Өнгөрсөн нэгдүгээр сарын 27-нд нийслэлийн прокурорын газраас "Дашваанжил" компанийн компанийн удирдлага Г, жолооч нарыг яллагдагчаар татаж шүүхэд шилжүүлсэн талаар мэдээлсэн. Тодруулбал гал түймрийн улмаас Онцгой байдлын газрын 3 албан хаагч, явган болон автомашинаар зорчиж явсан 4 иргэн нас барж, 5 хүн хүнд, 1 хүн хүндэвтэр, 35 хүнд хөнгөн зэргийн гэмтэл болон угаарын хийн хордлогын шинж илэрсэн бол 36 тээврийн хэрэгсэл, 3 барилга байгууламж шатаж, 228 иргэн, 15 ААН байгууллагын эд хөрөнгөд 5.4 тэрбум орчим төгрөгийн хохирол учирсан болох нь тогтоогдсон билээ.

Уг хэрэгт "Дашваанжил" компанийн удирдлага Г, жолооч Р нарт "Хүний амь насыг болгоомжгүйгээр хохироосон", "Хүний эрүүл мэндэд хүнд, хүндэвтэр гэмтэл учруулсан" хэрэгт яллагдагчаар татаж шүүхэд шилжүүлсэн юм. Тэгвэл тус хэргийн урьдчилсан хэлэлцүүлэг өнөөдөр /2025.04.22/ боллоо.

Улмаар шүүхээс шинжээчийн дүгнэлтийг эргэлзээтэй гэж үзээд зам тээврийн осолд дахин шинжээч томилохоор боллоо. Ингэснээр хэргийн зүйлчлэл мөн өөрчлөгдөх аж.

Тодруулбал, шүүгч "Түүнчлэн зарим иргэний нэхэмжлэгч бус этгээдийг иргэний нэхэмжлэгчээр тогтоосон нь оролцогчдын эрхийг хязгаарласан байна гэж шүүхээс үзсэн байна. Гал түймрийн аюултай бодис тээвэрлэж байгаа этгээд онцгой байдлын асуудал эрхэлсэн байгууллагаас галын аюулгүй байдлын дүгнэлт авах шаардлагатай байдаг. Энэ дүгнэлт хэрэгт авагдаагүй. 207 дугаар байр галын аюулгүй байдлын шаардлага хангаагүй байсан гэх агуулгаар дүгнэлт тодорхойгүй байдлаар тусгагдсан байсан. Үүнийг тодруулах шаардлагатай байна" гэв.

Яллагдагчдын өмгөөлөгчид хэргийг прокурорт буцааж мөрдөн шалгах ажиллагаа явуулах, патрол маркийн автомашины жолооч Э.Мөнхнаранг хэрэгт татан шалгах хүсэлтэй байгаа бол прокурорууд "Хэргийг прокурорт буцаах боломжгүй. Тухайн хэрэгт хамааралтай эцэслэн шийдвэр гаргахад хангалттай баримтуудыг цуглуулсан" гэх байр суурийг илэрхийлж байсан юм.