ОХУ-аас онгоцны түлш авах тухай 20 жилийн хугацаатай хэлэлцээрийг Эдийн засгийн байнгын хороо дэмжсэнгүй

Гэрэл зургийг MPA агентлагийн онцгой зөвшөөрөлтэйгөөр ашиглав

Эдийн засгийн байнгын хорооны өнөөдрийн хуралдаанаар “Монгол Улсад агаарын хөлгийн түлш нийлүүлэх тухай Монгол Улсын Засгийн газар болон Оросын Холбооны Улсын Засгийн газар хоорондын хэлэлцээр”-ийн төслийг хэлэлцэв. 

Уг хэлэлцээрт ОХУ манай улсад 20 жилийн хугацаанд агаарын хөлгийн шатахуун нийлүүлэх бөгөөд хоёр улсын хамтарсан компани "Чингис хаан" олон улсын нисэх буудлын дэд бүтцийг удирдах болон ашиглах асуудлыг хариуцах тухай заажээ. Хамтарсан компанийн 60 хувь нь Монголынх, 40 хувийг Оросууд эзэмших аж. Монголын талаас "Эрчис ойл" ХХК, Оросын талаас НК Роснефть компаниуд энэхүү хамтралд багтана. 

Өнгөрөгч долоо хоногт тус байнгын хороогоор уг асуудлыг хэлэлцсэн УИХ дахь АН-ын бүлэг гурав хоногийн завсарлага авсан юм. Завсарлагын хугацаа өнөөдөр дуусаж, үргэлжлүүлэн хэлэлцсэн нь энэ. 

ОХУ-тай байгуулах хэлэлцээрийн талаар УИХ-ын гишүүн О.Цогтгэрэл "АН-ын бүлгээс энэхүү гэрээг зөвшөөрөх боломжгүй гэдэг шийдвэр гаргасан. Эдийн засгийн байнгын хорооны саналыг Аюулгүй байдал гадаад бодлогын байнгын хороо хэлэлцэнэ. Ингээд АБГББХ дэмжвэл энэ асуудал нэгдсэн чуулганы руу орохгүйгээр Засгийн газар хоорондын хэлэлцээр болох зохицуулалттай. Тиймээс манай байнгын хороо дэмжихгүй санал гаргавал асуудлыг нэгдсэн чуулганаар хэлэлцэх боломжтой болно. Тэгэхээр энэ асуудлыг дэмжихгүй гэдэг санал гаргаад нэгдсэн чуулганаар хэлэлцүүлье" гэдэг санал гаргав. 

Санал хураалт явуулахад хуралдаанд оролцсон гишүүдийн олонх Онгоцны түлш нийлүүлэх Засгийн газар хоорондын хэлэлцээрийг дэмжсэнгүй. Ийнхүү дэгийн тухай хуулиар уг хэлэлцээрийг АБГББХ-гоор хэлэлцээд үргэлжлүүлэн УИХ-ын чуулганы хуралдаанаар шийдэхээр болов.