"ОХУ‑ын талд онгоцны буудлын дэд бүтцийг хамтран ашиглана, оросын арбитрын шүүхээр асуудлыг шийднэ гэхчлэн дөрвөн зүйлд өөрчлөлт оруулах саналаа тавьж байгаа"
УИХ дахь МАН-ын бүлгийн хуралдаанаар хэлэлцсэн асуудлын талаар мэдээлэл хийлээ.
Бүлгийн дарга Л.Мөнхбаатар “Уул уурхайн биржийн тухай хуулийн төслийг Засгийн газарт буцаахаар шийдвэрлэлээ. Монгол Улсын Засгийн газар уг хуулийн төслийг татаж аваад боловсронгуй болгох нь зүйтэй гэж үзлээ.
Мөн Эдийн засгийн байнгын хороогоор хэлэлцэж буй Евразийн эдийн засгийн холбоо түүний гишүүн орнуудтай байгуулах худалдааны түр хэлэлцээрийн төслийг хэлэлцлээ. Уг асуудалд түр завсарлага авснаар энэ долоо хоногт үргэлжлүүлэн хэлэлцэнэ.
Бүлгийн зүгээс гишүүдийг мэдээллээр хангаад үргэлжлүүлэн хэлэлцэх нь зүйтэй гэж үзсэн.
Түүнчлэн Монгол Улсад агаарын хөлгийн түлш нийлүүлэх тухай Монгол Улсын Засгийн газар болон ОХУ-ын Засгийн газар хоорондын хэлэлцээрийн төслийн тухайд бүлгийн гишүүдийнхээ байр суурийг сонсож, нэгтгэлээ.
Гишүүдийн болгоомжилж байгаад хүндэтгэлтэй хандаж байгаа. Тиймээс зарим нэр томьёог ойлгомжтой болгох, харилцан санал тавьж, хэлэлцээрийг сайжруулах шаардлагатай байгаа тул Гадаад харилцааны яам болон Ашигт малтмал, эрдэс баялгийн яамдууд ОХУ-ын талтай санал солилцож, үүний дараа хэлэлцээрийн төслийг соёрхон батлах эсэхийг хэлэлцэх нь зүйтэй гэж үзсэн” гэлээ.
Гадаад харилцааны сайд Б.Батцэцэг “Ч.Хүрэлбаатар сайдын үед хэлэлцээ хийсний үндсэн дээр ЕЭЗХ Иран улстай хийсэн хэлэлцээрийн загварыг санал болгосон. Энэ нь чөлөөт худалдааны түр хэлэлцээр юм. Гурван жилийн хугацаатай. Ямар нэгэн үүрэг хүлээхгүй. Өөрөөр хэлбэл, түр хэлэлцээрийг хийснээр дараа нь заавал ЕЭЗХ-нд элсэнэ, ажиглагч болно гэсэн үг биш юм.
Үүнийг судалж үзээд манай тал түр хэлэлцээр байгуулах протоколд гарын үсэг зурсан.
Хоёр дахь хэлэлцээрийн тухайд, онгоц түлш нийлүүлэх нь хоёр хэлэлцээрийн нэг хэсэг нь юм. Хоёр улсын тавьж байгаа саналыг нийлүүлээд хос хэлэлцээр байгуулахаар болсон. Нэгдүгээрт, манай улсын зүгээс ОХУ-д шатахууныг тасралтгүй нийлүүлэх хүсэлтийг тавьсаар ирсэн. ОХУ-ын зүгээс манай онгоцны түлшийг дундын зуучлагчгүйгээр нийлүүлье гэдэг саналыг тавьсаар ирсэн. Тиймээс хоёр талаасаа төрийн өмчит компани байгуулаад ОХУ-ын зүгээс онгоцны түлш, газрын тосны бүтээгдэхүүнийг тасралтгүй шууд нийлүүлнэ гэдэг хэлэлцээрийг ярьсан.
Гишүүдийн тавьж байгаа асуудлыг засаж сайжруулаад энэ хэлэлцээрийг байгуулах боломжтой гэж үзсэн.
Ц.Туваан сайд ОХУ‑ын талд 20 жил нийлүүлэх, онгоцны буудлын дэд бүтцийг ашиглах хамтарсан компани байгуулах, ОХУ-ын арбитрын шүүхээр шийднэ гэхчлэн дөрвөн асуудал дээр өөрчлөлт оруулах саналаа албан ёсоор тавьж байна. Гадаад харилцааны яам дэмжлэг үзүүлэн ажиллаж байгаа" гэв.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
