Москвагийн шүүх Оросын хамгийн баян эмэгтэйд салсан нөхрийнх нь эзэмшил хувийг шилжүүлэх шийдвэр гаргажээ
Москва хотын шүүх Оросын хамгийн баян эмэгтэй Татьяна Кимд салсан нөхөр Владислав Бакальчукийнх нь эзэмшдэг хувийг шилжүүлэх шийдвэр гаргасан тухай онлайн худалдааны Wildberries компани өчигдөр зарлажээ.
Москва хотын Савёловксий дүүргийн шүүх Wildberries компанид эзэмшдэг Бакальчукийн нэг хувийг Кимд шилжүүлэх шийдвэр гаргасан юм байна.
Ингэснээр Ким компанийнхаа 100 хувийг эзэмшдэг болж байгаа ажээ.
Ким, Бакальчук нарын гэр бүлээ салгах үйл явц энэ оны хоёрдугаар сард өндөрлөсөн юм.
Өнгөрсөн оны зун Wildberries компани гадаа орчны зар сурталчилгааны үйл ажиллагаа явуулдаг Russ Group нэртэй компанитай нэгдэх гэнэтийн шийдвэр гаргасан нь тэдний маргаан зөрчлийг эхлүүлсэн байна.
Энэ маргаанд Чеченийн удирдагч Рамзан Кадыров нөхрийнх нь талд орж, есдүгээр сард Wildberries компанийн төв байранд хүний амь хохироосон буудалцаан болж байлаа.
ОХУ-ын ерөнхийлөгч Путин 2024 оны зургаадугаар сард хоёр компанийн нэгдлийг зөвшөөрөх шийдвэр гаргасан ч эзэмшигч гэр бүлийн дотоод маргаанд оролцохоос зайлсхийж байжээ.
Тухайн үед Wildberries болон Russ Group хоёр тэдний нэгдэл Өрнөдийн технологийн аварга компаниудтай өрсөлдөж, Оросын эдийн засагт чухал нөлөө үзүүлэх хэмжээний санхүү, медиа, жижиглэн худалдааны бүлэглэл болж байгааг тайлбарлаж байв.
Гэхдээ тэдний нэгдэл Оросын бизнесийн ертөнцийг гайхшируулж, хэвлэлүүд үүнийг Кадыров болон Дагестаны хууль тогтоогч, тэрбумтан Сулейман Керимов нарын эд хөрөнгийн төлөө өрсөлдөөний нэг хэсэг байж болзошгүй гэсэн таамаг дэвшүүлж байлаа.
Өнгөрсөн оны намар Кадыров өөрийн хөрш Дагестаны гурван хууль тогтоогчийн эсрэг “цуст дайн” зарлаж, тэднийг дээрх хоёр компанийг нэгтгэх ажлыг зохион байгуулсан, бас өөрийнх нь амь насыг хорлохыг завдсанд буруутгаж байжээ.
Эх сурвалж: The Moscow Times
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
