Үндэсний Дээд Лигийн финалын тоглолт өчигдөр эхэлсэн. Хасын Хүлэгүүд болон Бишрэлт Металл багуудын хооронд өрнөсөн финалын шатны эхний тоглолтын үеэр, Бишрэлт Металл багийн легионер тоглогч Дэвон Скотт Хасын Хүлэгүүд багийн төвийн тоглогч А.Азбаярын дагзанд цохин унагаж, спортын бус алдаа гаргасан юм.

Дэвон Скотт эл үйлдэлдээ гэмшиж буйгаа илэрхийлж албан ёсоор гуйсан ч А.Азбаярын биеийн байдал тогтворгүй байгаа юм. Бид Хасын Хүлэгүүд багийн төвийн тоглогч А.Азбаярын аав Ж.Алтангэрэлээс биеийн байдлынх нь талаар тодруулахад, "Компьютер томографийн шинжилгээний хариу гараагүй байна. Өнөөдөр эмнэлгээр явна. Биеийн байдлын тухайд "Толгой нь өвдөж, нүд нь харанхуйлаад, дотор муухайраад байна" гээд өчигдрийн зовиурууд нь хэвээрээ байна" гэлээ.