Шри Ланкын эрх баригчид сошиал ертөнцөд тарсан бурхан Буддагийн шүдний гэрэл зургийн мөрөөр шалгаж байна

Бурхан Буддагийн шүтээн эрдэнэ гэгддэг шүдийг Шри Ланка улсын нэг сүмд нандигнан хадгалж байдаг.

Энэ сард тус улсын эрх баригчид шүтээн эрдэнийг 2009 оны гуравдугаар сараас хойш анх удаагаа олон нийтэд үзүүлж байгаа юм.

Үүнтэй зэрэгцэн сошиал орчинд Буддагийн шүдний гэх гэрэл зураг тарсан байна.

Шри Ланкын цагдаагийн газар энэхүү гэрэл зургийн мөрөөр шалгаж эхэлжээ.

Буддагийн шүтээн эрдэнийг Канди хотын нэг сүмд маш өндөр харуул хамгаалалтын дор хадгалдаг. Олон нийтэд үзүүлэхдээ иргэдийн цүнх, гар тээшийг хурааж, гар утас авч орохыг хориглодог юм.

“Хэрвээ хэн нэгэн сүм дотор байхдаа зураг авсан бол энэ нь харуул хамгаалалтын маш ноцтой алдаа. Сүм дотор энгийн хувцастай албан хаагчид олон байгаа” гэж мөрдлөгийг хариуцаж байгаа цагдаагийн албан тушаалтнуудын нэг хэвлэлд ярьжээ.

Мөрдөгчид одоо сошиал ертөнцөд тарсан гэрэл зураг бодитой, эсвэл засварласан эсэхийг шинжилж байгаа юм байна.

Шүтээн эрдэнийг нийтэд үзүүлсэн эхний өдөр ердөө хоёр цаг, гучин минутын хугацаанд сүмийг нээхэд 125,000 орчим хүн нэвтэрчээ.

Дараагийн өдөр нь таван цаг, гучин минутын хугацаанд үзүүлжээ.

Энэ мэтээр 10 өдөр үргэлжлэх үзүүлбэр дөрөвдүгээр сарын 27-нд өндөрлөх юм байна.

 

Шри Ланка улсын хүн амын дийлэнх нь Буддын шашин шүтдэг. Өнөөдөр Канди хотод бурхны шүтээн эрдэнийг үзэхээр олон арван мянган сүсэгтэн цугларснаас замын хөдөлгөөнд саатал гарч, эмх замбараагүй байдал үүссэн байна. Сүмийн гадаа сүсэгтнүүд ээлжээ хүлээн урт дараалалд хоноцгоож байгаа юм.

Эх сурвалж: AFP