Саарал ордон энэ хавар томилгооны халууралд бүрэн живнэ. Өрнөж буй улс төрийн холын зургийг харахад хууль хяналтынхны томилгоо, цаашлаад улс төрийн намын дарга нарын сандал суудал яригдах уу, үгүй юу гэдэг хэв шинж рүү алхаж байна.

Улстөрчид хэзээ ч хар өглөө босож ирээд мэдрэл юм шиг улстөрждөггүй. Бүгд хүйтэн тооцоо, уран нарийн нүүдэл дээр үндэслэдэг. З.Дашдавааг АТГ-ын даргаар улираав. Тун удахгүй Ерөнхий прокуророор Б.Жаргалсайханг үлдээх. Үгүй бол О.Машбат орлогчийг нь дээшлүүлэх алхам хийгдэнэ.

Тэгвэл үүний ар дээр улстөрчдөд жинхэнэ утгаараа ашиглуулдаг. Товчхондоо 20, 30 жил бий болгосон улс төр, хуулийн салбараа капиталаа үндсээр нь булшилдаг Цэцийн гишүүний томилгоо орж ирэх гэж байна. Энэ томилгоо их онцлогтой. Зүгээр нэг гишүүний томилгооноос гадна ҮХЦ-ийн даргын суудлыг давхар тохирч хийх ярвигтай даалгавартай.

Учир нь ирэх сард ҮХЦ-ийн дарга, гишүүн Г.Баясгалангийн бүрэн эрхийн хугацаа дуусгавар болно.

Г.Баясгаланг УИХ-ын санал болгосноор 2019 онд томилсон түүхтэй. Хуулиараа ҮХЦ-ийн гишүүнийг зургаан жилийн хугацаатай томилдог юм. Тиймээс Цэц дээр үндсэндээ хоёр том томилгоо шил дараалан өрнөх учиртай. Яахав, хуулиараа Цэцийн есөн гишүүн дотооддоо хуралдаад даргаа тавих ёстой. Манайд бол үүн шиг худлаа үлгэр байхгүйг захын нохой хүртэл хуцаад хариулчих биз.

Тэгвэл ҮХЦ-ийн гишүүний шинэ гишүүн хэн байх вэ. Д.Амарбаясгалан спикер хэнийг нэр дэвшүүлэх бол. Энэ хавар хийгдэх АТГ-ын дарга, Ерөнхий прокурор, Цэцийн дарга гэх гурван албан тушаалыг Ерөнхийлөгч, Ерөнхий сайд, УИХ-ын дарга гурав эв найртайгаар хувааж аваад дуусах уу. Эсвэл замын дундаа нэг даргаа нөгөө хоёр нь “гөрөх үү”. Арай ч үгүй байх. МАН хэчнээн зөрчилдсөн ч бусдын “хоол” болж буруу замаар будаа тээдэггүй. Тиймээс тохироо ярьсан хэлснээрээ л хэрэгжих болов уу даа.

Харин санал болгох эрх нь УИХ-д байгаа тул Д.Амарбаясгалан дарга өөрийн зөвлөх Ц.Мөнх-Оргилыг л бараг явуулах байх. Тиймээс л өнгөрсөн сонгуулийг өнжүүлж, ар дээр нь өөрийнхөө ахлах зөвлөхөөр томилсон байх.

Ямартай ч ийнхүү эрх барьж буй улстөрчдийн халаасанд багтаж, улс төрийн “садар биеэ үнэлэгч” болтлоо дампуурсан ҮХЦ дээр дахиад нэг улс төрийн томилгоо явагдах гэж байна. Уг нь улсаа боддог бол хуулийг нь өөрчлөөд улс төрөөс нь хараат биш болгочихвол хууль зөрчсөн өнөөдрийн бүх завхрал Цэц дээр арчуулж байх учиртай.

Тэгэхгүй бол сонгууль болохоор л мажоратар нь буруу, жагсаалт нь буруу гэсэн зүсэн зүйлэн дүгнэлт гаргаж өөрсдийгөө шившиглэдэг. Сүүлд бүр сонгуулийн тогтолцоо дээр онигоо болж дуусаад ичсэн нүүрэндээ Үндсэн хуульд бичье гэдэг МАН-ын хүслийг хангаж өгсөн. Мөн Л.Оюун-Эрдэнийн ЗГ-ыг хамгаалж үлдэж, сонгуулийн тогтолцоог өөрчлөхийн тулд “давхар дээл”-ний хязгаарыг аваад хаячихсан. Тэрний өмнө “Женко”-г нэр дэвших гээд гарч ирэхэд нь У.Хүрэлсүхэд илтэд ашигтай байх хувилбарыг гаргаж өгч, Х.Баттулгыг дахин нэр дэвшүүлээгүй гээд ҮХЦ-ийн дампуурлын хэдхэн жишээг дурдахад л хэдэн арван хуудас дүүргэх муу бүхний цуглуулга бий.

Ер нь л манай Цэцийн гишүүд “нохой зассан эзэндээ ЯНАГ” гэгчээр томилсон хүндээ тал засаж, нялуунаар зусарддаг. Энэ үйлдлийг нь порно кинотой зүйрлэвэл хамгийн балиар, заваан ХАРДКОР сцен л гэсэн үг.