ЦЕГ: "Бадрах энержи" ХХК-ийн Гүйцэтгэх захирлын биед халдсан асуудлыг тодруулахаар шалгалт явуулж байна
“Бадрах Энержи” ХХК-ийн удирдлагууд уран олборлохыг эсэргүүцэж буй иргэдтэй өнөөдөр уулзжээ.
Уулзалтын төгсгөлд иргэдийн төлөөлөл тус компанийн Гүйцэтгэх захирал Марк Мелеардын биед халдсан байна. Мөн уулзалт өндөрлөх үеэр тус компанийн ажилтан эмэгтэйн биед халдаж буй нь ч дүрс бичлэгт үлджээ.
Энэ тухай цагдаагийн байгууллагаас тодруулахад "14:40 цагийн орчимд Сүхбаатар дүүргийн 1 дүгээр хороо Ай Си центерт зодоон болоод байна гэх утгатайгаар ирсэн байна. Дуудлагын дагуу алба хаагчид очсон. Асуудлыг тодруулах чиглэлээр шалгалтыг явуулж байна" гэлээ.
Монгол Улсын Засгийн газраас Монгол, Францын хамтарсан “Бадрах Энержи” ХХК-ийн хөрөнгө оруулагч, Бүгд найрамдах Франц улсад бүртгэлтэй “Орано Майнинг” компанитай байгуулах хөрөнгө оруулалтын гэрээнд 2025 оны нэгдүгээр сарын 17-ны өдөр гарын үсэг зурж байв. Уг төсөл нь Засгийн газраас хэрэгжүүлэхээр зарласан 14 мега төслийн нэг юм.
Хэвлэл мэдээллийн байгууллагууд (Телевиз, Радио, Social болон Вэб хуудаснууд) манай мэдээллийг аливаа хэлбэрээр бүрэн ба хэсэгчлэн авч ашиглах хориотой ба зөвхөн зөвшилцсөн тохиолдолд эх сурвалжийг (ikon.mn) дурдах замаар ашиглах ёстойг анхаарна уу!
