ЭМЯ-наас Эрүүл мэндийн тухай болон Эмнэлгийн тусламж, үйлчилгээний тухай хуулиудын хэрэгжилтийг ханган цаашид Төлөөлөн удирдах зөвлөлийн үйл ажиллагаа амжилттай хэрэгжиж буй эмнэлгүүдийн туршлагад үндэслэн төрийн болон орон нутгийн өмчит төрөлжсөн мэргэшлийн эмнэлгүүдэд үе шаттайгаар ТУЗ-ийг байгуулж, олон улсын түвшинд хүрсэн Эмнэлгийн засаглалыг хөгжүүлэх ажлыг хийж гүйцэтгэхээр төлөвлөн ажиллаж байна.

2024 оны байдлаар нийт 13 эмнэлэг ТУЗ-тай байна. Үүнээс: УБ хотын төрөлжсөн 3 эмнэлэг, дүүргийн 2 нэгдсэн эмнэлэг, 3 Бүсийн оношилгоо эмчилгээний төв, 5 аймгийн нэгдсэн эмнэлэг дээр ТУЗ байгуулагдсан байна.

Азийн хөгжлийн банкны дэмжлэгтэйгээр хэрэгжиж буй төслийн хүрээнд эмнэлгийн хагас бие даасан байдлын хэрэгжилтийг бэхжүүлэх чиглэлээр санал, зөвлөмж боловсруулах ажлыг Интернэшнл Медикал Сентер ХХК-ийн олон улсын зөвлөх баг гүйцэтгэсэн. Тус санал зөвлөмжийг төслийн багийн ахлагч Т.Болормаа танилцуулж, мөн Эмнэлгийн засаглалын үнэлгээний үр дүнг судлаач Д.Байлыхүү нар тус тус танилцуулав.

Дээрх санал зөвлөмж, үнэлгээний үр дүнгээр ТУЗ-ийн үйл ажиллагаа нь жигдэрсэн эмнэлгүүдийн хагас бие даасан байдлын хэрэгжилтийг үргэлжлүүлэх, сайжруулах тохируулгын арга хэмжээ авч хэрэгжүүлэх талаар дурджээ.

Судалгаагаар ТУЗ-ын үйл ажиллагаа нь жигдэрч, амжилттай хэрэгжиж буй Улсын Гуравдугаар Төв эмнэлгийн үйл ажиллагааны үр дүн, өөрсдийн санхүү болон хүний нөөцийн удирдлагын үнэлгээ, тусламж, үйлчилгээний тоон үзүүлэлтүүд, чанар болон үйлчлүүлэгчдийн сэтгэл ханамжийн үзүүлэлтүүд хамгийн сайн байсан талаар танилцуулав.