Х.Нямбаатар: Хүүхэд, Залуучуудын Театрын ард талд бейсболын цэнгэлдэх хүрээлэн барихаар боллоо
Нийслэлийн Сонгинохайрхан дүүргийн тавдугаар хорооны нутаг дэвсгэр дээр өнгөрсөн онд ашиглалтад орсон Хүүхэд, Залуучуудын Театрын дэргэд бейсболын талбай байгуулахаар болжээ.
Энэ тухай хотын дарга Х.Нямбаатар "Сонгинохайрхан дүүргийн нутаг дэвсгэр, Хүүхэд, Залуучуудын Театрын ард талд хүүхэд, залууст зориулсан бейсболын цэнгэлдэх хүрээлэн байгуулах 1.5 га газрыг тус дүүргийн ЗДТГ болон Газрын алба хамтран чөлөөллөө. Цэнгэлдэх хүрээлэнг барихаар нэг жил гаруй болсон ч газар нь шийдэгдээгүй байсан юм.
Төрийн болон орон нутгийн өмчийн хөрөнгөөр бейсболын талбай барих нээлттэй тендерийг удахгүй зарлана.
Монгол Улсад бейсболын спорт хөгжих бүрэн боломжтой гэж мэргэжлийн холбоод үзэж байгаа.
Хотын хэсэгчилсэн ерөнхий төлөвлөгөөний баримт бичгийг үндэслэж тус байршлыг сонголоо.
Сонгинохайрхан дүүргийн Засаг дарга болон түүний ажлын албанаас бейсболын цэнгэлдэх хүрээлэнгийн бүтээн байгуулалтын ажилд хяналт тавьж ажиллах юм" гэж мэдээллээ.
"Тус дүүргийн гуравдугаар хорооны нутаг дэвсгэрт хөлбөмбөг, газрын теннис, сагсан бөмбөгийн талбай бүхий спорт цогцолбор энэ оны зургаадугаар сарын 10-н гэхэд ашиглалтад орно. Ингэснээр тухайн бүс орчмын хүүхэд залуус чөлөөт цагаа зөв боловсон өнгөрүүлэх боломжтой болно" хэмээн мэдээллийн үеэр дурдав.
Тэрбээр өнөөдөр Сонгинохайрхан дүүрэг буюу орон нутгийн сонгуульд сонгогдсон тойрогтоо ажиллаж байна.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
