Тесла компани баталгаат засвараас зайлсхийх зорилгоор автомашины гүйлтийг хурдасгадаг гэх дуулианд нэр холбогджээ

АНУ-ын иргэн Найри Хинтон цахилгаан автомашин үйлдвэрлэгч Тесла компанийг үйлдвэрийн баталгаат засвараас зайлсхийх зорилгоор автомашиныхаа гүйлтийг хурдасгасан хэрэг буруутгаж, шүүхэд гомдол гаргажээ.

Тэрбээр 2022 оны арванхоёрдугаар сард 2020 оны Model Y загварын автомашиныг худалдан авч, өнгөрсөн хугацаанд 36,772 миль зам туулсан юм байна.

Гэхдээ тэр өөрийн бусад автомашинтай харьцуулах, өдөр тутмын туулсан замын уртаа хөтлөх зэрэг аргаар Теслагийн автомашины одометр бодит замаас 15 хувиар илүү урт тоолж байгааг баталсан гэнэ.

Үүний улмаас Лос-Анжелесын оршин суугч Хинтоны баталгаат засвар үйлчилгээний хугацаа эрт дуусаж, Теслагаас авах ёстой байсан $10,000-ын үйлчилгээг өөрөө төлсөн гэж үзэж байгаа юм байна.

“Одометрийн хэтрүүлсэн заалтаар Тесла компани баталгаат хугацаа, милийн хязгаарыг эрт дуусгах аргаар үүрэг хариуцлагаасаа зугтаж, худалдан авагчаар илүү мөнгө төлүүлж байна” гэж Хинтон шүүхэд гаргасан гомдолдоо бичжээ.

Тесла компани одоогоор Хинтоны гомдлын талаар ямар нэг мэдэгдэл гаргаагүй байна.

Өмнө нь тус компани бас цахилгаан автомашиныхаа бүрэн цэнэглэлтээр туулах замын уртыг хэтрүүлж сурталчилсан хэрэгт холбогдож байжээ.

Эх сурвалж: Reuters