Трамп төв банкныхаа ерөнхийлөгчтэй харгалдсаны дараа АНУ-ын хөрөнгийн зах зээл, бонд, доллар огцом уналаа

АНУ-ын ерөнхийлөгч Дональд Трамп, Холбооны Нөөцийн Банкны ерөнхийлөгч Жером Пауэл

Даваа гарагт АНУ-ын хөрөнгийн зах зээлийн индексүүд, бондын ханш огцом унаж, долларын ханш сүүлийн гурван жилийнхээ хамгийн доод цэгт хүрэв.

Ерөнхийлөгч Трамп өчигдөр Холбооны Нөөцийн Банкны ерөнхийлөгч Жером Пауэлын эсрэг хурц үгтэй мэдэгдэл хийсэн нь АНУ-ын төв банкны хараат бус байдал алдагдах вий гэсэн болгоомжлолыг хөрөнгө оруулагчдын дунд үүсгэсэн юм.

Трамп сошиал хуудсандаа төв банк бодлогын хүүг бууруулалгүй хэтэрхий удаан барьж байгааг шүүмжлээд Пауэлыг “томоохон ялагдагч” хэмээн хочилсон байна.

Өнгөрсөн долоо хоногт Пауэл хэлсэн үгэндээ Трампын худалдааны дайн АНУ-ын эдийн засагт сөргөөр нөлөөлөх магадлалтайг анхааруулж байв.

Үүний хариуд Трамп түүний бүрэн эрхийн хугацаа дуусахад хэтэрхий хол байгаад харамсал илэрхийлж байлаа.

Жером Пауэлын бүрэн эрхийн хугацаа 2026 оны тавдугаар сард дуусах бөгөөд АНУ-ын ерөнхийлөгчид түүнийг хугацаанаас нь өмнө чөлөөлөх шууд эрх мэдэл байдаггүй.

Даваа гарагт S&P 500 индекс 2.7, Dow Jones Industrial Average индекс 2.5, Nasdaq Composite индекс 2.6 хувиар тус тус унажээ.

АНУ-ын сангийн яамны 10 ба 30 жилийн хугацаатай бондуудын ханш тус бүр 4.41 ба 4.91 хувиар унасан байна.

Ам.долларын ханш евро болон иений эсрэг 5-аас дээш хувиар тус тус унажээ.

Холбооны Нөөцийн Банкны ерөнхийлөгчийг албан тушаалаас нь чөлөөлөх арга замуудыг Трамп судалж эхэлсэн тухай Баасан гарагт албаны зарим эх сурвалжууд мэдээлсэн юм.

АНУ-ын зах зээлийн уналттай зэрэгцэн хөрөнгө оруулагчид эрсдэл багатай хөрөнгө сонгосны улмаас алтны ханш өчигдөр түүхэн дээд хэмжээндээ хүрч (унц нь $3,429) өссөн бол биткоины ханш $88,000 хүрсэн нь гуравдугаар сараас хойших хамгийн дээд түвшин болжээ.

Эх сурвалж: Business Insider