тамирчин оролцсон.
- Гурав дахь удаагийнхыг ийнхүү тавдугаар сарын 24, 25-нд зохион байгуулах гэж байна. Уран гулгалтын шоуг хийхэд мөсөн дээрх бэлтгэлийг маш олон удаагийн давтамжтай хийх шаардлагатай байдаг.
Энэ тоглолтын үеэр Монголын уран гулгагч О.Мишээл маань эх орноо төлөөлөн үзүүлбэр үзүүлнэ" гэв.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
