Хятад улс өөрийг нь “золиослох” замаар АНУ-тай худалдааны гэрээ байгуулахгүй байхыг бусад улс орнуудад анхаарууллаа

Өнөөдөр өглөө Хятадын эрх баригчид өөрийг нь хохироох замаар АНУ-тай өргөн хүрээтэй худалдааны гэрээ байгуулахгүй байхыг дэлхийн бусад улс орнуудад анхааруулжээ.

Тус улсын худалдааны яам АНУ-тай хийдэг худалдааныхаа маргаан зөрчлийг шийдвэрлэх улс орнуудын эрх ашгийг хүндэтгэж байгаа ч үүнийг Хятадын эсрэг хөшүүрэг болгон ашиглахыг тууштай эсэргүүцэхээ мэдэгдсэн байна.

“АНУ нь бүх худалдааны түншүүддээ “харилцан тэгш” гэх нэрийн дор худалдааны гэрээ шинээр байгуулах нөхцөлийг албадан тулгаж байна. Хэрвээ АНУ импортын татвараас чөлөөлсний хариуд Хятад улстай хийдэг худалдаагаа хязгаарлах шахалт үзүүлбэл бид шийдвэртэй хариу арга хэмжээ авах болно. Хятад улс өөрийн эрх ашгийг хамгаалах чадвартай бөгөөд бүх талуудтай хамтын ажиллагаагаа бэхжүүлэх хүсэл эрмэлзэлтэй байна” гэж худалдааны яамны хэвлэлийн төлөөлөгч мэдэгджээ.

Трампын засаг захиргаа АНУ-ын импортын татварыг хөнгөлүүлэх хүсэлтэй улс орнуудад Хятадтай хийх худалдаагаа хязгаарлах нөхцөлийг тулгахаар бэлдэж байгаа тухай Блүүмбэрг агентлаг албаны эх сурвалжаас уламжлан мэдээлсэн юм.

Энэ сарын эхээр АНУ-ын худалдааны төлөөлөгч Жэмисон Грир хэлэхдээ дэлхийн 50 орчим улс ерөнхийлөгч Трампын зарласан нэмэлт татварын асуудлаар яриа хэлэлцээ эхлүүлэх хүсэлтээ ирүүлээд байгааг мэдээлж байв.

Тэр үеэс хойш хэд хэдэн яриа хэлэлцээ эхлээд байгаа. Тухайлбал Японы засгийн газар АНУ-аас авах шар буурцаг, цагаан будааны хэмжээгээ нэмэгдүүлэх талаар судалж, Индонез улс АНУ-аас авах хүнс, түүхий эдийн хэмжээгээ нэмэгдүүлж, оронд нь бусад улс орнуудаас авдаг хэмжээгээ бууруулах талаар төлөвлөж байгаа гэсэн мэдээллүүд тарсан юм.

Трамп дөрөвдүгээр сарын 2-нд дэлхийн ихэнх улс орнуудын импортын татварыг өсгөж байгааг зарласан ч удалгүй Хятадаас бусад улсуудын татварын хэрэгжилтийг 90 хоногоор хойшлуулсан нь тэдэнд яриа хэлэлцээ эхлүүлэх боломж олгох зорилготой нь тодорхой байв.

Энэ нь Трампын худалдааны дайн үндсэндээ Хятад улсын эсрэг чиглэж буйг харуулсан юм.

Хятадын ерөнхийлөгч Ши Жиньпин өнгөрсөн долоо хоногт Зүүн Өмнөд Азийн гурван улсад айлчилсан нь тэдэнтэй хамтын ажиллагаагаа бэхжүүлж, АНУ-ын шахалтын эсрэг нэгдсэн фронт байгуулах зорилготой байв.

“Худалдааны болон татварын дайнд ялагч байхгүй” гэж Ши Жиньпин айлчлалынхаа үеэр хэлснийг Вьетнамын төв хэвлэл мэдээлсэн байна.

Эх сурвалж: Reuters