С.Цэнгүүн: Х.Баттулга гэдэг хүн ОХУ-тай хийж буй хэлэлцээр дээр яагаад байр сууриа хэлдэггүй юм бэ. Надад сонирхолтой санагдаж байна

Гэрэл зургийг MPA агентлагийн онцгой зөвшөөрөлтэйгөөр ашиглав

Улсын Их Хурал (УИХ) дахь Ардчилсан Намын бүлгийн өнөөдрийн хуралдаанаар “Монгол Улсад агаарын хөлгийн түлш нийлүүлэх тухай Монгол Улсын Засгийн газар болон Оросын Холбооны Улсын Засгийн газар хоорондын хэлэлцээр”-ийн төслийг хэлэлцсэн байна. Тус бүлгийн зүгээс энэхүү Засгийн газар хоорондын хэлэлцээрийг дэмжихгүй гэдгээ илэрхийлсэн. 

Энэ асуудлыг хэлэлцэх үеэр Ардчилсан Намын бүлгийн гишүүд ямар байр суурь илэрхийлсэн талаар УИХ-ын гишүүн С.Цэнгүүн дараах мэдээллийг өгөв. 

Тэрбээр "Манай бүлэг дөрвөн цаг хуралдаж дууслаа. Олон асуудал дундаас агаарын тээврийн шатахуун түлшийг ОХУ-ын компани 20 жил нийлүүлэх нь онцлог байсан. Энэ хэлэлцээр дотор үл ойлгогдом, манай улсад ямар ч утгаараа ашиггүй зүйл заалт орж ирсэн. 

Хэдхэн сарын өмнө бид ТЭЦ III-ын маш өндөр дүнтэй хэлэлцээрийн тухай яриад суусан. Хэлэлцээр дотор ТЭЗҮ гэсэн агуулгаар орсон хэдий ч цаашдаа бүтээн байгуулах гэсэн заалтыг оруулсан. УИХ-ын гишүүд сольё гэж хэлсэн чадаагүй. 

Эдийн засгийн байнгын хороонд манай намаас Р.Сэддорж, Н.Жаргалан, Ш.Бямбасүрэн, П.Батчимэг, Ч.Лодойсамбуу, О.Цогтгэрэл, С.Цэнгүүн, Х.Баттулга гэсэн найман гишүүн байдаг. УИХ-ын гишүүн бол Монгол Улсын эрх ашгийг хамгаалах үүрэгтэй. Гэтэл энэ мэт Монгол Улсын эрх ашгаас доогуур, уландаа гишгэсэн гэрээ орж ирж байна. Манай улсын хууль тогтоомж хамааралгүйгээр ОХУ-ын хууль тогтоомжоор шийдэгдэх мэтийн зүйл заалтыг тулгаж байгаа нь байж боломгүй асуудал юм. 

Зарим УИХ-ын гишүүд "Бид ОХУ-тай мөнхийн хөрш. Энэ асуудалд эсрэг байр суурьтай харагдаж болохгүй" гэж ярьж байна. Цаашилбал "ОХУ нь манай улсын сонгуульд нөлөөлдөг учраас АН-ын гишүүд энэ дээр гарч ирж ярих нь эрсдэлтэй байж боломгүй зүйл" гэж байна. Гэтэл 35 жилийн өмнө манай намын залуучууд ОХУ-аас хараат бус байхын төлөө тэмцэж ирсэн. 

Монгол Улсын төлөө үеийн үед шийдвэр гаргаж явсан хүмүүсийг Хятад, эрлийзээр нь дуудаад улс төрөөс шахан гаргаж байсан. Жишээлбэл би шууд нэр заагаад хэлье. Х.Баттулга гэдэг хүн ОХУ-тай хийж буй хэлэлцээр дээр яагаад байр сууриа гаргаж хэлдэггүй юм бэ. Энэ хүний байр суурь надад сонирхолтой санагдаж байна. 

Саяхан ХҮН нам Төгрөг нуурын ордтой холбоотой Х.Баттулгын талаар баримтыг гаргаж ирлээ. Гэтэл үүнийг манай намын гишүүд бүгд хараагүй юм шиг царайлаад байна. ОХУ-ын ийм олон дарамт шахалт манайх руу орж байгаа үед АН-ынхан асуудлаа дотроо хэлэлцээд гадагшаа гаргаж ирээд зарчмын байр суурь дээр тодорхой байх ёстой" хэмээн ярилаа.