خەمیس خەنجەر: "ھێرشەکەی سەر نووسینگەی مەسرور بارزانی لە پیرمام دستدرێژییکردنە بۆ سەر سەروەریی عێراق"

دامەزرێنەری ھاوپەیمانی سەروەریی سوننە لە عێراق، خەمیس خەنجەر ئەو ھێرشەی کە لە ئێرانەوە لە ڕێگای ئاراستەکردنی دوو دڕۆنی بۆمبڕێژکراوە کرایە سەر نووسینگەی سەرۆکوەزیرانی ھەرێمی کوردستان، مەسرور بارزانی و بەڕێوەبەری ئاژانسی پاراستن لە پیرمام، بە پێشھاتێکی مەترسیدارە لەقەڵەم دا و ڕایگەیاند، ئەو ھێرشە دەستدرێژکردنە بۆ سەر سەورەیی عێراق و ئاسایشی ھەرێمی کوردستان.

خەمیس خەنجەر پەیامێکی بڵاوکردەوە و تیایدا ھاتووە: "ئەو ھێرشەی کە لە ڕێگای ئاراستەکردنی دوو دڕۆنی بۆمبڕێژکراوە کرایە سەر نووسینگەی سەرۆکوەزیرانی ھەرێمی کوردستان، مەسرور بارزانی و بەڕێوەبەری ئاژانسی پاراستن لە پیرمام، پێشھاتێکی مەترسیدارە و دەستدرێژکردنە بۆ سەر سەورەیی عێراق و ئاسایشی ھەرێمی کوردستان، ھەروەھا ھەڕەشەیە بۆ سەر دامەزراوە و سەرکردەکانی وڵات".

دامەزرێنەری ھاوپەیمانی سەروەریی سوننە داوای لە کۆمەڵگای نێودەوڵەتی کراوە کە بەرپرسیارێتی خۆی لە وەستاندنی دەستدرێژییەکانی ئێران بۆ سەر وڵاتانی عەرەبی و ھەرێمی کوردستان جێبەجێ بکات، ھەروەھا داواشی کردووە کە سنوورێک بۆ ئەو دڕۆن و مووشەکانە دابنرێت کە وەک ئامرازێک بۆ ھەڕەشەی سیاسی و لاوازکردنی سەروەری وڵاتان بەکاردەھێنرێن.

خەمیس خەنجەر جەختی لەوەش کردووەتەوە: "پاراستنی ھە رێمی کوردستان بەرپرسیارێتییەکی عێراقی و نیشتیمانییە، ھەروەھا ئاسایشی ھە رێمی کوردستان بەشێکە لە ئاسایشی تەواوی وڵات، بۆیە دەبێت ھەڵوێستێکی جیددی عێراقی و نێودەوڵەتی ھەبێت بۆ کۆتاییھێنان بەو ھێرشە بەردەوامانەی کە دەکرێنە سەر ھەرێم، چونکە ئەو ھێرشانە بوونەتە مایەی ھەڕەشە بۆ سەر ئاسایشی ناوچەکە و بۆ سەر ئاسایشی عێراق دروست".

پێشتر دژەتیرۆری ھەرێمی کوردستان ڕایگەیاندبوو کە بەرەبەیانی ئەمڕۆ دووشەممە بە دوو دڕۆن ھێرشکراوەتە سەر نووسینگەی تایبەتی سەرۆکوەزیرانی ھەرێمی کوردستان و شوێنی حەوانەوەی بەرپرسی ئاژانسی پاراستن لە پیرمام، بەڵام ھێرشەکە ھیچ زیانێکی گیانییان لێ نەکەوتووەتەوە.