Биржийн тухай хуульд нэмэлт өөрчлөлт оруулах тухай хуулийн төслийг УИХ-аар хэлэлцэх эсэхийг хэлэлцэж буй. Хуулийн төсөлтэй холбогдуулан Аж үйлдвэр эрдэс баялгийн яамнаас үнийн солилцоо буюу нүүрсээ бүтээн байгуулалтаар бартердах саналыг гаргасныг УИХ-ын зарим гишүүдийн зүгээс шүүмжлэлтэй хандаж буй. Энэ асуудлаар салбарын сайд Ц.Туваан өнөөдөр сэтгүүлчдэд өгсөн тайлбартаа "Валютын урсгал гадагшаа гарах зэрэг шалтгаанаас болж бидэнд байгаа төрийн болон орон нутгийн өмчит компаниудын эзэмшилд байгаа түүхий эдээр солилцоо хийх логикоор асуудал оруулж ирж байгаа юм. Энэ нь мэдээж утга агуулгаараа Монголын уул уурхайн бүтээгдэхүүнээр ард иргэдийн улс орны эрх ашигт нэмэр үзүүлэхүйц нийгмийн болон улс орны эрх ашигт нийцүүлэх төсөл хэрэгжүүлнэ гэсэн заалт юм" гэлээ.

Салбарын сайдын мэдээлснээр 2025 оны төсвийг алдагдалгүй баталсан ч улсын төсвөөс 14 мега төсөл, аймгуудыг холбосон төмөр зам, аймаг хоорондын том замуудыг шийдэх боломж байхгүй гэнэ. Мөн дэлхийн худалдааны дайн эрчимжиж АНУ-ын Ерөнхийлөгч Доналд Трампын өндөр тарифын бодлогын нөлөөгөөр бүтээн байгуулалтын хөрөнгө оруулалтын зардал нэмэгдсэн тул хөрөнгө оруулалт босгох боломжгүй. Энэ тухай хэлсэн үгэндээ "Валютын нөөц 5 тэрбум ам.доллароос багассан, ханш өслөө зэрэг асуудлыг ярьж байгаа.Бүтээн байгуулалт бол бүхэлдээ валютаар бараа худалдан авч оруулж ирэх асуудлын нэлээн хувийг Монголд эзэлдэг.

Тухайлбал, Архангай аймагт болсон Хангайн бүсийн чуулган дээр та бүхэн очсон байх. Тэнд босоод ирж буй аймаг, сумдын удирдлагаас гарч буй үг нь манай аймгийн зам, дэд бүтэц, нийгмийн асуудлыг шийдээд өгөөч гэх асуудлыг ярьж байгаа. Үүнийг бид төсвөөр шийдэх боломжгүй. Эсвэл юу ч хийхгүй зүгээр суух сонголт байгаа юм.

Тиймээс ард түмнээс сонгогдсон УИХ хуулийг баталбал цаашид ямар түүхий эдээр, ямар бүтээн байгуулалт хийх вэ гэдгийг эрэмбэлж шийдэх юм" гэлээ.